«Radujciesia, s*ki!» Čym skončyŭsia skandał pamiž hiniekałahiniaj-błohierkaj i pacyjentkaj pryvatnaha miedcentra?
Minčanka aburyłasia, što hiniekałahinia pačała krytykavać jaje ŭ svaim błohu ŭ instahramie. Doktarka-błohierka ŭ adkaz abvinavaciła byłuju pacyjentku ŭ arhanizacyi ckavańnia ŭ internecie. U kanflikcie raźbirałasia navat Minzdaroŭja. Niadaŭna stała viadoma, čym usio skončyłasia.
24.07.2024 / 08:00
Doktarka-błohierka Alena Vajciachovič. Fota ź jaje instahramu
Nahadajem, z čaho pačałasia drama. Kala dvuch miesiacaŭ tamu minčanka pryjšła ŭ pryvatny miedycynski centr «MiedAvieniu» da hiniekałahini zrabić bijapsiju endamietryja. Na sajcie było paznačana, što manipulacyja kaštuje ad 65 rubloŭ. Ale na kasie žančyna pačuła sumu ŭ dva razy bolšuju — 147 rubloŭ. Jana pacikaviłasia, čamu tak — vyśvietliłasia, što doktarka paznačyła, što była i bijapsija, i kansultacyja. Klijentka aburyłasia, bo ličyła, što nijakaj kansultacyi nie było, ale zapłaciła.
Praz paru hadzin žančyna pabačyła, što hiniekałahinia abmiarkoŭvaje situacyju ŭ svaim błohu ŭ instahramie. Doktarka Alena Vajciachovič maje bolš za 42 tysiačy padpisčykaŭ.
— Kali pacyjent prychodzić da mianie, jon adrazu razumieje, što košt maich pryjomaŭ niestandartny, jon vyšejšy za niejkija kłasičnyja taryfy pa Minsku, — kazała doktarka-błohierka.
Hiniekałahinia aburałasia tym, što «dźmuła čałavieku ŭ adno miesca», a jaje pracu abiascenili. Ale, miarkujučy pa tłumačeńniach doktarki, jana padčas bijapsii nie pravodziła kansultacyju, a prosta supakojvała pacyjentku.
Alena pazicyjanavała siabie jak «doktara nie dla ŭsich» i raiła tym, chto nie hatovy płacić šmat hrošaj, źviartacca ŭ palikliniki. Pacyjentka pakryŭdziłasia i napisała skarhi ŭ roznyja instancyi. Kanflikt aktyŭna abmiarkoŭvali ŭ instahramie, a ŭ tyktoku videa na hetu temu źbirali sotni tysiač prahladaŭ.
I voś što było dalej. Miedycynski centr «MiedAvieniu» publična nijak nie reahavaŭ na kanflikt — u dopisach, pad jakimi źjaŭlalisia patrabavańni rastłumačyć situacyju, prosta zakryvali kamientaryi.
Alena Vajciachovič raspaviadała ŭ storys, što razmova z byłoj pacyjentkaj u miedcentry nie atrymałasia, a skandalnaja historyja dajšła ŭžo i da Minzdaroŭja.
Sama hiniekałahinia pieršyja dni pahražała napisać zajavu ŭ milicyju za arhanizacyju ckavańnia ŭ internecie. A ŭ šapcy akaŭntu paznačyła, što pojdzie ŭ sud z pacyjentkaj. Ale ŭ chutkim časie rytoryka doktarki źmianiłasia — jana pačała kazać, što nie choča marnavać svaju enierhiju.
Raptoŭna jana paviedamiła padpisčycam, što sychodzić u adpačynak na dva miesiacy (adzin ź ich pryjšłosia brać za svoj košt). Miarkujučy pa dalejšych storys doktarki-błohierki, heta było nie jaje žadańnie, a patrabavańnie miedycynskaha centra, jakomu patrebny byŭ čas na pryniaćcie rašeńnia.
Alena taksama paskardziłasia na toje, što ŭ jaje źjaviłasia jašče adna prablema praz błohierstva. Na staroncy Vajciachovič jość žartaŭlivaje videa na temu taho, čym jana zajmałasia volny čas na pracy: na videa hiniekałahinia śpiavaje ŭ datčyk aparata UHD pieśniu śpiavački Hanny Aści «Caryca».
— Praz hetaje videa niekatoryja kankurentnyja centry Minska vyrašyli paskardzicca ŭ sanstancyju. Jak heta ja śpiavaju ŭ datčyk.
Sama doktarka ličyć, što ŭ takim «mikrafonie» niama ničoha kramolnaha, bo jaho ŭsio roŭna dezynficyrujuć. Pry hetym pad videa jość kamientaryj «Supier» ad aficyjnaha akaŭnta «MiedAvieniu».
Čakajučy kančatkovaha rašeńnia svajho pracadaŭcy, Alena maryła ab tym, kab pajści na kastynh šou «Faktar.Baj».
Niadaŭna Vajciachovič raspaviała, što 1 žniŭnia jana vychodzić na pracu, a ŭžo 17 žniŭnia jaje zvalniajuć — dakładniej, nie praciahvajuć kantrakt. Pry hetym hiniekałahinia padkreśliła: heta nie patrabavańnie Ministerstva achovy zdaroŭja, a rašeńnie samoha miedcentra. Emacyjanalnyja storys jana padpisała «Radujciesia, s*ki!».
Dalej Alena paviedamiła, što z 1 vieraśnia z radaściu ŭładkujecca ŭ miedycynski centr na čverć staŭki i pryviadzie z saboj svaich pacyjentak.
Ale, vierahodna, jaje płany źmianilisia. Ciapier hiniekałahinia zajmajecca sietkavym markietynham u «Hrynvej» i ahituje padpisčyc da jaje dałučacca. Kaža, što jaje meta — pačać zarablać pa 10 tysiač rubloŭ štomiesiac.
Pachod da hiniekołaha skončyŭsia skandałam — minčanka vajuje z pryvatnym miedcentram
Hiniekołah z Hrodna stvaryła dadatak dla žančyn — anałah suśvietna viadomaha Flo