Seks, hvałt i ludažerstva. Jak dyktatary šukali sabie paluboŭnic
«Lusterka» raskazvaje pra kiraŭnikoŭ z nieŭtajmavanymi seksualnymi apietytami — i pra haremy, jakija stvaryli niekatoryja z ich.
20.01.2024 / 13:01
Luboŭ Alaksandra Łukašenki da tavarystva maładych dziaŭčat dobra viadomaja. Palityk, jaki farmalna ŭ šlubie, vielmi lubić tancavać z madelami i studentkami, jakich dla jaho vybirajuć padčas kastynhaŭ.
A praca ŭ słužbie pratakoła Łukašenki niaredka robicca dla dziaŭčat ź jaho atačeńnia surjoznym karjernym tramplinam. U vieraśni 2020 hoda madeljer Saša Varłamaŭ śćviardžaŭ, što na zamovu čynoŭnikaŭ byŭ vymušany padbirać dziaŭčat madelnaha vyhladu dla Łukašenki i jahonych siabroŭ u łaźniu. Ale biełaruski palityk nie samotny: vielmi mnohija dyktatary vykarystoŭvali ŭładu, kab atačyć siabie cełymi haremami.
I kali ŭ demakratyčnych krainach navat namiok na niejkuju raspustu lohka moža nanieści ŭdar pa karjery paśpiachovaha palityka, to siarod aŭtakrataŭ takija pavodziny ličacca ledź nie normaj.
Musalini i hvałt nad šmatlikimi kachankami
Italjanski fašyscki dyktatar Bienita Musalini ŭpieršyniu ažaniŭsia jašče na rańnim etapie svajoj palityčnaj karjery, u 1914 hodzie. Jaho abrańnicaj stała ŭładalnica sałona pryhažości z Trenta Ida Dalzier, jakaja dziela kachanaha pradała svoj biznes, a paźniej naradziła jamu syna. Sprabujučy zavajavać Idu, jakaja była starejšaja za jaho na try hady, budučy dyktatar pisaŭ joj žarsnyja luboŭnyja listy.
Bienita Musalini. Fota: Wikimedia Commons
Adnak užo ŭ nastupnym hodzie paśla viasiella jon kinuŭ pieršuju žonku i ažaniŭsia z pryhožaj dziaŭčynaj ź sialanskaj siamji Rakiele Huidzi, jakaja była na dziesiać hadoŭ maładziejšaja za Idu (i jakaja jašče da pieršaha viasiella Musalini paśpieła naradzić jamu pazašlubnuju dačku).
Paśla prychodu da ŭłady ŭ 1922 hodzie Musalini vyrašyŭ, što infarmacyja pra pieršy karotki šlub i pakinutuju im siamju moža pieraškodzić jaho palityčnaj karjery. Fašysckija čynoŭniki pasprabavali źniščyć usie dakumientalnyja ślady hetaha šlubu, ale vypuścili z-pad uvahi daviedku haradskoj rady Miłana, jakaja zahadvała Musalini vypłačvać alimienty «jaho žoncy Idzie Dalzier» i ich dziciaci.
Admoviłasia zamoŭčvać były šlub i sama Ida, praz što fašysckija ŭłady adpravili jaje ŭ psichijatryčnuju balnicu, a potym — u prytułak dla dušeŭna chvorych. Tam jana i pamierła ŭ 1937 hodzie va ŭzroście 57 hadoŭ — nibyta ad krovaźlićcia ŭ mozh. Ahulnaha syna žančyny i dyktatara, jaki taksama nasiŭ imia Bienita, pierad hetym vykrali — i skazali jamu, što jahonaja maci pamierła. Chłopčyku zabaranili raskazvać pra toje, chto byŭ jaho baćkam, i abviaścili, jak i mamu, psichična chvorym.
A ŭ 1942 hodzie va ŭzroście 27 hadoŭ pamior i jon — u prytułku paśla niekalkich injekcyj, jakija vyklikali ŭ jaho komu.
Šlub z Musalini nie prynios ščaścia i druhoj žoncy, jakaja naradziła jamu piaciarych dziaciej. Budučy žanatym, Musalini mieŭ seksualnuju suviaź z sotniami žančyn. Pavodle acenak aŭtara knihi «Duče i jaho žančyny» Rabierta Oła, ahulnaja kolkaść jaho kachanak mahło dachodzić da 400, uklučajučy, mahčyma, i apošniuju karalevu Italii Maryju Žaze Bielhijskuju (na momant ich imaviernaj suviazi jana była jašče pryncesaj).
Prapahanda nie asabliva chavała seksualnuju apantanaść duče. Naadvarot, jana stała častkaj mifa pra Musalini jak pra vialikaha pravadyra. Častkova praz heta da kanca žyćcia italjanski dyktatar pryachvociŭsia da niamieckich tabletak — afradyzijaku pad handlovaj markaj «Charmovin» — «Vijahry» taho času.
Z žančynami padčas seksu jon byŭ vielmi hruby, litaralna źbivajučy ich padčas połavych aktaŭ u svaim kabiniecie. Takija pavodziny byli źviazanyja ź junactvam Musalini, jaki ŭ padletkavym uzroście byŭ zaŭsiodnikam haradskoha bardela ŭ Predapia. Paźniej dyktatar pryznavaŭsia, što dla ŭzbudžeńnia jamu treba było ŭjavić, što žančyna, jakaja dzielić ź im łožak, — prastytutka. Seks u razumieńni Musalini nie adroźnivaŭsia ad zhvałtavańnia. U adnym ź listoŭ jon navat apisvaŭ svaje ździeki z maładzieńkaj dziaŭčyny-cnatliŭki, jakaja, zrešty, pavodle jaho, «dźmułasia niadoŭha» i paśla hetaha jašče try miesiacy sustrakałasia z duče.
Kłara Pietačy, adna z «doŭhačasovych» kachanak Musalini, razam ź jakoj dyktatara pakarali śmierciu ŭ 1945 hodzie italjanskija antyfašysty, pakinuła dziońniki, ź jakich možna mierkavać pra razmach i charaktar seksualnaha žyćcia duče pad staraść. Sama Pietačy, dačka vatykanskaha doktara, paznajomiłasia z 49-hadovym Musalini ŭ 1932 hodzie i stała jaho kachankaj praz čatyry hady. Adnojčy raŭnivaja dziaŭčyna zaśpieła dyktatara za seksam z adnoj z raniejšych kachanak. Apraŭdvajučysia, duče skazaŭ joj, što ideja spać tolki z adnoj žančynaj dla jaho niejmaviernaja. Razhavaryŭšysia, jon raskazaŭ Pietačy, što ŭ jaho žyćci byŭ pieryjad, kali ŭ jaho adnačasova było 14 kachanak: «Ja prymaŭ troch i čatyroch kožny viečar, adnu za adnoj. Heta dapamoža vam zrazumieć maju seksualnaść».
Paćviardžała Pietačy i ahresiju Musalini ŭ seksie: «My kachalisia z takoj siłaj, što, kusajučy mianie za plačo, jon pakinuŭ na im ślady zuboŭ».
Cieły Bienita Musalini (druhoje źleva) i jaho kachanki Kłary Pietačy (u centry), vyviešanyja paśla ich pakarańnia śmierciu na centralnaj płoščy Miłana. 1945 h. Fota: Vincenzo Carrese, Public Domain, commons.wikimedia.org
Pry hetym inicyjatarami sustreč z duče byli, jak praviła, sami žančyny. Paśla prychodu da ŭłady da dyktatara prychodziła mnostva prapanovaŭ sustrecca ad prychilnic. Niekatoryja abrańnicy ź ich liku i traplali na karotkuju adnarazovuju sustreču ź lidaram fašysckaj dziaržavy. Seks ź im zvyčajna doŭžyŭsia nie bolš za piać chvilin — zadavalnieńnie partniorak Musalini nie cikaviła.
«Atrad uciechaŭ» dla Kimaŭ i ich nabližanych
Sa słovaŭ pierabiežčykaŭ z Paŭnočnaj Karei viadoma, što z kanca 1970-ch hadoŭ u KNDR isnuje tak zvany atrad uciechaŭ (pa-karejsku nazva hučyć jak «kipymdžo»). U inšych pierakładach hetaje padraździaleńnie mohuć nazyvać taksama «bryhadaj uciechaŭ» ci «bryhadaj radaści». Pavodle niekatorych śviedčańniaŭ, u siaredzinie 2010-ch hadoŭ «atrad uciechaŭ» składaŭsia z 2000 paŭnočnakarejskich dziaŭčat, padzielenych na try padraździaleńni:
- «hrupa zadavalnieńnia» — dla seksualnych pasłuh;
- «hrupa ščaścia» — dla masažu;
- «hrupa radaści» — dla napaŭaholenych tancaŭ, śpievaŭ i ihry na muzyčnych instrumientach; taksama dziaŭčat z hetaha padraździaleńnia vykarystoŭvajuć jak aficyjantak na roznych mierapryjemstvach.
Pavodle źviestak paŭdniovakarejskaj haziety «Čosan ilbo», štomiesiačnaja zarpłata žančyn, jakija pracujuć u pałacach i rezidencyjach Kimaŭ, składaje kala 2 tysiač dalaraŭ. Kali heta praŭda, to ŭtrymańnie «atrada ŭciechaŭ» moža abychodzicca biudžetu zusim niebahataj Paŭnočnaj Karei nie mienš čym u 4 miljony dalaraŭ za miesiac — ci amal 50 miljonaŭ dalaraŭ za hod.
U momant prychodu da ŭłady Kim Čen Yna ŭ Paŭnočnaj Karei vybirali novych dziaŭčat u hetuju «trupu» — paśla rasfarmavańnia papiaredniaha składu, što zabaŭlaŭ jaho niabožčyka baćku. Pry hetym zvolnienym dziaŭčatam u abmien na klatvu zachoŭvać tajamnicu pra asablivaści svajoj słužby vypłacili vializnyja jak na KNDR vychodnyja dapamohi pa 4 tysiačy dalaraŭ.
Paŭdniovakarejskija ŚMI publikavali zapisanyja sa słovaŭ źbiehłych z Paŭnočnaj Karei hramadzian umovy adboru ŭ «bryhadu radaści». Z časoŭ pieršaha paŭnočnakarejskaha dyktatara Kim Ir Siena ŭ jaje zaličvajuć strojnych dziaŭčat ź miłavidnymi tvarami va ŭzroście ad 14 da 25 hadoŭ rostam nie mienš za 160 santymietraŭ. Zrešty, padčas kiravańnia nastupnaha dyktatara, Kim Čen Ira, praź jahony maleńki rost u «atrad uciechaŭ», naadvarot, nie brali dziaŭčat, vyšejšych za 165 sm. Śćviardžajecca, što ŭsie prachodziać pravierku na cnatlivaść — tych, chto ŭžo mieŭ seksualny dośvied, u bryhadu nie biaruć (nasamreč heta antynavukovy mietad — z dapamohaj miedycynskaha ahladu dziavockaj plavy niemahčyma dakładna vyśvietlić, ci mieła žančyna vahinalny seks).
Kandydatki ŭ «atrad uciechaŭ» musiać taksama demanstravać prychilnaść aficyjnaj ideałohii paŭnočnakarejskaj dziaržavy. Dziaŭčat dla jaho šukajuć pa ŭsioj krainie. I kali niejkuju ź ich ułady pryznajuć hodnaj, jaje traplańnie ŭ hety «harem» pieradvyznačanaje: svajaki navat nie navažvajucca vykazvać svaju niezadavolenaść hetym. Samich dziaŭčat pry hetym mohuć padmanvać, abiacajučy im hodnuju pracu i dapamohu va ŭstupleńni ŭ Pracoŭnuju partyju Karei.
U 1999 hodzie z KNDR uciakła Kim Son Chi, jakaja śćviardžała, što słužyła ŭ «atradzie ŭciechaŭ». Talenavitaja i pryvabnaja dziaŭčyna ŭžo ŭ 15 hadoŭ pastupiła ŭ Pchieńjanski univiersitet mastactvaŭ, dzie źbirałasia stać aktorkaj. Ale ŭ 18 hadoŭ jaje vybrali ŭ atrad, dzie jana faktyčna vykonvała funkcyi seksualnaj rabyni. Pavodle jaje słovaŭ, dziaŭčat tam prymušajuć da seksu ź ciapierašnim lidaram KNDR i jaho nabližanymi, a ŭ vypadku ciažarnaści prymušajuć rabić abort.
Jak śćviardžała Kim Son Chi, paśla dasiahnieńnia 25-hadovaha ŭzrostu dziaŭčat z «atrada ŭciechaŭ» časta siłkom vydajuć za jakoha-niebudź čynoŭnika. Padčas słužby karejankam, jakija trapili ŭ bryhadu, zabaraniajuć mieć znosiny ź ich siemjami. A niekatorym pa kapryzie dyktatara mohuć aficyjna źmianić niemiłahučnaje na jaho dumku imia.
Vielmi padobnuju historyju ŭ 2010 hodzie raskazała žurnalistam jašče adna dziaŭčyna, jakaja ŭciakła z KNDR, — Mi Chian. Heta dazvalaje śćviardžać, što apoviedy pra «atrady ŭciechaŭ» — nie prosta vydumki abo pierabolšańni źbiehłych paŭnočnakarejskich hramadzian, zaklikanyja abudzić spačuvańnie ŭ słuchačoŭ.
U 2001 hodzie z Paŭnočnaj Karei źbieh japoniec Kendzi Fudzimota, asabisty kuchar Kim Čen Ira — baćki ciapierašniaha kiraŭnika KNDR Kim Čen Yna. Fudzimota 13 hadoŭ za piać tysiač dalaraŭ na miesiac hatavaŭ Kimam sušy — a ŭ pramiežkach pamiž hetym naziraŭ za ich ładam žyćcia. Paśla ŭciokaŭ z krainy jon padzialiŭsia svaimi nazirańniami na staronkach knihi «Kuchar Kim Čen Ira». Pavodle japonca, bankiety z udziełam Kim Čen Ira časta pierarastali ŭ sapraŭdnyja papojki i orhii. Tak, na adnym ź ich dyktatar zahadaŭ dziaŭčatam, jakija absłuhoŭvali mierapryjemstva, raździecca i halakom tancavać z apranutymi ŭ hłuchija frenčy aparatčykami.
Nie budzie lišnim zhadać, što ciapierašni paŭnočnakarejski dyktatar Kim Čen Yn žanaty. U aficyjnych šlubach u pieryjad znachodžańnia va ŭładzie byli i jaho baćka ź dziedam.
19 žonak impieratara-ludajeda Bakasy
Prezident Centralnaafrykanskaj Respubliki (CAR), a potym impieratar Centralnaafrykanskaj impieryi Žan Biedel Bakasa I, jaki kiravaŭ u 1966−1976 hadach, bolš za ŭsio viadomy čutkami pra svoj kanibalizm.
Impieratar Bakasa I i adna ź jaho žonak, impieratryca Kaciaryna Marcina Danhjade na biasiedzie z nahody karanacyi, 1976 hod. Fota: CC BY-SA 4.0, commons.wikimedia.org
Saviecki miedyk i ministr Jaŭhien Čazaŭ u svaich uspaminach raskazaŭ, jak sajuźnik Kramla Bakasa padčas lačeńnia ŭ SSSR palubiŭ ruskuju kuchniu i paśla vyzdaraŭleńnia paprasiŭ adpravić da jaho miascovaha kuchara. A toj znajšoŭ u prezidenckaj ladoŭni čałaviečaje miasa — i ŭ žachu ŭciok u ambasadu. Padčas svajoj karanacyi Bakasa žorstka pažartavaŭ z francuzskaha ambasadara, jakomu skazaŭ: «Napeŭna, vy navat nie zaŭvažyli, ale vy jeli čałaviečaje miasa». Viadoma taksama, što svaich vorahaŭ lidar CAR skormlivaŭ ilvam i krakadziłam.
Nie mienš šakavalnym było i siamiejnaje žyćcio Bakasy. U centralnaafrykanskaha prezidenta-impieratara byŭ ceły harem z 19 žonak, jakija naradzili jamu kala sotni spadčyńnikaŭ. Dyktatar hvałtoŭna zabiraŭ svaich budučych niaviest ź ich siemjaŭ, a samych niepakorlivych da viasiella trymaŭ u turmie. Niekatoryja žonki Bakasy sprabavali skončyć žyćcio samahubstvam abo źbiehčy z pałaca.
U takim ža duchu Bakasa vychoŭvaŭ i svaich šmatlikich synoŭ. Paśla dasiahnieńnia 12 hadoŭ kožny ź ich atrymlivaŭ u padarunak daśviedčanuju nałožnicu. Pavodle praviłaŭ Bakasy, ni adna žančyna ŭ jaho pałacy, akramia žonki francuzskaha ambasadara, nie mahła admović lubomu z «pryncaŭ» u seksie.
Niebiaśpiečnyja suviazi ź Idzi Aminam
Jašče adzin ekstravahantny afrykanski dyktatar, kiraŭnik Uhandy Idzi Amin, abviaściŭ siabie navat nie miascovym impierataram, a karalom Šatłandyi. Heta adbyłosia paśla taho, jak praz zakryćcio ambasady Vialikabrytanii ŭ svajoj krainie Amin abviaściŭ Złučanamu Karaleŭstvu vajnu, a potym zajaviŭ pra svaju pieramohu nad im.
Poŭny tytuł Idzi Amina jak lidara Uhandy hučaŭ tak: «Jaho vialmožnaść, pažyćciovy prezident, fieldmaršał Al-Chadžy doktar Idzi Amin Dada, kavaler Kryža Viktoryi, ordena «Za vybitnyja zasłuhi» i Vajskovaha kryža, uładar usich źviaroŭ na ziamli i ryb u mory, zavajoŭnik Brytanskaj impieryi ŭ Afrycy ŭ cełym i va Uhandzie ŭ pryvatnaści». Adzin z samych žorstkich dyktataraŭ u historyi, Amin kiravaŭ Uhandaj z 1971 da 1979 hoda.
Jak raskazvaje ŭ svajoj knizie «Kryvavaja dziaržava» były ministr achovy zdaroŭja Uhandy Hienry Kijemba, u Idzi Amina było 5 aficyjnych žonak i kala 30 kachanak — i bolš za 30 dziaciej ad usich ich. Ź pieršymi tryma žonkami dyktatar raźvioŭsia ŭ 1974 hodzie, paśla viasiella z čaćviortaj — tancorkaj Miedynaj.
Farmalnyja pryčyny razvodu byli absurdnymi. Dźviuch žonak, Maljamu i Noru, jon abvinavaciŭ u nieprystojnym dla svajakoŭ prezidenta viadzieńni biznesu — pry tym, što za hod da hetaha jon sam padaryŭ im kramy tkanin padčas vyhnańnia z Uhandy azijataŭ i pieradziełu ich ułasnaści. A z treciaj žonkaj, Kiej, Amin farmalna raźvioŭsia praz toje, što jana była jaho stryječnaj siastroj: nibyta dyktatara zavalili skarhami na toje, što ich svajactva zanadta blizkaje. Sapraŭdnaj ža pryčynaj razvodu stała raspusta samoha Amina, praź jakuju jon pierastaŭ mieć znosiny sa svaimi pieršymi žonkami. Sumujučy ad žyćcia ŭ amal poŭnaj izalacyi, jany zaviali kachankaŭ — a Kiej navat zaciažarała.
Nieŭzabavie paśla razvodu ciažarnuju Kiej zabili — chutčej za ŭsio, na zahad Amina. A na Maljamu ździejśnili niaŭdały zamach, paśla jakoha taja zdoleła źbiehčy ŭ Vialikabrytaniju.
Piataj žonkaj Amina stała jašče adna tancorka, Sara. Jana trapiła ŭ pole zroku dyktatara, kali joj było 18 hadoŭ. Dziaŭčyna sustrakałasia ź inšym mužčynam i zaciažarała ad jaho. Na zahad Amina Saru adpravili naradžać u elitnuju balnicu, a narodžanaje dzicia prezident aficyjna abviaściŭ svaim. Pry hetym Sara viarnułasia ŭ dom svajho maładoha čałavieka, ale jaje rehularna vazili adtul u rezidencyju Amina. Adnak u krasaviku 1975 hoda chłopiec nie vytrymaŭ hetych ździekaŭ — paśla čaho nazaŭždy źnik. U žniŭni taho ž hoda dziaŭčyna vyjšła zamuž za čałavieka, jaki, chutčej za ŭsio, addaŭ zahad zabić sapraŭdnaha baćku jaje dziciaci.
Idzi Amin, jak i mnohija inšyja dyktatary, byŭ absalutna nieŭtajmavanym u seksualnym žyćci. Siarod troch dziasiatkaŭ jaho kachanak kala dziesiaci byli ŭ statusie «nieaficyjnych» žonak — u tym liku dźvie jaho asabistyja sakratarki. Adna ź ich naradziła Aminu dvajniat, jakich jon pryznaŭ svaimi dziećmi, — ale potym trapiła ŭ niałasku, bo piarečyła suprać biazładnych amurnych pryhod dyktatara. Jak śćviardžaŭ Kijemba, Amin mieŭ luboŭnyja suviazi ź dziasiatkami žančyn usich rasaŭ i mnohich nacyjanalnaściaŭ: ad školnic da stałych žančyn, ad dziaŭčat z vulic da vykładčyc univiersitetaŭ.
«Harem» i «hvardyja amazonak» Kadafi
U 2014 hodzie francuzskaja žurnalistka Anik Kažan raskazała ŭ svajoj knizie «Nałožnicy: Harem Kadafi» pra sotni livijskich dziaŭčat, jakich z kapryzu kiraŭnika krainy Muamara Kadafi vykradali ź siemjaŭ, hvałtavali i hadami trymali ŭ seksualnym rabstvie.
U krainie, ź jaje słovaŭ, była stvoranaja cełaja sietka dla zabiaśpiečańnia dyktatara dziaŭčatami dla jaho štodzionnych «patrebaŭ». U hetym «palavańni» byli zamiašanyja dypłamaty, vajskoŭcy, ciełaachoŭniki, rabotniki administracyi dyktatara i słužby pratakołu. U niekatorych vypadkach dziaŭčat ci, chutčej, dziaŭčynak, Kadafi ŭ svoj «harem» adbiraŭ sam — jak, naprykład, 15-hadovuju Saraju, jakuju ŭ jaje škole vybrali dla taho, kab uručyć bukiet kvietak dyktataru padčas jaho vizitu.
Zrešty, vałodańnia «haremam» z sotniaŭ junych dziaŭčat livijskamu dyktataru było mała. U pačatku 1980-ch hadoŭ Kadafi daručyŭ svaju achovu hrupie žančyn-ciełaachoŭnic madelnaha vyhladu. Farmalna heta tłumačyłasia tym, što patencyjnamu ŭdzielniku zamachu — arabu — u siłu kulturnych i relihijnych mierkavańniaŭ było b składana adkryć ahoń pa žančynach. Adnak vierahodniej za ŭsio taki vybar achovy staŭ prosta vynikam lubovi dyktatara da atačeńnia siabie maładymi žančynami. Atrad ciełaachoŭnic, viadomy jak «manaški revalucyi» abo «hvardyja amazonak», supravadžaŭ Kadafi padčas zamiežnych pajezdak. Naprykład, Francyju ŭ 2007 hodzie jon naviedaŭ u tavarystvie 30 dziaŭčat u vajskovaj formie.
Dla navučańnia madelaŭ-bodzihardaŭ u Livii navat była stvoranaja śpiecyjalnaja škoła. Vypusknicy hetaj navučalnaj ustanovy dla traplańnia ŭ asabistuju hvardyju dyktatara musili nie tolki navučycca abychodžańniu sa zbrojaj i avałodać bajavymi mastactvami, ale i zachavać cnatlivaść.
Seksualny hihant «Vostrava svabody»
Kubinski dyktatar Fidel Kastra byŭ u rozny čas žanaty ź dźviuma žančynami, ad jakich mieŭ šaściarych dziaciej. Akramia taho, u lidara Kuby było nie mienš za čaćviora pazašlubnych dziaciej ad roznych žančyn.
Adnak hetyja ličby nie dajuć navat prybliznaha ŭjaŭleńnia pra seksualnyja apietyty kamandante, jaki na słovach byŭ uzoram askietyzmu i ścipłaści, śćviardžajučy, naprykład, što žyvie ŭ rybackaj chacinie na 900 piesa (43 dalary) za miesiac. Pavodle padlikaŭ žurnalistaŭ, za svajo žyćcio jon moh pieraspać prykładna z 35 tysiačami žančyn. Jak raskazała krynica z atačeńnia dyktatara, ciaham dnia Fidel zajmaŭsia seksam nie mienš čym ź dźviuma roznymi žančynami, a jaho achoŭniki litaralna hojsali pa plažach Havany ŭ pošukach novych abjektaŭ žarści dla svajho šefa.
Były achoŭnik Kastra Chuan Rejnalda Sančes pryśviaciŭ amurnym pryhodam kubinskaha lidara značnuju častku svajoj knihi «Padvojnaje žyćcio Fidela Kastra: maje 17 hadoŭ u jakaści ciełaachoŭnika vialikaha lidara». Pavodle jaho, dyktatar zdradžvaŭ svajoj pieršaj žoncy Mircie Dyjas-Bałart z zamužniaj pryhažuniaj Natallaj Revuełtaj, jakaja naradziła jamu adzinuju dačku (usie astatnija viadomyja dzieci Kastra mužčynskaha połu). A druhoj žoncy lidar kubinskaj revalucyi zdradziŭ, spakusiŭšy asabistuju sakratarku Sieliju Sančes. Taksama Kastra pieraspaŭ sa svaimi pierakładčycami z anhlijskaj i francuzskaj, ściuardesaj, jakaja supravadžała jaho ŭ zamiežnych pajezdkach, i mnohimi inšymi žančynami.
«Harem» i opium Nijazava
Jak śćviardžaje były staršynia Centrabanka Turkmienistana Chudajbierdy Arazaŭ, «harem» pieršaha prezidenta Turkmienistana Saparmurata Nijazava adnamomantna naličvaŭ ad 500 da 1000 junych turkmienskich dziaŭčat. A ŭsiaho praź jaho paśpieli prajści tysiačy dziaŭčat 15−16 hadoŭ. Jak śćviardžaŭ eks-čynoŭnik, Turkmienbašy ŭ pieryjad svajho znachodžańnia va ŭładzie isnavańnia harema asabliva nie chavaŭ: «Ja asabista bačyŭ, jak Turkmienbašy vioŭ pasiedžańni ŭrada, ležučy ŭ atačeńni małaletak, jakich jon, nie saromiejučysia prysutnych, hładziŭ pa strojnych nožkach».
A ŭ 1994 hodzie dyktatar u hutarcy z rasijskim skulptaram Ernstam Nieiźviesnym raschvalvaŭ narkotyk opium jak srodak umacavańnia «mužčynskaj siły».
Čytajcie taksama:
Jak skłalisia losy byłych kiraŭnikoŭ KDB
Jany viernucca! Jak vyhnańniki ŭznačalili palityku postkamunistyčnaj Jeŭropy
Kim Čen Yn buduje kurort «typu Ibicy». Za valutu — luby kapryz