Kursantu MUS pahražaje da 25 hadoŭ kałonii za «zdradu dziaržavie» i «padrychtoŭku da ŭdziełu ŭ vajnie»
Mahčyma, 21-hadovy Illa Naryškin chacieŭ dałučycca da biełaruskich dabraachvotnikaŭ va Ukrainie.
10.07.2024 / 12:00
Illa Naryškin. Fota: «Biełaruś-2»
Illi Naryškinu 21 hod. Rodam jon sa Słonima, ale častku dziacinstva pravioŭ u Hrodnie.
Baćka Illi — ukrainiec, naradziŭsia ŭ Kryvym Rozie. Jon jašče ŭ saviecki čas skončyŭ avijacyjnuju vučelniu, ale pracavaŭ inžynieram-miechanikam u roznych krainach. Z maci chłopca jany vielmi daŭno nie žyvuć razam.
Pa vyšejšuju adukacyju Illa pajšoŭ u Akademiju Ministerstva ŭnutranych spraŭ. Zaraz jon musiŭ by skončyć treci kurs kryminalna-vykanaŭčaha fakulteta.
Viadoma, što ŭ čas vučoby jon žyŭ aktyŭnym žyćciom — vystupaŭ u roznych konkursach i navat udzielničaŭ u intelektualnaj hulni ad telekanała «Biełaruś-2», jakaja nazyvajecca «Vieža». Apošnija publičnyja źviestki pra jaho datujucca sakavikom 2023-ha.
Źviestki Illi Naryškina źjavilisia ŭ raskładzie sudoŭ. A vyśvietlić jaho asobu atrymałasia dziakujučy Digital intelligence team i bazam «Kibierpartyzanaŭ».
Sud nad chłopcam pačynajecca 22 lipienia ŭ Hrodzienskim abłasnym sudzie. Jaho abvinavačvajuć pa dvuch artykułach — «zdrada dziaržavie asobaj, na jakuju raspaŭsiudžvajecca status vajskoŭca» (č. 2 art. 365 KK) i «ŭdzieł u vajnie na terytoryi inšaj dziaržavy, viarboŭka abo padrychtoŭka asobaŭ da takoha ŭdziełu» (č. 1 art. 361-3 KK).
Pa apošnim čaściej za ŭsio sudzili ludziej, jakija vykazvali namier pajechać vajavać na baku Ukrainy, vykazvali anłajn abo afłajn. Niekatoryja z hetych ludziej pierapisvalisia z fejkavymi botami Pałka Kalinoŭskaha, stvoranymi łukašenkaŭskimi śpiecsłužbami.
Sudzić Naryškina budzie Juryj Kazakievič — sudździa, jaki bolš za dziesiać hadoŭ vynosić palityčnyja prysudy. Praŭda, da 2020-ha heta byli administracyjnyja spravy.
Bieraściejcu Jaŭhienu pahražaje da piaci hadoŭ turmy za «ŭdzieł u vajnie»
Try prostyja parady, kab nie natrapić na fejkavyja inicyjatyvy ŭ Telegram
U internecie źniadkul źjaviłasia «Bryhada Kaściuški». Aściarožna, heta moža być pravakacyja