«Čamu kožnaja maci pavinna pieražyvać za biaśpieku svajho dziciaci». Maci daradcy Cichanoŭskaj vyjechała ź Biełarusi paśla 15 sutak
«Kali paraŭnoŭvać ź Minskam, to Navapołack — heta maleńki horad. Ale tam kožny tydzień zatrymlivajuć pa 5-6 čałaviek», — kaža Inesa Vorychava.
08.01.2024 / 14:39
30 listapada Inesu Vorychavu, mamu daradcy Śviatłany Cichanoŭskaj pa moładzievaj palitycy Marharyty Vorychavaj, zatrymali siłaviki. U jaje kvatery ŭ Navapołacku prajšoŭ pieratrus, paśla čaho žančynu źmiaścili ŭ miascovy izalatar na 15 sutak, nahadvaje «Salidarnaść».
— Kali paraŭnoŭvać ź Minskam, to Navapołack — heta maleńki horad. Ale tam kožny tydzień zatrymlivajuć pa 5-6 čałaviek, — raspaviadaje Inesa Vorychava ŭ intervju «Nastojaŝiemu vriemieni». — Da mianie pryjšli ź pieratrusam, kažuć: «Nu vy ž maci?». Ja adkazała: tak, maci, ale ŭ mianie jość artykuł Kanstytucyi, i ja mahu nie davać nijakich tłumačeńniaŭ nakont svaich blizkich svajakoŭ.
U telefonie ŭ žančyny znajšli padpisku na «ekstremiscki» resurs u Instagram. Za heta jaje asudzili na 15 sutak:
— Kožny tydzień u nas byli novyja «palityčnyja», u asnoŭnym za raspaŭsiud ekstremisckaj infarmacyi. Čaściej za ŭsio im davali pa 15 sutak, kamuści štraf da 100 bazavych (3600 rubloŭ). Niekatorym, chto vychodziŭ, adrazu ci na nastupny dzień dadavali jašče pa 15 sutak.
Sa słoŭ žančyny, u navapołackim izalatary znachodzicca šmat «palityčnych». Naprykład, adna z šaści kamier całkam składałasia z mužčyn, asudžanych pa palityčnych matyvach:
— U susiedniaj kamiery «palityčnyja» byli ŭpieramiešku sa zvyčajnymi. U majoj na toj momant byli dvoje palityčnych i čatyry nie. I tolki ŭ dźviuch astatnich kamierach byli zvyčajnyja zatrymanyja.
Ja miarkuju, što my viarnulisia da 2020 hoda, bo ŭ nas nie było suviazi sa svajakami, nijakaj infarmacyi pieradavać było niamožna. Ale my razmaŭlali pamiž saboj, śpiavali pieśni, sprabavali padniać sabie bajavy duch. Listoŭ i pasyłak nie pieradavali, ale byŭ aptymizm, viera i nadzieja.
Svajo zatrymańnie Inesa Vorychava źviazvaje z palityčnaj dziejnaściu jaje dački, jakaja zajmaje pasadu daradcy Śviatłany Cichanoŭskaj pa moładzievaj palitycy:
— Ja nie «biehłaja» i nie «bečebešnica». Ja maci, jakaja lubić svajo dzicia. Ja jaje vychoŭvała być mocnaj i niezaležnaj. Ja pieražyvała i dahetul pieražyvaju — byli dni, kali znachodziłasia ŭ paničnych atakach. Kali ŭ 2020 hodzie nie było suviazi (ja była ŭ Połacku, a Ryta ŭ Minsku), to siadzieła i nie viedała, što z maim dziciem. Čamu kožnaja maci pavinna pieražyvać za biaśpieku svajho dziciaci ŭ svajoj krainie?
Paśla vyzvaleńnia žančyna pryniała rašeńnie źjechać ź Biełarusi. Ciapier jana žyvie ŭ Vilni:
— Ja bajusia pieraśledu. Pry hetym chaču žyć u Biełarusi: lublu svaju krainu, ale razumieju, što ciapier tam znachodzicca niebiaśpiečna.
Usia hetaja sistema sprabuje ciabie złamać. Ale kali ty vychodziš, stanovišsia jašče bolš ahresiŭnym. A kali ty nie byŭ ahresiŭnym da hetaj sistemy, to stanovišsia im.
Čytajcie taksama:
U Połacku i Navapołacku zatrymali 30 čałaviek, źviazanych ź miascovymi viełačatami
Lavon Volski: Ja vydatna razumieju chłopcaŭ z Nizkiz, bo žyŭ takim žyćciom nie adzin hod
«Pahladzicie navierch». Vyjšaŭ film pra biełaruskija pratesty, jaki doryć nadzieju