Mahčymaja pryčyna adyjoznych pastoŭ Miadźviedzieva adnačasova chrestamatyjnaja i aniekdatyčnaja
Žurnalisty The Insider znajšli dziŭnaje padabienstva ŭ časie pamiž datami napisańnia hnieŭnych pastoŭ Dźmitryja Miadźviedzieva i datami pastavak jamu ź Italii elitnaha ałkaholu ŭ abychod sankcyj. Padobnych supadzieńniaŭ naličyłasia jak minimum piać.
09.03.2024 / 20:40
Dźmitryj Miadźviedzieŭ. Fota: Contributor / Getty Images
Novaje rasśledavańnie vydańnia The Insider raskryła mahčymuju pryčynu zališniaj ahresiŭnaści namieśnika staršyni Rady biaśpieki Rasii Dźmitryja Miadźviedzieva ŭ sacsietkach.
Jak vyjaviłasia, adyjoznyja pahrozy Miadźviedzieva «voraham Rasii» i ŭsiamu śvietu dziŭnym čynam źviazanyja z tajemnymi pastaŭkami jamu ałkaholu ź Italii, a mienavita ź italjanskich vinahradnikaŭ samoha Miadźviedzieva, pra jakija ŭpieršyniu zahavaryŭ jašče Alaksiej Navalny ŭ rasśledavańni «Jon vam nie Dzimon» 2017 hoda.
The Insider vyśvietliŭ, što daty jak minimum piaci takich pastavak ź Italii papiaredničali piaci hnieŭnym publikacyjam Miadźviedzieva ŭ telehramie (raźbiežka była ad adnaho da troch dzion u zaležnaści ad vieličyni pastavak).
Pastaŭlałasia i dahetul pastaŭlajecca vino ŭ Rasiju praź sietku pasiarednikaŭ, zarehistravanych u roznych krainach, uklučajučy Kipr i Łatviju, a taksama pry ŭdziele rasijskaha pradprymalnika Ilji Jelisiejeva, blizkaha siabra i byłoha adnakurśnika Miadźviedzieva, jaki pa dakumientach jakraz i vałodaje vinarobčym pradpryjemstvam palityka ŭ Taskanie (Italija).
Jelisiejeŭ i jaho majomaść znachodziacca pad sankcyjami ZŠA, Vialikabrytanii, Kanady, Ukrainy, Novaj Ziełandyi, ale dahetul nie Jeŭrasajuza, što dazvalaje pradprymalniku svabodna kiravać italjanskim pradpryjemstvam Miadźviedzieva i praciahvać pastaŭlać tamu elitnaje vino, adznačaje The Insider.
Daty tajemnych pastavak italjanskaha vina Miadźviedzievu i daty publikacyj adyjoznych pastoŭ u telehramie palityka. Krynica: The Insider
Ilja Jelisiejeŭ, blizki siabar i były adnakurśnik Dźmitryja Miadźviedzieva, jaki kiruje vinarobčym pradpryjemstvam i vinahradnikami palityka ŭ Italii (adtul i iduć pastaŭki vina asabista Miadźviedzievu). Fota: «Kommiersant'»
Žurnalisty The Insider z pryčyny ŭsich hetych dziŭnych supadzieńniaŭ vykazali zdahadku, što ŭniasieńnie Jelisiejeva i vinahradnikaŭ Miadźviedzieva ŭ śpis sankcyj ES mahło b źnizić uzrovień taksičnaści palityka ŭ sacyjalnych sietkach.
Adnak, jak padkreślivaje vydańnie, u Miadźviedzieva jość jašče adno vinarobčaje pradpryjemstva ŭ Krasnadarskim krai, jakaja vyrablaje 150 tysiač butelek vina ŭ hod.
Tamu Miadźviedzieŭ biez ałkahola i ahresiŭnych pastoŭ u telehramie dakładna nie zastaniecca.
Čytajcie taksama:
«Nie Doktar Zło, a Mini My». Što za ŭniforma na Dźmitryi Miadźviedzievie
Ekśpiert patłumačyŭ mety radykalnych vykazvańniaŭ Dźmitryja Miadźviedzieva