Futbalist Arciom Mileŭski raskazaŭ, jak patrapiŭ u komu
Biełaruska-ŭkrainski futbalist Arciom Mileŭski ŭ padkaście «Formuła Vałošyna» ščyra raskazaŭ pra lačeńnie ad ałkahalizmu.
13.03.2024 / 17:27
Arciom Mileŭski. Skryn videa: Voloshyn_xx / YouTube
Arciom Mileŭski zhadvaje, što pad čas prahladu hulni «Reał» (Madryd) — «Unijon» (Bierlin) Lihi čempijonaŭ u vieraśni minułaha hoda jon paabiacaŭ svajmu siabru ŭ vypadku pieramohi «Reału» lehčy ŭ balnicu «prakapacca».
«Reał» vyjhraŭ i Mileŭski pajechaŭ u balnicu. Jak zhadvaje futbalist, pad kropielnicaj jon zasnuŭ. I pračnuŭsia tolki praz šeść dzion. «Ja dumaŭ, što mnie dali snatvornaje i ja praspaŭ, moža, 20-24 hadziny. Ale ja pračnuŭsia ŭvieś u pravadach. Jak potym patłumačyli, ja byŭ u štučnaj komie».
Pieravod u taki stan daktary paźniej patłumačyli tym, što kropielnicy Mileŭskamu nie dapamahli b. Ale taki krok byŭ vialikaj ryzykaj. Daktary skazali, što jamu vielmi paščaściła, bo mała chto sa štučnaj komy vychodzić.
Pa słovach Mileŭskaha, da takoha stanu jaho davioŭ ałkahol. Z pačatkam poŭnamaštabnaha ŭvarvańnia Rasii va Ukrainu ŭ jaho pačałasia depresija, jakaja z kožnym miesiacam rasła. I jon usio bolš piŭ:
«Ja byŭ adzin. Usie zajmalisia svaimi spravami. Było ciažka, ale niejki pracent ałkaholu mianie ratavaŭ. Ja vypivaŭ peŭnuju dozu i zabyvaŭsia ab vajnie. Hram 300 romu ci viski ŭ dzień. Heta praciahvałasia miesiacami <…> Heta ŭsio nazapašvałasia, i miedyki svoječasova ŭmiašalisia».
Paśla vychadu z komy, zhadvaje Mileŭski, jon jašče prabyŭ kala miesiaca ŭ balnicy. Siabroŭka paraiła dobrych psichołahaŭ u reabilitacyjnym centry, dzie Mileŭski prabyŭ amal miesiac.
«Tam dobryja śpiecyjalisty. Kožny dzień prychodzili i razmaŭlali psichołahi. Kožny dzień padvodziŭsia vynik dnia, kali my źbiralisia sa śpiecyjalistami ŭ vialikaj zali. Prytrymlivalisia paradku dnia. U 7 hadzin byŭ padjom, u 8 — śniadanak. Dniom možna było adpačyć. A tak uvieś čas byli ci pracedury, ci śpiecyjalnyja zaniatki.
I tam ja byŭ z chłopcami, u jakich vielmi składanyja historyi <…> Ludzi, jakija pastupali… Ja na ich hladzieŭ, i a***vaŭ, dumaŭ: «Niaŭžo ja siudy takim pryjechaŭ?» — zhadvaje mužčyna i śćviardžaje, što ciapier nie ŭžyvaje ałkaholu.
Mileŭski taksama adznačyŭ, što jaho lačeńnie apłaciŭ prezident kijeŭskaha «Dynama» Ihar Surkis.
Čytajcie jašče:
«Jamu pastupali prapanovy z «Livierpula», Partuhalii». Jak Mileŭski zmarnavaŭ svaju karjeru