У праграме тэлеперадачаў няма трансляцый Алімпіяды. Хутчэй за ўсё, Гульні-2024 у Беларусі не пакажуць
Белтэлерадыёкампанія азнаёміла карыстальнікаў сваіх каналаў з праграмай на наступны тыдзень.
16.07.2024 / 12:17
Фота: Olympics.com
З яе вынікае, што беларускія гледачы па дзяржаўным тэлебачанні не змогуць убачыць трансляцыі Алімпіяды ў Парыжы-2024. Спаборніцкая праграма стартуе ў суботу, 27 ліпеня, а днём раней, у пятніцу, пройдзе цырымонія адкрыцця Гульняў.
У сетцы вяшчання «Беларусь 1» і «Беларусь 5» падзеі Алімпійскіх гульняў не значацца, піша Smartpress.by.
Адпаведна, для пошуку трансляцый спатрэбіцца шукаць іншыя крыніцы. Прычым і не ў Расіі. Раней было абвешчана, што ў суседняй краіне таксама не збіраюцца паказваць галоўны старт чатырохгоддзя.
Раней стала вядома, што Міжнародны алімпійскі камітэт не ўключыў Беларусь і Расею ў лік еўрапейскіх вяшчальнікаў. Медыяправа на паказ гульняў на тэрыторыі еўрапейскіх краін атрымалі Еўрапейскі вяшчальны саюз і кампанія Warner Bros. Discovery.
Апошні раз у Беларусі не паказвалі Алімпіяду ў 1984 годзе, калі СССР і краіны сацлагеру (апроч Румыніі) байкатавалі Летнюю Алімпіяду ў Лос-Анджэлесе.
Па апошніх звестках, узяць удзел у Парыжы-2024 змогуць толькі 16 беларускіх спартоўцаў (у Токіа-2021 было 106 атлетаў). Аднак канчатковае рашэнне за Міжнародным алімпійскім камітэтам, які правядзе выніковае пасяджэнне 20 ліпеня.
Арына Сабаленка афіцыйна адхіліла запрашэнне МАК на Алімпіяду-2024 у Парыжы
Колькі беларускіх спартоўцаў на сёння заяўленыя на Алімпіяду? Вельмі мала