У Чавускім раёне ўратавалі аленя, які патанаў на возеры
Раніцай 28 лістапада на вадасховішчы каля вёскі Юшкавічы Чавускага раёна праваліўся пад лёд алень. Рыбакі выклікалі ратавальнікаў, паведамілі ў Магілёўскім абласным упраўленні МНС.
28.11.2023 / 16:19
«Да нашага прыезду алень ужо выбіўся з сіл і, каб утрымацца на паверхні, паклаў галаву на лёд. Рыбакі бачылі, што на лёд жывёліну загналі ваўкі. Лёд на вадасховішчы яшчэ не выстаяўся, вось і не вытрымаў вагі жывёлы», — паведамілі ў Чавускім аддзеле МНС.
Пры дапамозе выратавальнай дошкі і вяроўкі супрацоўнікі МНС выцягнулі аленя. «Алень не пацярпеў. Пасля перанесенага стрэсу ён адышоў метраў на 10 ад берага, трохі паляжаў, а потым уцёк у лес».
Чытайце таксама:
У Барысаве ўратавалі маленькую слонку
«А Санту дзе згубілі?» Пару аленяў заўважылі ў цэнтры Беразіна