«Fatahrafavali ekran, kali łazili pa sacsietkach». Pasažyr raskazaŭ, jak prachodziła pravierka na biełaruska-polskaj miažy
Čytač «Našaj Nivy» raskazaŭ pra vypadak, kali z rejsavaha aŭtobusa na dadatkovuju pravierku adpravili adrazu kala 10 pasažyraŭ.
16.03.2024 / 20:52
Pravierki telefonaŭ na miažy stali ŭžo zvykłaj spravaj. Ilustracyjnaje fota: telehram-kanał BELGRANICA
Pa słovach pasažyra, jaki dniami viartaŭsia z Polščy rejsavym aŭtobusam praz punkt propusku «Brest», na dadatkovuju pravierku vyklikali kala 10 čałaviek. Cikavili biełaruskich siłavikoŭ tolki mužčyny.
«Adnym zahadali prajści dla dadatkovaj pravierki, a inšym skazali prosta čakać. Publika była roznaŭzrostavaja: kali samym maładym chłopcam było kala 20-25, to najstarejšamu mužčynu — kala 60 hadoŭ», — zhadvaje surazmoŭca.
Pa jaho słovach, na pravierku kožnaha sychodziła kala 20-30 chvilin. Praviaralnikaŭ u tym kabiniecie było dvoje.
«Padčas hutarki praviarali źmiest telefonaŭ. Fatahrafavali IMEI-numar pryłady. Praviarali padpiski ŭ telehramie i sacsietkach, prahortvali pierapisku. Časam praviaralnik fatahrafavaŭ ekran, kali łaziŭ pa sacsietkach», — raspaviadaje surazmoŭca.
Mužčyna kaža, što paralelna z pravierkaj siłaviki viaduć nibyta niazmušanuju hutarku. Siarod inšaha pytajucca, navošta jeździŭ u Polšču.
Surazmoŭca adznačaje, što heta pieršy vypadak, kali pry pierasiačeńni miažy da jaho ŭźnikli dadatkovyja pytańni.
«U mianie niama sudzimaściaŭ ci zatrymańniaŭ pa palityčnych artykułach. Jak ja zrazumieŭ, mnohija z dapytanych taksama byli palityčna «čystymi». Časam kiroŭca aŭtobusa sam prosić pieršymi prachodzić kantrol tych, chto raniej byŭ zatrymany pa palityčnych artykułach, kab nie zatrymlivać uvieś aŭtobus».
Mužčyna pryznajecca, što, niahledziačy na toje, što ŭsie pasažyry paśla pravierki viarnulisia ŭ aŭtobus, u ich zastalisia zaściarohi.
«Toj fakt, što jany fatahrafavali IMEI i rabili zdymki padčas prahortvańnia sacsietak, navodzić na dumki, što pravierka na miažy moža mieć nastupstvy paźniej», — ličyć surazmoŭca.
Čytajcie taksama:
Na miažy z Polščaj znoŭ pačali źbiracca vialikija čerhi z aŭtobusaŭ
Z Hrodna ŭ Biełastok — za 43 hadziny. Biełaruski aŭtobus pastaviŭ rekord pa časie na miažy