Makron u Prazie zaklikaŭ jeŭrapiejcaŭ «nie być bajaźliŭcami»
Taksama prezident Francyi zajaviŭ, što ŭsio skazanaje im na minułym tydni pra adpraŭku kantynhientu va Ukrainu — nie ahavorka.
06.03.2024 / 08:05
Fota: Petr David Josek / AP
Prezident Francyi Emaniuel Makron padčas vizitu ŭ Čechiju 5 sakavika paćvierdziŭ raniej skazanyja słovy ab mahčymaści adpraŭki zachodnich vojskaŭ va Ukrainu i zaklikaŭ jeŭrapiejcaŭ «nie być bajaźliŭcami», piša Radyjo Svaboda.
Pajezdka Makrona ŭ Prahu była pryśviečana hałoŭnym čynam padpisańniu novaj Damovy ab stratehičnym partniorstvie pamiž Francyjaj i Čechijaj na nastupnyja čatyry hady (2024 — 2028).
Pa słovach prezidenta Francyi, pytańni abarony ŭ hetym partniorstvie buduć klučavymi. Abodva baki abmiarkoŭvajuć kulturnaje i dziełavoje supracoŭnictva. U pryvatnaści, havorka idzie ab pabudovie francuzskimi kampanijami jadziernych reaktaraŭ dla dvuch dziejučych AES u Čechii. Francyja aktyŭna łabiruje svaje doŭhaterminovyja intaresy ŭ hetym prajekcie, a za jadziernyja kantrakty z Prahaj zmahajecca i Paŭdniovaja Kareja.
U samym pačatku svajho vizitu Emaniuel Makron niedvuchsensoŭna daŭ zrazumieć, što ŭsio skazanaje im u Jelisiejskim pałacy 26 lutaha (ab mahčymaści adpraŭki vojskaŭ va Ukrainu) — nie ahavorka, a pradumanaja pazicyja.
Źviartajučysia da historyi, francuzski lidar kazaŭ pra Jeŭropu, razarvanuju napałam u minułym stahodździ, kali adna častka Jeŭropy nie žadała bačyć ciažkaściaŭ inšaj častki, u peŭnym sensie addaŭšy los apošniaj tatalitaryzmu. «My dakładna nabližajemsia da momantu ŭ historyi našaj Jeŭropy, kali treba nie być bajaźliŭcam».
Makron, vykazaŭšy škadavańnie tym faktam, što, jak jon vykazaŭsia, «my nikoli nie chočam bačyć budučych dram». Prezident Francyi zajaviŭ, što i ŭ Paryžy, i ŭ Prazie, uśviedamlajuć: «Siły, jakija stali niastrymnymi, z kožnym dniom uzmacniajuć pahrozu napadu na nas, i nam treba być na vyšyni historyi i mužnaści…».
Jeŭrapiejcy nie pavinny naviazvać adzin adnamu nijakich abmiežavańniaŭ u svaim padychodzie da vajny RF suprać Ukrainy, adznačyŭ Makron, vystupajučy na sumiesnaj pres-kanfierencyi z češskim kaleham. Pieter Pavieł skazaŭ, što dałučajecca da prezidenta Francyi i zhodny z tym, što Jeŭropa pavinna adyhrać pieršaradnuju rolu ŭ akazańni dapamohi Ukrainie i ŭ adbićci pahrozy Rasii (…).
Pavieł taksama zajaviŭ, što jon «za pošuk novych varyjantaŭ, uklučajučy debaty ab patencyjnaj prysutnaści va Ukrainie», adnak, «nie pierasiakajučy» čyrvonuju liniju», heta značyć nie raźmiaščajučy «bajavyja častki».
Ministry zamiežnych spraŭ i abarony Francyi ŭ čaćvier, 7 sakavika, praviaduć sa svaimi kalehami ź inšych krain-sajuźnikaŭ videakanfierencyju dla abmierkavańnia novych rašeńniaŭ u padtrymku Ukrainy.
Čytajcie taksama:
Čamu Makron zahavaryŭ pra mahčymaść nakiravać francuzskich vajskoŭcaŭ va Ukrainu?
Čamu Makron raptam zahavaryŭ pra mahčymy ŭvod zachodnich vojskaŭ va Ukrainu
Stołtenbierh abvierhnuŭ adpraŭku vojskaŭ NATA va Ukrainu
Ekśpiert apisaŭ try mahčymyja scenary ŭdziełu sałdat NATA ŭ vajnie va Ukrainie