U Iranie pakarali śmierciu 17-hadovaha padletka, asudžanaha za zabojstva ŭ bojcy
Z 2010 hoda iranskija ŭłady pakarali śmierciu jak minimum 68 niepaŭnaletnich hramadzian.
27.11.2023 / 08:18
Viarchoŭny lidar ajatała Ali Chamieniei vystupaje padčas cyrymonii, pryśviečanaj hadavinie śmierci lidara revalucyi 1979 hoda ajatały Chamiejni (na płakacie ŭviersie sprava). Fota: Office of the Iranian Supreme Leader via AP
Pravaabarončyja arhanizacyi Hengaw i Iran Human Rights (IHR), jakija bazujucca ŭ Narviehii, i piersamoŭny spadarožnikavy telekanał Iran International paviedamili pra pakarańnie 17-hadovaha padletka, pryznanaha vinavatym u zabojstvie, piša RTVi.
Pa najaŭnych u pravaabaroncaŭ danych, Chamid Reza Ansary byŭ pakarany 24 listapada 2023 hoda ŭ turmie horada Sabsievar va ŭschodniaj pravincyi Rasavi-Charasan. Hengaw i IHR sa spasyłkaj na ŭbačanyja imi dakumienty śćviardžajuć, što na momant ździajśnieńnia złačynstva padletku było 16 hadoŭ, a na momant pakarańnia — 17. U materyjałach spravy nibyta havorycca, što Asary «zabiŭ čałavieka ŭ bojcy».
Pravaabaroncy čarhovy raz padkreślili, što tym samym Iran parušaje Kanviencyju AAN ab pravach dziciaci, u adpaviednaści ź jakoj «dziciem» ličycca luby čałaviek, jaki nie dasiahnuŭ 18-hadovaha ŭzrostu.
Pa danych pravaabarončych arhanizacyj, u cełym tam karajuć śmierciu bolš maładych ludziej, čym u luboj inšaj krainie: tak, z 2010 hoda iranskija ŭłady pakarali śmierciu jak minimum 68 niepaŭnaletnich hramadzian.
Palitźniavolenaja i łaŭreatka Nobeleŭskaj premii miru Narhiz Machamadzi źviarnułasia da Viarchoŭnaha kamisara AAN pa pravach čałavieka z zaklikam terminova spynić dziciačyja pakarańni ŭ Iranie.
«Ja ździŭlajusia tamu, jak śviet stavicca da zabojstvaŭ i pakarańniaŭ śmierciu pradstaŭnikoŭ iranskaha naroda», — piša hramadskaja dziajačka, nazyvajučy pakarańnia krynicaj hańby dla «represiŭnaha aŭtarytarnaha» režymu Isłamskaj Respubliki. Na dumku Machamadzi, narastajučy narodny hnieŭ vyljecca ŭ «jašče bolš žorstkija» pratesty.
Čytajcie taksama:
Pamierła 16-hadovaja iranka, jakaja patrapiła ŭ komu paśla zatrymańnia za adsutnaść chidžaba
Ajatała Chamieniei: Iran całuje ruki tym, chto napaŭ na Izrail