«Mahura» — ukrainskaja zbroja, jakaja niščyć rasijski fłot
Marskija bieśpiłotniki «Mahura» paśpiachova palujuć na rasijskija katary i karabli. Raskazvajem, jak jany źjavilisia i što saboju ŭjaŭlajuć.
05.03.2024 / 14:50
Magura V5. Fota: U24.gov.ua
U apošnija miesiacy rehularna zjaŭlajucca paviedamleńni ab paśpiachovych atakach USU na rasijskija katary i karabli. 5 sakavika zjaviłasia infarmacyja ab padryvie patrulnaha katara «Siarhiej Kotaŭ». Paviedamlajecca, što napad byŭ ździejśnieny marskimi dronami Magura V5. Karabiel atakavali adrazu kala dziasiatka dronaŭ. Da hetaha 14 lutaha hetyja ž drony źniščyli vialiki rasijski desantny karabiel «Cezar Kunikaŭ».
Magura V5 — ukrainski šmatmetavy nadvodny bieśpiłotny aparat, zdolny vykonvać roznyja zadačy: nazirańnie, raźviedku, patrulavańnie, pošukava-vyratavalnyja apieracyi, supraćminnaje procidziejańnie i inšyja bajavyja zadačy. Jaho daŭžynia składaje piać z pałovaj mietraŭ, karysnaja nahruzka — 320 kiłahramaŭ. Pry hetym jon moža nieści bajavuju nahruzku da 300 kiłahram.
Jak piša «Ukrainskaja praŭda», marskija bieśpiłotniki Magura V5 — raspracoŭka pryvatnaj kampanii, jakaja doŭhi čas ź mierkavańniaŭ biaśpieki nie zjaŭlałasia ŭ publičnaj prastory. Pieršy pratatyp bajavoha aparatu z adzinym kanałam suviazi praz Starlink byŭ stvorany letam 2022 hoda.
Baza dronaŭ Magura V5. Skryn videa RBCUkraine / YouTube
Pieršaja paśpiachovaja ataka adbyłasia ŭ noč na 29 kastryčnika 2022 hoda. Tady byŭ paškodžany fłahman Čarnamorskaha fłotu «Admirał Makaraŭ». A ŭ listapadzie 2022 hoda ŭrad Ukrainy aficyjna zajaviŭ ab raspracoŭcy ŭłasnaha bajavoha nadvodnaha bieśpiłotnika z dalokaściu dziejańnia da 800 km.
Pieršym, chto zacikaviŭsia raspracoŭkaj bieśpiłotnych nadvodnych aparataŭ pryvatnaj kampanii, stała Słužba biaśpieki Ukrainy. Ale pa roznych pryčynach prajekt nie byŭ realizavany. Kampanija-raspracoŭščyk stała pracavać z Hałoŭnym upraŭleńniem raźviedki Ministerstva abarony Ukrainy (HUR MAU). Tady ž i była prydumana nazva bieśpiłotnika — «Mahura», u honar bahini vajny i pieramohi ŭ słavianskaj mifałohii.
Raspracoŭščyki zdoleli ŭdaskanalić sistemu suviazi, pazbaviŭšysia zaležnaści ad Starlink. U sučasnych madelach amal usie funkcyi, źviazanyja z kamunikacyj i kiravańniem, dublujucca. Kali adzin kanał źnikaje, praca praciahvajecca praz paralelny.
Pieršy pośpiech novaj viersii datujecca majem 2023 hoda. Tady bieśpiłotnikam Magura daviałosia pieraadoleć adlehłaść 500 kiłamietraŭ, kab paśpiachova atakavać rasijski raźviedvalny karabiel «Ivan Churs» za 140 kiłamietraŭ ad pralivu Basfor.
U lipieni minułaha hoda bieśpiłotnik upieršyniu byŭ pradstaŭleny na Mižnarodnym kirmašy abaronnaj pramysłovaści ŭ Stambule.
Magura V5 stvaraŭsia jak bieśpiłotnik, jaki zdolny vykonvać roznyja zadačy. Siarod ich — raźviedka i nazirańnie. Jon abstalavany sistemaj aŭtapiłotu, a videapadsistema ŭklučaje načnoje bačańnie. U aŭtanomnym režymie aparat moža znachodzicca da 60 hadzin. Jaho krejsierskaja chutkaść składaje 41 kiłamietr na hadzinu, a maksimalnaja — 80 kiłamietraŭ na hadzinu.
Novyja paśpiachovyja ataki bieśpiłotniki ździejśnili ŭ listapadzie 2023 hoda. Tady jany źniščyli dva desantnyja karabli, jakija byli pryšvartavanyja na bazie VMS Rasii ŭ Čarnamorskim. Nu a pačatak 2024 hoda staŭ sapraŭdnym «zornym časam» dla Magura V5. 1 lutaha — «Ivanaviec», 14 lutaha — «Cezar Kunikaŭ», 5 sakavika — «Siarhiej Kotaŭ».
Jak patłumačyŭ «Ukrainskaj praŭdzie» adzin z členaŭ kamandy raspracoŭščykaŭ Magura, kali raniej hałoŭnaj zadačaj było prosta parazić vajenny karabiel, to ciapier bieśpiłotniki pracujuć u hrupach kolkaściu zvyš 5 adzinak. Heta dazvalaje raźmierkavać roli ŭ hrupie, vyznačyć paradak ataki. Spačatku ŭdar nanosicca pa ruchavikach. Zatym — pa najbolš uražlivych miescach, jakija vyznačajucca ŭ časie płanavańnia misii.
Raspracoŭščyki havorać ab nievialikim košcie bieśpiłotnika, ale nie nazyvajuć kankretnyja ličby. Rasijskija krynicy paviedamlajuć, što kompleks kaštuje kala 273 tysiač dołaraŭ ZŠA.
Pa słovach śpiecyjalistaŭ, bieśpiłotnik jašče całkam nie raskryŭ svaje mahčymaści. U płanach — raźmiaščeńnie na im srodkaŭ supraćpavietranaj abarony i, mahčyma, inšych sistem paražeńnia ŭsich typaŭ celaŭ nie tolki ŭ mory, ale i na ziamli i ŭ pavietry. Raspracoŭščyki abiacajuć zrabić bieśpiłotnik mienš zaŭvažnym, daŭšy jamu mahčymaść na niekatory čas pahružacca ŭ vadu.
Čytajcie jašče:
HUR MA Ukrainy apublikavała videa ataki na vialiki desantny karabiel «Cezar Kunikaŭ»
Minabarony Ukrainy zajaviła, što maje mahčymaść źniščyć Čarnamorski fłot Rasii