Błakavańnie adzinaha dziejnaha hruzavoha pierachodu ź Biełarusi ŭ Polšču tak i nie pačałosia. Prynamsi pakul
Anansavanaja biesprecedentnaja akcyja pratestu kala miažy ź Biełaruśsiu, jakaja pahražała poŭnym pierakryćciem hruzapatoku ź Biełarusi ŭ Polšču, nie pačałasia. Pavodle infarmacyi krynic vydańnia Most u transpartnaj halinie, ranicaj 26 lutaha na aŭtadarozie numar 68 u rajonie Karoščyna znachodzilisia tolki pradstaŭniki palicyi, jakija pavinny byli zabiaśpiečyć bieśpieraškodny ruch hruzaŭ.
26.02.2024 / 21:36
Zdymak ilustracyjny
Surazmoŭca Most nie viedaje, admovilisia inicyjatary akcyi ad jaje praviadzieńnia ŭvohule ci majuć namier pačać jaje ŭ inšy čas (u papiaredniaj zajaŭcy byŭ paznačany pieryjad z 26 lutaha pa 31 sakavika 2024 hoda).
Pierad hetym 23 lutaha stała viadoma, što ŭ administracyju hminy Terespal pastupiła zajaŭka ab praviadzieńni akcyi pratestu, jakaja rabiła amal niemahčymym ruch pa adzinaj darozie, pa jakoj ciapier dastaŭlajucca hruzy pamiž Biełaruśsiu i Polščaj. U adkaz transpartnyja kampanii ź biełaruskim kapitałam padrychtavali kalektyŭny zvarot, u jakim patrabavali nie dapuścić błakavańnia, pakolki heta zabaroniena praviłami darožnaha ruchu.
«U piatnicu (23 lutaha. — Zaŭv. Most), kali my prynosili list u administracyju, nam raskazali, što arhanizatary skazali dazapoŭnić dakumienty da 12.00. Da taho momantu jany hetaha nie zrabili. Ale ŭ kožnym razie ranicaj 26 lutaha da hetaha miesca byli pastaŭlenyja ekipažy palicyi, kab harantavać biaśpieku tranzitu», — raskazaŭ surazmoŭca vydańnia.
Jon nie zmoh pradbačyć dalejšyja dziejańni inicyjataraŭ akcyi, ale vykazaŭ zdahadku, što polskija «dziaržstruktury pakazali, što im niecikava, kab daroha była pierakrytaja». Raniej biełaruskija pieravozčyki adznačali, što błakavańnie tranzitu pryviadzie nie tolki da ich strataŭ «u dziasiatki i sotni miljonaŭ jeŭra», ale i da niedapastupleńnia padatkovych płaciažoŭ u biudžety polskich pamiežnych haradoŭ.
Čytajcie taksama:
Polskija pieravozčyki płanujuć zabłakavać adziny šlach dastaŭki hruzaŭ ź Biełarusi ŭ Polšču
«Pucin, naviadzi paradak». Polski fiermier pryjechaŭ pratestavać na miažu z takoj prośbaj
Polskija fiermiery pierakryli miažu z Ukrainaj i nie prapuskajuć navat pasažyraŭ