«Можа, мы па-рознаму разумеем слова плато?» Стрыжак пярэчыць Коршунаву
Сацыёлаг Генадзь Коршунаў адзначыў, што палітычныя рэпрэсіі ў Беларусі выйшлі на плато. Кіраўнік фонду «Байсол» Андрэй Стрыжак з ім не пагаджаецца і апісвае плато са «свайго акопа».
04.04.2024 / 17:12
Стрыжак: «»Увесь час сілавікі шукаюць і знаходзяць усё новыя групы, якія можна прыціснуць». Фота: «Наша Ніва»
«Прачытаў аналітыку паважанага Генадзя Коршунава і хаджу засмучаны. Мне падаецца, што мы працуем у нейкай паралельнай рэальнасці, але можа так, бо мы па-рознаму разумеем слова «плато»? — піша ў фэйсбуку Стрыжак.
Ён адзначае, што рэпрэсіі не спыніліся: у дзень адбываецца прыблізна 10 арыштаў па ўсёй краіне.
«Увесь час сілавікі шукаюць і знаходзяць усё новыя групы, якія можна прыціснуць — архітэктары, дыяспара, сваякі палітвязняў. Прыкмета часу — буйнамаштабныя карныя аперацыі, у якіх задзейнічаныя розныя сілавыя структуры па ўсёй краіне. Тут бачна пагаршэнне сітуацыі».
Ён звяртае ўвагу, што лічба прызнаных палітвязняў, на якую арыентаваўся Коршунаў, ва ўмовах дыктатуры і страху цалкам не адлюстроўвае маштаб рэпрэсій.
«Яе дынаміка не адпавядае рэальнай дынаміцы таго, што адбываецца з палітвязнямі ўнутры краіны. Асабліва гэта бачна па тым, што колькасць людзей, якія толькі за мяжой пастфактум гатовыя казаць пра свае палітычныя прысуды, расце», — лічыць Стрыжак.
Да палітычных затрыманняў ён дадае звальненні, выцісканне актыўных людзей за мяжу, распальванне варожасці і ўзрастанне градусу прапаганды.
Стрыжак акрэслівае асноўныя лініі ўдару:
«Значна больш высілкаў лукашысты цяпер ускладаюць на супрацьдзеянне актыўнасцям дыяспары — крыміналка за марафон, крыміналка за Народныя амбасады, серыя правакацый і распальванне літоўска-беларускага канфлікту, вобшукі, арышты і г.д.
Таксама лукашысты спрабуюць абарваць ланцуг салідарнасці і ўзаемадапамогі — прэсінг сваякоў, спроба перарубіць каналы, спробы ачарнення структур дапамогі».
«Вялікая памылка спрабаваць зразумець, што адбываецца з рэпрэсіямі, выключна па лічбах, якія даюць праваабаронцы, — перакананы Стрыжак. — Гэтыя лічбы чым далей, тым больш складана атрымліваць з краіны, якая паступова закрываецца. Страх замінае людзям камунікаваць з праваабаронцамі і даваць ім даныя пра пераслед.
Для разумення агульнай сітуацыі трэба арыентавацца на трэнды і рухі, а яны цяпер адназначныя. Лукашэнка і Пуцін рыхтуюцца да ваеннага супрацьстаяння з краінамі НАТА, і ў логіцы ваеннага супрацьстаяння Беларусь, як галоўны плацдарм агрэсіі, павінная быць зачышчаная ад «варожых элементаў». Гэтую задачу дыктатура актыўна і выконвае».
Чытайце таксама:
Палітычныя рэпрэсіі ў Беларусі выйшлі на плато, і яно будзе захоўвацца — сацыёлаг Коршунаў
51-гадоваму айцішніку з Мінска пагражае да васьмі гадоў калоніі за данаты
Следчы камітэт арыштаваў маёмасць 20 «аналітыкаў Ціханоўскай»
Сілавікі расказалі, як скарысталі ў сваіх інтарэсах сямейную драму
Мінчука арыштавалі за вокліч «Жыве Беларусь» з акна кватэры
У Баранавічах па «народным» артыкуле сёння асудзілі адразу 17 чалавек