Hramadstva1313

Jak skłalisia losy byłych kiraŭnikoŭ KDB

Pa atrymańni Biełaruśsiu niezaležnaści staršyniami KDB pabyli 10 słužboŭcaŭ. Paśla zvalnieńnia adny byłyja čekisty znachodzili pracu ŭ Maskvie, inšyja, choć i byli ŭ apale, jechali pasłami. Ale byvali i inšyja pavaroty.

Eduard Šyrkoŭski

Staršyniavaŭ u KDB z 1990 pa 1994 hady. Byŭ kiraŭnikom KDB BSSR i zachavaŭ pasadu ŭ niezaležnaj Biełarusi.

25 studzienia 1994 hoda čekista ŭ zvańni hienierał-pałkoŭnika Viarchoŭny saviet adpraviŭ u adstaŭku.

Nahodaj stała vydača Litvie kiraŭnikoŭ tamtejšaj kampartyi Mikołasa Burakavičusa i Juozasa Jermałavičusa, jakich na radzimie abvinavačvali ŭ sprobie dziaržaŭnaha pieravarotu ŭ studzieni 1991 hoda. Kamunisty pierabyvali ŭ Biełarusi nielehalna.

Parłamienckaja bolšaść uhledzieła ŭ aryšcie litoŭskich kamunistaŭ parušeńnie zakona i ŭ hetym źvinavaciła Šyrkoŭskaha i ministra ŭnutranych spravaŭ Uładzimira Jahorava. Abodva zastalisia biez pracy.

Eduard Šyrkoŭski. Archiŭnaje fota

Pavodle słoŭ deputata Viarchoŭnaha savieta 12 sklikańnia Siarhieja Navumčyka, ź siłavikami tak pastupili, bo raniej jany abvinavacili kiraŭnika ŭradu Viačasłava Kiebiča i jahonaha bližejšaha paplečnika dziaržsakratara Hienadzia Daniłava ŭ niekanstytucyjnych dziejańniach: stvareńni niepadkantrolnych parłamientu struktur.

61-hadovy Eduard Šyrkoŭski 31 sakavika 1994 hoda vyjšaŭ na piensiju. U dastupnych krynicach niama źviestak, čym zajmaŭsia adstaŭny hienierał KDB.

Pamior Šyrkoŭski ŭ 2002 hodzie ŭ Maskvie. Pachavany na tamtejšych Trajekuraŭskich mohiłkach.

Hienadź Łavicki

Łavicki ŭznačalvaŭ KDB 5 miesiacaŭ: z 22 lutaha pa 23 lipienia 1994 hoda.

U krasaviku 1994 hoda kiraŭnik uradu Viačasłaŭ Kiebič padpisaŭ ukaz ab prysvajeńni jamu zvańnia hienierał-lejtenanta.

U adstaŭku siłavik syšoŭ paśla taho, jak Kiebič, jakoha jon padtrymlivaŭ, prajhraŭ na prezidenckich vybarach Łukašenku.

Hienadź Łavicki. Fota: bis.nlb.by

U 1995 hodzie Łavicki pryniaŭ prapanovu Łukašenki stać pasłom Biełarusi ŭ Izraili.

U vieraśni 2003 hoda Łavicki byŭ adklikany ŭ Minsk praz dypłamatyčny kryzis pamiž dźviuma krainami, a praź niekalki miesiacaŭ jaho kančatkova adchilili ad pasady ambasadara ŭ Tel-Avivie. Na toj čas jamu było 62 hady.

Pamior Łavicki paśla ciažkaj chvaroby 18 vieraśnia 2013 hoda. Jamu byŭ 71 hod.

Uładzimir Jahoraŭ

Staršyniavaŭ u KDB z 28 lipienia 1994 hoda pa 20 śniežnia 1995 hoda.

Kiraŭnikom viedamstva Łukašenka pryznačyŭ Jahorava praz paŭhoda, jak Viarchoŭny saviet adpraviŭ taho ŭ adstaŭku z pasady ministra ŭnutranych spraŭ.

«Łukašenka asabista prapanavaŭ mnie ŭznačalić KDB, — zhadvaŭ Jahoraŭ. — Što cikava: tyja ludzi ŭ Viarchoŭnym Saviecie, jakija mianie zdymali z pasady ministra ŭnutranych spravaŭ, biez pytańniaŭ zaćvierdzili na pasadzie staršyni KDB».

Uładzimir Jahoraŭ. Fota: kp.ru

Vychadziec z Čerykaŭskaha rajona Mahiloŭskaj vobłaści ŭ siamji havaryŭ pa-biełarusku. U jaho chacie visieła «Pahonia».

Pracoŭnuju dziejnaść Jahoraŭ pačaŭ z dyrektarstva ŭ Čerykaŭskim domie kultury. Padčas prezidenckich vybaraŭ 1994 hoda byŭ davieranaj asobaju Stanisłava Šuškieviča.

Były deputat Viarchoŭnaha savieta Siarhiej Navumčyk zhadvaŭ, što Jahoraŭ nie prymaŭ represiŭnych mieraŭ i byŭ schilny da kampramisaŭ. Praca ŭ KDB jamu nie padabałasia.

U adstaŭku ž syšoŭ, bo ŭ 1995-m navažyŭsia bałatavacca ŭ Viarchoŭny saviet.

Deputatam Viarchoŭnaha savieta 13 sklikańnia Jahoraŭ byŭ z 1995 pa 1996 hady.

Paśla refierendumu 1996 hoda Łukašenka padpisaŭ zakon «Ab spynieńni paŭnamoctvaŭ Viarchoŭnaha savieta trynaccataha sklikańnia». Z deputataŭ, łajalnych Łukašenku, była sfarmavanaja Pałata pradstaŭnikoŭ.

Siarod deputataŭ Pałaty pradstaŭnikoŭ byŭ i Uładzimir Jahoraŭ. Da 2000 hoda jon staršyniavaŭ tam u kamisii pa nacyjanalnaj biaśpiecy.

U dalejšym vyjšaŭ na piensiju. Pieranios niekalki apieracyj na sercy.

Hienierał-pałkoŭnik Uładzimir Jahoraŭ pamior 5 kastryčnika 2016 hoda ad pieraniesienaha insultu. Jamu było 76 hadoŭ. Pachavany na Uschodnich mohiłkach Minska.

Uładzimir Mackievič

Staršynia KDB z 20 śniežnia 1995 hoda pa 27 listapada 2000 hoda.

Piać hadoŭ staršyniavańnia Mackieviča ŭ KDB — heta čas stanaŭleńnia dyktatarskaha režymu Łukašenki. Na jaho prypadajuć vykradańni palitykaŭ, masavyja pratesty suprać intehracyi Biełarusi z Rasijaj.

Uładzimir Mackievič. Fota: bis.nlb.by

Hienierał-lejtenant Mackievič syšoŭ z KDB paśla taho, jak razam z hienprakuroram Aleham Bažełkam sankcyjanavaŭ zatrymańnie kiraŭnika śpiecnaza Dźmitryja Paŭličenki pa spravie źnikłych palitykaŭ.

Mackievič i Bažełka prychodzili da Alaksandra Łukašenki z prapanovaj aryštavać dziaržsakratara Rady Biaśpieki Viktara Šejmana, jaki daručyŭ kamandujučamu ŭnutranymi vojskami (u budučym ministru ŭnutranych spraŭ) Juryju Sivakovu sfarmavać kamandu dla vykanańnia śpiecyjalnych zadańniaŭ.

Pa adstaŭcy Uładzimir Mackievič da 3 studzienia 2008 hoda znachodziŭsia na dypłamatyčnaj słužbie.

Byŭ pasłom Biełarusi ŭ Juhasłavii (z 2001) i pa sumiaščalnictvie ŭ Bośnii i Hiercahavinie (z 2002).

U 2008 hodzie były kiraŭnik KDB viarnuŭsia ŭ Biełaruś, ale, nie znajšoŭšy hodnaha dla siabie zaniatku, źjechaŭ u Rasiju.

U Rasii pracavaŭ daradcam u kampanii «Savkamfłot», jakaja śpiecyjalizujecca na dastaŭcy naftapraduktaŭ pa mory.

Mackievič pieranios ankałahičnaje zachvorvańnie, jamu rabili apieracyju ŭ Hiermanii. Rehularna jeździŭ tudy na abśledavańnie.

U 2015 hodzie viarnuŭsia ŭ Biełaruś. Rabiŭ daradcam u kampanii «Hazpromnafta».

Leanid Jeryn

Staršynia KDB z 27 listapada 2000 hoda pa 18 listapada 2004 hoda.

Jeryn kiravaŭ viedamstvam, kali ŭ Biełarusi prachodzili try elektaralnyja kampanii, jakija supravadžalisia masavymi pratestami. 

U 2001 hodzie — adbylisia prezidenckija vybary, a ŭ 2004-m — razam z vybarami ŭ Pałatu pradstaŭnikoŭ pravodziŭsia inicyjavany Łukašenkam treci refierendum.

Pa jaho vynikach była źmienienaja kanstytucyjnaja norma, jakaja abmiažoŭvała prezidenckija paŭnamoctvy dvuma terminami. Łukašenka atrymaŭ mahčymaść bałatavacca na pasadu prezidenta kolki zaŭhodna razoŭ.

Leanid Jeryn. Fota: hvali.by

Jeryn byŭ pieršym na toj čas kiraŭnikom biełaruskaha KDB, jaki vinavaciŭ zamiežnyja siły ŭ pravakacyjach padčas praviadzieńnia vybarčych kampanijach. Jon ža zajaŭlaŭ, što KDB maje namier uzmacnić kantrol za internetam.

Jerynu razam z Łukašenkam byŭ zabaronieny ŭjezd u ZŠA.

Staršynia KDB dazvalaŭ sabie niesankcyjanavanyja Łukašenkam publičnyja volnaści.

19 kastryčnika 2004 hoda jon vyjšaŭ da pratestoŭcaŭ i navat zaprasiŭ kiraŭnika «Maładoha frontu» Paŭła Sieviarynca i žurnalistaŭ parazmaŭlać u słužbovy kabiniet.

Padčas hutarki Jeryn skazaŭ, što «pryjdzie čas i ŭsie daviedajucca praŭdu».

20 kastryčnika Łukašenka adpraviŭ kiraŭnika śpiecsłužby ŭ vodpusk, a praź miesiac u adstaŭku.

U 2005 hodzie hienierał-lejtenant Leanid Jeryn znajšoŭ pracu ŭ Maskvie. Jaho ŭziali daradcam hienieralnaha dyrektara Rasijskaj čyhunki pa transpartnaj biaśpiecy.

U 2008 hodzie jon staŭ kiraŭnikom rasijskaj častki sumiesnaha Arhanizacyjnaha kamiteta Rasijskaj i Indyjskaj čyhunak.

U 2019 hodzie 67-hadovy były kiraŭnik biełaruskaha KDB uvachodziŭ u praŭleńnie fondu «Transpartnaja biaśpieka» i ŭznačalvaŭ upraŭleńnie pa abaronie piersanalnych danych Rasijskaj čyhunki.

Ściapan Sucharenka

Staršynia KDB z 20 studzienia 2005 hoda pa 17 lipienia 2007 hoda.

Sucharenka prasłaviŭsia hučnymi zajavami ab padrychtoŭcy apazicyjaj bajevikoŭ, jakija buduć udzielničać u masavych biesparadkach i navat pravodzić terakty.

Sapraŭdnym miemam ad kiraŭnika śpiecsłužby stali słovy, što apanienty Łukašenki płanavali atrucić vodapravod u Minsku pry dapamozie dochłych pacukoŭ.

Ściapan Sucharenka. Fota: biathlon.by

U 2006 hodzie na Kastryčnickaj płoščy ŭ Minsku byŭ razhornuty łahier niazhodnych z aficyjnymi vynikami prezidenckich vybaraŭ. Hetaja akcyja pratestu atrymała nazvu «Płošča-2006». Namiotavaje miastečka zastavałasia na płoščy z 19 pa 23 sakavika. Udzielniki pratestu, jakija nie paśpieli pakinuć płošču, byli zatrymanyja.

25 sakavika byŭ zatrymany pretendent na prezidenctva Alaksandr Kazulin, jaki vioŭ kałonu da izalatara na Akreścina. Paźniej palityka asudzili da 5,5 hoda kałonii ahulnaha režymu za «złosnaje chulihanstva». Jon byŭ vyzvaleny ŭ 2008 hodzie.

U 2007-m Łukašenka zvolniŭ Sucharenku za toje, što toj «sprabavaŭ pieraśledavać u ekanomicy ŭłasnyja intaresy».

Aficyjna Sucharenku i jaho pieršaha namieśnika Vasila Dziemiancieja adpravili ŭ adstaŭku «ŭ suviazi ź pierachodam na inšuju rabotu».

Byli paviedamleńni, što siłaviki trapili na Vaładarku. Sucharenka heta abviarhaŭ i zajaŭlaŭ, što adpačyvaŭ u baćkoŭskim domie za 200 kiłamietraŭ ad stalicy.

U 2008 hodzie Sucharenku Łukašenka adpraviŭ pasłom u Armieniju. Tam jon prabyŭ da 2015 hoda.

U 2017-m žurnalisty daviedalisia, što eks-kiraŭnik KDB pracuje načalnikam upraŭleńnia biaśpieki i abarony infarmacyi Banka raźvićcia. Uletku nastupnaha hoda jon zvolniŭsia.

U 2018 hodzie siamja Sucharenki zdavała katedž u Drazdach za 3500 dalaraŭ u miesiac.

Čym ciapier zajmajecca 66-hadovy hienierał-lejtenant Sucharenka, nieviadoma.

Juryj Žadobin

Staršynia KDB z 17 lipienia 2007 hoda pa 15 lipienia 2008 hoda.

Tankist Žadobin da pryznačeńnia ŭ KDB uznačalvaŭ słužbu achovy Łukašenki. U čekisckaje viedamstva jaho adpravili, kab navioŭ paradak.

Jon patrabavaŭ ad padnačalenych, kab na słužbu prychodzili ŭ formie, šychtavaŭ ich na płacu i začytvaŭ zahady.

Žadobin aŭtar słavutaj frazy pra «destruktyŭnyja elemienty».

«U tak zvanuju supolnaść destruktyŭnych elemientaŭ, — kazaŭ jon, — uvachodzić usiaho 1767 asobaŭ. My ich usich viedajem pajmienna, i ich nie robicca ni bolš, ni mienš».

Miem ad Žadobina apazicyja vykarystała na značkach «Adzin z 1767».

Juryj Žadobin. Fota: mil.by

Paśla KDB Žadobina pastavili kiravać Radaj biaśpieki zamiest Viktara Šejmana, jaki trapiŭ u apału paśla teraktu 2008 hoda.

Dziaržsakratarom u Radzie biaśpieki były kiraŭnik KDB prabyŭ bolš za hod. Paśla krytyki Łukašenka pryznačyŭ jaho ministram abarony.

Abaronnym viedamstvam Žadobin kiravaŭ z 2009 pa 2014 hod.

Zatym u 60 hadoŭ u zvańni hienierał-lejtenanta byŭ zvolnieny ŭ zapas pa ŭzroście.

Žadobin na piensii. Žyvie ŭ Minsku.

Vadzim Zajcaŭ

Staršynia KDB z 15 lipienia 2008 hoda pa 9 listapada 2012 hoda.

Zajcaŭ atrymaŭ kiroŭnuju pasadu ŭ KDB paśla teraktu la steły «Minsk — horad-hieroj» u 2008 hodzie.

Na 4,5 hoda staršynavańnia Zajcava ŭ viedamstvie prypali libieralizacyja, prezidenckija vybary, jakija skončylisia brutalnym razhonam Płoščy-2010 i aryštam kandydataŭ u prezidenty.

Pa słovach adnaho ź ich, Andreja Sańnikava, hienierał Zajcaŭ jaho dapytvaŭ asabista. Zapałochvaŭ, što raspravicca ź im, jaho žonkaj i małaletnim synam.

U 2011 hodzie adbyŭsia terakt u minskim mietro.

Vadzim Zajcaŭ. Fota: telegraf.by

Za čas kiraŭnictva KDB Zajcavym byli skandały, źviazanyja z supraćstajańniem jaho viedamstva z roznymi inšymi siłavymi słužbami.

Zajcava nazyvali «łancuhovym sabakam režymu», charaktaryzavali jak žorstkaha i chitraha słužboŭcu. Jon siabravaŭ sa starejšym synam Łukašenki — Viktaram.

Zajcava adpravili ŭ adstaŭku 9 listapada 2012 hoda.

Da jaje pryviało samahubstva padpałkoŭnika KDB Alaksandra Kazaka. Zajcava abvinavacili ŭ tym, što jaho kiravańnie viedamstvam pryviało da niezdarovaj maralna-psichałahičnaj abstanoŭki ŭ asobnych padraździaleńniach KDB.

U 2013 hodzie hienierał-lejtenant Zajcaŭ staŭ hienieralnym dyrektaram najbujniejšaha ŭ Minsku pryvatnaha kabielnaha apieratara «Kosmas TB».

Valeryj Vakulčyk

Vakulčyk kiravaŭ KDB biez małaha 8 hadoŭ, najdaŭžej za svaich papiarednikaŭ: z 15 listapada 2012 hoda pa 3 vieraśnia 2020 hoda.

Na hety čas prypała vyzvaleńnie palitviaźniaŭ, jakija trapili za kraty pa razhonie Płoščy-2010, čarhovaja libieralizacyja, jakaja pačałasia paśla interviencyi Rasii va Ukrainu (akupacyi Krymu i raźviazańnia vajny na Danbasie), masavyja pratesty suprać dekretu «Ab darmajedstvie».

U 2020-m — pandemija ź niebyvałym vałanciorskim rucham i pieradvybarčaja kampanija z zatrymańniami. I, narešcie, masavyja pratesty suprać falšavańnia vynikaŭ vybaraŭ i hvałtu siłavikoŭ.

Valeryj Vakulčyk. Fota: Tut.by

Vakulčyk byŭ adpraŭleny ŭ adstaŭku ŭ razhar pratestaŭ 3 vieraśnia 2020 hoda.

Łukašenka ŭ intervju rasijskim žurnalistam zajaviŭ, što kiraŭnik KDB pazbaviŭsia svajoj pasady praz zatrymańnie ŭ krainie 33 rasijan.

Havorka pra bajcoŭ rasijskaj pryvatnaj vajennaj kampanii «Vahnier», jakija, pa słovach tahačasnaha rasijskaha pasła Dźmitryja Mieziencava, nakiroŭvalisia praź Biełaruś u treciuju krainu. Ich schapili ŭletku 2020 hoda. Zajaŭlałasia, što jany prybyli ŭ krainu dla ŭdziełu ŭ masavych biesparadkach.

Łukašenka pryznačyŭ Vakulčyka dziaržaŭnym sakratarom Rady biaśpieki.

Na hetaj pasadzie jon pratrymaŭsia krychu bolš za miesiac i 29 kastryčnika atrymaŭ novaje pryznačeńnie — inśpiektaram pa Bresckaj vobłaści.

3 listapada Vakulčyk byŭ zvolnieny sa słužby ŭ zapas pa ŭzroście.

***

Ciapierašni kiraŭnik KDB — Ivan Cierciel. Na pasadu byŭ pryznačany 3 vieraśnia 2020 hoda.

Ivan Tertel chief of State Security Committee of Belarus
Ivan Cierciel, staršynia Kamiteta dziaržaŭnaj biaśpieki. Skrynšot videa

Da pryznačeńnia ŭ KDB mieniej za try miesiacy kiravaŭ Kamitetam dziaržaŭnaha kantrolu.

Cierciel adkazny za masavyja represii paśla vybaraŭ 2020 hoda.

@nashaniva Jak skłalisia losy byłych kiraŭnikoŭ KDB #tiertiel #khb #khbbiełaruś #milicijabiełarusi #biełaruś #novostibiełarusi #pabiełarusku #biełaruskityktok #našaniva ♬ TRANSGENDER (PEARL WHITE VIP) - PEARL WHITE

«Naša Niva» — bastyjon biełaruščyny

PADTRYMAĆ

Hladzicie taksama:

Jak skłaŭsia los siłavikoŭ, što dušyli narod u 2020 hodzie

«Śviadoma ci padśviadoma, ale ŭsie ŭ Biełarusi razumiejuć, što ŭsio zaležyć ad tych, chto trymaje ŭ rukach zbroju» 

Bajpoł: Zajcava źniali za toje, što sprabavaŭ pastavić prasłuchoŭku ŭ kabiniecie Vakulčyka. Što kažuć krynicy?

Chto ŭ akružeńni Łukašenki vystupaŭ za ŭstupleńnie ŭ vajnu, a chto byŭ suprać — krynicy 

Cierciel pra Tarajkoŭskaha: «Vyjšaŭ — i nachabna staić pierad milicyjaj»

Kamientary13

  • korrupcija
    04.01.2024
    Łukašienko utvierždał, čto śniał Sucharienko za to, čto on naličnymi płatił stroitielam svojeho doma, čto v Drozdach, proischoždienije kotorych nie smoh podtvierdiť pri provierkie. https://d-zholik.livejournal.com/101350.html
  • Pravdorub
    04.01.2024
    Pri etom, nie znaju, kak otnosiťsia k ličnosti Vakulčika, nieodnoznačnyj čiełoviek
    No Fantomas - točno dopryhałsia do požiźniennoho za pomoŝ v zachvatie vłasti!
  • Zmahar
    04.01.2024
    “Byłych” kiraŭnikoŭ KDB nie byvaje 😁

Voś čamu ŭ Kitai mohuć prysłuchoŭvacca da Polščy6

Voś čamu ŭ Kitai mohuć prysłuchoŭvacca da Polščy

Usie naviny →
Usie naviny

«U Biełarusi maju muzyku rekłamavała KDB, a ŭ Polščy — palicyja». Bancar prakamientavaŭ svajo zatrymańnie ŭ Varšavie7

Litva raźviarnuła na miažy bolš za 20 mašyn ź Biełarusi — u tym liku z hramadziankaj Litvy za rulom4

Amierykaniec u 14 hadoŭ staŭ samym maładym futbalistam u historyi Amierykanskaj futbolnaj lihi

«Rychtujucca da vajny, a hienieratary nie ŭ stanie kupić». Što raskazvajuć pra situacyju ŭ Mazyry miascovyja žychary3

Ziamla ŭvajšła ŭ mieteorny patok Piersieidaŭ. Dzie i kali pabačyć hetu nieziamnuju pryhažość?

Pres-sakratar polskaha MZS pra adnosiny ź Biełaruśsiu: Čakajem pieršaha realnaha kroku ź biełaruskaha boku8

U minskim parku Čaluskincaŭ zabaranili jeździć na šerynhavych elektrasamakatach

Čarha z aŭtobusaŭ pierad pierachodam «Kamienny Łoh» rassmaktałasia2

Stała viadoma, kudy ŭładkavaŭsia były hiendyrektar MTS Uładzisłaŭ Andrejčanka6

bolš čytanych navin
bolš łajkanych navin

Voś čamu ŭ Kitai mohuć prysłuchoŭvacca da Polščy6

Voś čamu ŭ Kitai mohuć prysłuchoŭvacca da Polščy

Hałoŭnaje
Usie naviny →