Duš za 10 rubloŭ, šalonaja čarha aŭto i chity rasijskich pop-zorak: jak sioleta prajšoŭ fiestyval Viva Braslav
Na vychodnych adhrymieŭ adzin z samych maštabnych muzyčnych fiestyvalaŭ Biełarusi — Viva Braslav. Pahladzieli, jak tam adpačyvali biełarusy i kolki za heta płacili.
29.07.2024 / 15:40
Fota: instahram @vivabraslav.real
U lutym standartny kvitok na 2 dni fiestyvalu kaštavaŭ kala 100 rubloŭ, bližej da mierapryjemstva — kala 140 rubloŭ. Za VIP-kvitki na starcie ludzi płacili pa 345 rubloŭ (u vyniku VIP-haściej puskali na tancplacoŭku vyšynioj 3 mietry kala hałoŭnaj sceny, a taksama ŭ asobnyja łaŭndž-zonu, bar, fud-kort).
Aŭtamabilnyja čerhi na fiestyval pa daŭžyni tolki krychu sastupali čerham na biełaruskaj miažy. Adna błohierka źniała čarhu, jakaja pačynałasia ŭ ahraharadku Kaziany (jon znachodzicca za 61 kiłamietr ad Brasłava).
Fota: instahram @vivabraslav.real
Na Viva Braslav praduhledzieli dźvie stajanki — dla zvyčajnych aŭtamabilaŭ i dla aŭtadamoŭ. Miescy treba było nabyvać zahadzia. Zvyčajnaja stajanka na 4 dni abychodziłasia ŭ 52,95 rubla, stajanka dla aŭtadoma na toj ža termin — u 179,95 rubla.
Chto nie paśpieŭ nabyć miesca na stajancy, damaŭlalisia ź miascovymi žycharami. Adzin z błohieraŭ raspavioŭ u tyktoku, što jamu paščaściła pastavić mašynu i pałatku ŭ centry horada ŭsiaho za 30 rubloŭ na sutki — na aharodzie ŭ pradprymalnaj babuli.
Sapraŭdy dla miascovych žycharoŭ maštabny fiestyval — dobraja mahčymaść padzarabić. Bo daloka nie ŭsie naviedvalniki hatovyja žyć u namiotavym łahiery. Chapaje ludziej, jakija chočuć načavać z kamfortam u łožku i mieć vyhody ŭ domie, a nie niedzie na vulicy.
Tamu šmat chto ŭ Brasłavie na niekalki dzion pakidaje ŭłasny dom, kab zdać jaho na fiestyvalnyja dni pryjezdžym za davoli prystojnuju sumu.
Daśviedčanyja tusoŭščyki raspaviadajuć, što šukać žyllo pačynajuć amal za paŭhoda da fiestyvalu. Ale ŭ vyniku nie ŭsie zastajucca zadavolenymi suadnosinami cana-jakaść.
Błohierka Alena Cubier paskardziłasia ŭ tyktoku, što atrymała «žudasnyja ŭmovy za niemaleńkija hrošy». Ščyra kažučy, dom, jaki arandavała žančyna, vyhladaje prystojna — ramont, kaniešnie, nie samy šykoŭny, ale nielha skazać, što pakoi ci mebla ŭ žudasnym stanie. Bačna, što pierad zdačaj usio prybrali. Ale Alenie nie spadabałasia toje, što ŭ domie šmat asabistych rečaŭ haspadaroŭ.
— Toje, što mianie razdražniaje — tut pachnie staroj-staroj babulaj. Heta prosta zvyčajnaja žyłaja chata. Prosta jak u majoj babuli. Foty stajać (unuki, dzieci, viasielli), ikony, akulary… Prosta čysta. I na tym dziakuj. Nohi da padłohi nie prylipajuć, nie ahidna.
Alena ŭdakładniła, što za try dni za arendu doma jany zapłacili 300 dalaraŭ. Jana ličyć, što heta zašmat za takija ŭmovy. U kamientaryjach žančynie napisali, što joj jašče vielmi pašancavała, bo niekamu daviałosia zdymać «realna chałupu».
«Paru hadoŭ tamu źniali ŭ Brasłavie taki ž žyły dom z asabistymi rečami haspadaroŭ, a sami jany pierajechali ŭ chleŭ. Tam stahnaŭ pažyły mužčyna, prasiŭsia ŭ chatu… Było žudasna niekamfortna. Užo lepš u namiocie», — napisała adna z kamientatarak.
Ale šmat chto i pakryŭdziŭsia na toje, što staličnyja z takoj niepavahaj staviacca da prostaha bytu ludziej z rehijonaŭ.
Dla haściej, jakija ceniać kamfort, arhanizatary fiestyvalu stvaryli tak zvany hłempinh (užo nie ŭpieršyniu). U hłempinhu zamiest zvyčajnych namiotaŭ byli ŭstalavanyja šatry z tentavaj tkaniny na draŭlanaj padłozie. Kožny šacior byŭ raźličany na čatyroch čałaviek. Tam znachodzilisia narmalnyja łožki z matracami i kamplektami dla snu, nievialiki chaładzilnik ź mini-baram, kresły.
Kab pryniać duš, treba było iści ŭ śpiecyjalnuju zonu. Sioleta za toje, kab pamycca ŭ dušy na Viva Braslav, treba było zapłacić 10 rubloŭ.
Arenda adnaho šatra na 4 dni kaštavała 2490 rubloŭ (za 4 čałaviek), kvitki na sam fiestyval treba było kuplać asobna. Niahledziačy na davoli vysoki košt, usie šatry ŭ hłempinhu raskupili jašče za miesiac da pačatku fiestyvalu.
Siarod chedłajnieraŭ open-eiru sioleta byli Kristine Si, Niletto, Nkeeei, Uuniqe, Artem Shilovets, Xolidayboy, Kłava Koka, Loša Śvik, MakSim i Aleh Majami.
Naviedvalnikam prapanoŭvali roznyja varyjanty aktyŭnaściej: spabornictvy pa plažnym valejbole, strytbole, mini-holfie, zabiehi, katańnie na sap-siorfach. Možna było i padniacca na pavietranym šary (košt zabavy — 70 rubloŭ z čałavieka).
Na adnym ź plažaŭ pravodzili cyrymonii Fast Marriage (chutkich šlubaŭ) dla zakachanych.
Tradycyjna na Viva Braslav prachodzić i konkurs pryhažości, na jakim vybirajuć tak zvanuju muzu fiestyvalu. Piatnaccać dziaŭčat-finalistak vyznačajuć na papiarednim kastynhu ŭ Minsku.
Sioleta karonu atrymała Alina Sieviarniuk. Dziaŭčynie ŭračysta padaryli siertyfikat na 2000 rubloŭ.
Krychu pra ceny na fudkortach fiestyvalu. Paŭlitra piva pradavali za 8 rubloŭ, 300 hramaŭ morsu — za 5 rubloŭ. Porcyju miasnoj salanki abo płovu možna było kupić za 8 rubloŭ, hrečki ź miasam — za 7 rubloŭ, stolki ž kaštavali sup z kvašanaj kapusty, kuryny sup abo chaładnik — 6 rubloŭ.
Za šaŭrmu prasili 12 rubloŭ, za try draniki — 7 rubloŭ, bliny ź viandlinaj i syram taksama kaštavali pa 7 rubloŭ, bulba fry — 5 rubloŭ.
Čerhi ŭ prybiralni (jak zaŭsiody na takich vialikich mierapryjemstvach) uražvali, ale ludzi nie hublali nadzieju i śpiavali nieśmiarotny chit hurta «Žuki» «Batarejka».
Viva Braslav adhrymieŭ — i naviedvalniki ŭžo pačali dzialicca ŭ sacsietkach łajfchakami, jak vyratavać paśla fiestyvalu lubimyja brendavyja krasoŭki.
NaviBand zapisaŭ novy albom i prosić biełarusaŭ padtrymać jaho vypusk
Jak za 20 kiłamietraŭ ad Biełarusi prachodzić fiestyval Tutaka ŠMAT FOTA