Šmatdzietnaj maci dali 6 hadoŭ kałonii pa 6 artykułach. Syn-padletak ź invalidnaściu čakaje jaje na voli
Jak i troje darosłych dačok.
12.07.2024 / 09:00
Nadzieja Łapcionak. Fota z bazy «Kibierpartyzanaŭ»
Nadziei Łapcionak (Ažhirenka) 51 hod. Zhodna sa źviestkami, jakija zdabyŭ prajekt DIT dziakujučy bazam «Kibierpartyzanaŭ», rodam jana z bujnoj vioski Novy Śvieržań Staŭbcoŭskaha rajona.
Adtul pachodzić šmat viadomych biełarusaŭ, naprykład, pieršy rektar Biełaruskaha politechničnaha instytuta Mikanor Jaraševič, jakoha ŭ 1930-ja rasstralali balšaviki, vybitny prafiesar-biełarusist Alaksiej Piatkievič i pieršy staršynia KDB Biełarusi Eduard Šyrkoŭski.
Bolšuju častku žyćcia Nadzieja pražyła ŭ Minsku. Davoli rana pabrałasia šlubam, u 19 hadoŭ naradziła pieršuju dačku, a praz hod druhuju.
Pracavała na vielmi prostych rabotach — pamočnicaj vychavalnicy ŭ dziciačym sadku, sanitarkaj u balnicy i psichanieŭrałahičnym internacie, u kambinacie «Vitamin», jaki kormić chvorych, jakija lažać u balnicach. A ŭ 2004-m naradziła jašče adnu dačku.
Troje dačok Nadziei ŭžo darosłyja. Małodšy syn Nadziei 2010-ha hoda naradžeńnia i, pa źviestkach pravaabaroncaŭ, maje invalidnaść.
Nadzieju sudzili ŭ śniežni 2023-ha. Jaje abvinavačvali ŭ «zaklikach da sankcyjaŭ» (č. 3 art. 361 KK), «abrazie Łukašenki» (č. 1 art. 368 KK), «raspalvańni varožaści» (č. 1 art. 130 KK), «abrazie pradstaŭnika ŭłady» (art. 369), «uvachodžańni ŭ skład ekstremisckaha farmiravańnia» (č. 3 art. 361) i «abrazie sudździ» (art. 369). Prysud — šeść hadoŭ kałonii.
Sudziŭ jaje Siarhiej Kacar, jaki ličycca adnym z samych žorstkich palityčnych sudździaŭ Biełarusi. Jon pracavaŭ pa niekalkich dziasiatkach palityčnych kryminalnych spravaŭ, pa jakich prysudziŭ dziasiatki, kali nie sotni, hadoŭ źniavoleńnia (pa mnohich ź ich prysudy nieviadomyja). I jašče bolšaj kolkaści administratyŭnych — tolki pa viadomych jon prysudziŭ kala 1500 sutak aryštaŭ i bolš za 27 tysiačaŭ rubloŭ štrafaŭ.
Siarhiej Kacar z žonkaj padčas pajezdki ŭ Sankt-Pieciarburh. Fota z sacsietak Kacara
U sakaviku 2024 prajšła apielacyja i prysud Nadziei ŭstupiŭ u siłu. Ciapier jana ŭ homielskaj žanočaj kałonii.
Nieŭzabavie jaje ŭnieśli ŭ śpisak «ekstremistaŭ», a paśla i «terarystaŭ».
Tłumačym, jakim čynam siłaviki znachodziać karystalnikaŭ Telegram i jak hetaha paźbiehnuć