Terakt u mietro, zabojstva žonki z kachankam, damino na žyćcio. Za što ŭ Biełarusi prysudžali da rasstrełu
U Słucku ciapier sudziać Alaksandra Taratutu i jaho žonku, jakija žorstka zabili trochhadovaha syna. Śviedkam u zale stanovicca błaha ad pačutaha. Prakurorka prosić rasstralać mužčynu, a jaho žonku adpravić na 25 hadoŭ za kraty. Jak pakazvaje praktyka, chutčej za ŭsio, Taratutu rasstralajuć. Zhadvajem, kamu raniej vynosili śmiarotnyja prysudy.
18.10.2023 / 11:20
Asudžanyja da śmiarotnaha pakarańnia: Dźmitryj Kanavałaŭ, Uładzisłaŭ Kavaloŭ, Siamion Bieražny, Ihar Hieršankoŭ, Alaksandr Hrunoŭ, Pavieł Sialuk, Ivan Kuleš, Alaksandr Asipovič, Hienadź Jakavicki
Biełaruś — adzinaja kraina ŭ Jeŭropie, dzie dahetul jość śmiarotnaje pakarańnie. Za hady niezaležnaści było vyniesiena bolš za 400 śmiarotnych prysudaŭ. U 2003-m adzin rasstrelny vyrak byŭ zamienieny na 15 hadoŭ źniavoleńnia Dźmitryju Charchalu.
Za apošnija 12 hadoŭ było vyniesiena, prynamsi, 24 rasstrelnyja prysudy.
Tolki dva śmiarotniki, 19-hadovy Stanisłaŭ i 21-hadovy Ilja Kościevy, byli ŭ 2021-m pamiłavanyja Łukašenkam. Chłopcaŭ hodam raniej asudzili na śmierć za zabojstva nastaŭnicy.
2011 hod. Terakt u mietro
30 listapada 2011 hoda Viarchoŭny sud da rasstrełu pryhavaryŭ 24-hadovych Dźmitryja Kanavałava i Uładzisłava Kavalova.
Aficyjna asudžanych rasstralali ŭ sakaviku 2012 hoda (ale, zhodna sa źviestkami «Kibierpartyzanaŭ», Kavaloŭ skanaŭ u mai).
Abodva byli abvinavačanyja va ŭčynieńni terakta ŭ minskim mietro 11 krasavika 2011 hoda. U vyniku padryvu vybuchovaha prystasavańnia na stancyi «Kastryčnickaja» zahinuła i pamierła ad ran 15 čałaviek, 387 byli paranienyja.
Dźmitryj Kanavałaŭ (źleva) i Uładzisłaŭ Kavaloŭ (sprava). Fota: Tut.by
Kanavałava sud paličyŭ vinavatym u vykanańni terakta, a Kavalova pryznali saŭdzielnikam. Kavaloŭ padavaŭ prašeńnie ab pamiłavańni, ale jaho nie zadavolili.
2013 hod. Damino, reŭnaść, kryŭdy
25 krasavika 2013 hoda Mahiloŭski abłasny sud pryhavaryŭ 45-hadovaha Ryhora Juzapčuka da śmiarotnaha pakarańnia za zabojstva sukamiernika.
Spravu razhladali ŭ mahiloŭskim SIZA ŭ zakrytym režymie.
Šmatrazova sudzimy Ryhor Juzapčuk u mahiloŭskaj turmie №4 hulaŭ z dvuma sukamiernikami ŭ damino na žyćcio. Paśla hulni jon zadušyŭ mužčynu, što prajhraŭ. Jaho achviara, sirata i dzietdomaviec, Ihar Chadakoŭ byŭ asudžany na 18 hadoŭ za toje, što padčas svarki zabiŭ rodnaha dziadźku, jaki dahladaŭ jaho.
A Juzapčuk na toj momant adbyvaŭ 25 hadoŭ za dvajnoje zabojstva.
Pra vykanańnie śmiarotnaha prysudu stała viadoma ŭ mai 2014 hoda.
12 červienia 2013-ha Hrodzienski abłasny sud pryhavaryŭ da rasstrełu 23-hadovaha Paŭła Sieluna.
Studenta histfaka BDU pryznali vinavatym u zabojstvie žonki i jaje kachanka, učynienym z asablivaj žorstkaściu. Pavieł parezaŭ na kavałki cieła mužčyny i vykinuŭ u śmietnicu pobač z domam. A praz paru dzion zabraŭ z kvatery dakumienty i… hałavu žončynaha kachanka.
Svaje dziejańni abvinavačany tłumačyŭ reŭnaściu — jon zastaŭ žonku z kachankam u kvatery.
Pavieł Sialun. Fota: spring96.org
Sprava Sieluna razhladałasia ŭ zakrytym režymie. Prašeńnie ab pamiłavańni nie zadavolili. 18 krasavika 2014 hoda Pavieł Sialun byŭ rasstralany.
26 listapada 2013 hoda Minski abłasny sud pryhavaryŭ da rasstrełu 53-hadovaha hramadzianina Rasii Eduarda Łykava.
Pad śledstvam jon znachodziŭsia z 2011 hoda. Jamu inkryminavali piać epizodaŭ zabojstva ŭ stanie ałkaholnaha apjanieńnia.
Pra toje, što Łykava rasstralali, pravaabaroncy daviedalisia ŭ śniežni 2013 hoda.
Pra jaho mała što było viadoma. Stałaha miesca žycharstva nie mieŭ, padtrymlivaŭ kantakty z maci, jakaja žyła ŭ Baranavičach. Syn asudžanaha žyvie ŭ Rasii, dačka — u Hiermanii.
25-hadovaha Alaksandra Hrunova rasstralali za zabojstva z asablivaj žorstkaściu homielskaj studentki Natalli Jemialjančykavaj. 20 vieraśnia 2012-ha z-za kryŭdy Hrunoŭ nanios dziaŭčynie nie mienš za 102 nažavyja ranieńni, ad čaho taja pamierła na miescy.
Alaksandr Hrunoŭ. Fota: «Homielskaja praŭda»
Sprava Hrunova razhladałasia dvojčy. Pieršy śmiarotny vyrak Homielskaha abłasnoha suda Viarchoŭny sud admianiŭ, nakiravaŭšy spravu na pierahlad. Ale 24 śniežnia 2013-ha byŭ vyniesieny toj ža prysud.
4 listapada 2014 hoda pravaabaroncy daviedalisia, što Hrunoŭ rasstralany.
2015 hod. Zabojstvy žančyn
18 sakavika 2015 hoda sud Rečyckaha rajona vynies vyklučnuju mieru pakarańnia 21-hadovamu žycharu Rečycy Siarhieju Ivanovu za žorstkaje zabojstva 19-hadovaj dziaŭčyny.
Pavodle materyjałaŭ spravy, pjany Ivanoŭ napaŭ na dziaŭčynu, kab zhvałtavać. Taja supraciŭlałasia i napadnik staŭ jaje źbivać. Paśla taho jak achviara straciła prytomnaść, jon zabraŭ kaštoŭnyja rečy i źbieh ź miesca złačynstva.
Ivanoŭ byŭ trojčy sudzimym za chulihanstva i rabavańni. Apošni raz vyzvaliŭsia ŭ lutym 2013 hoda.
Pra rasstreł Siarhieja Ivanova pravaabaroncy daviedalisia ŭ mai 2016 hoda.
28-hadovaha Ivana Kulaša da pakarańnia śmierciu asudzili za zabojstva troch žančyn, kradziež i razboj.
Ivan Kuleš. Fota: belapan.com
U vieraśni 2013 hoda Kuleš zabiŭ dvuch pradaŭcoŭ u Lidzie i skraŭ z kramy hrošy i tavary bolš čym na 37 młn rubloŭ. U listapadzie 2014 hoda zabiŭ jašče adnu kramnicu ŭ Lidskim rajonie: nanios žančynie bolš za 10 udaraŭ siakieraj i abakraŭ mahazin. Akramia taho, Kulaša pryznali vinavatym u zamachu na zabojstva syna kramnicy, jaki zastaŭ jaho ŭ kramie.
20 listapada 2015 hoda Hrodzienski abłasny sud vynies jamu śmiarotny prysud. Z prašeńniem ab pamiłavańni asudžany nie źviartaŭsia. U listapadzie 2016-ha stała viadoma, što Kulaša rasstralali.
2016 hod. Zarezaŭ sabutelnikaŭ i padpaliŭ dom
5 studzienia 2016 hoda Minski abłasny sud pryhavaryŭ da rasstrełu 49-hadovaha Hienadzia Jakavickaha.
Jaho pryznali vinavatym u zabojstvie z asablivaj žorstkaściu sužycielki. Mužčyna nanios joj 46 udaraŭ kułakom. Jakavicki byŭ nieadnarazova sudzimy.
Pavodle pravaabaroncaŭ, rasstralali jaho ŭ kancy 2016-ha.
29 listapada 2016 hoda kaardynatar kampanii «Pravaabaroncy suprać śmiarotnaha pakarańnia» Andrej Pałuda daviedaŭsia ab rasstrele 31-hadovaha Siarhieja Chmialeŭskaha.
Siarhiej Chmialeŭski. Fota: spring96.org
Padčas zastolla Chmialeŭski zarezaŭ mužčynu i žančynu, a zatym, kab schavać złačynstva, padpaliŭ dom. Źbiahajučy, jon sustreŭ inšaha žychara vioski i z-za strachu być apaznanym šturchnuŭ mužčynu ŭ bietonnuju jamu. Toj pry padzieńni atrymaŭ ciažkija traŭmy i pamior u balnicy.
Chmialeŭskaha spačatku asudzili da pažyćciovaha źniavoleńnia, a potym zamianili prysud na rasstreł.
Mužčyna byŭ nieadnarazova sudzimy za kradziažy, razboi, chulihanstva, naŭmysnaje pryčynieńnie ciažkich cialesnych paškodžańniaŭ.
19 maja 2016 hoda Homielski abłasny sud da rasstrełu za zhvałtavańnie i zabojstva dźviuch žančyn asudziŭ 33-hadovaha Siarhieja Vostrykava.
Siarhiej Vostrykaŭ. Fota: belapan.com
Vostrykaŭ padmanam zavablivaŭ achviar u svoj aŭtamabil, advoziŭ u haraž, hvałtavaŭ i zabivaŭ. Cieły žančyn vyvoziŭ u les i zakopvaŭ.
29 krasavika 2017 hoda Homielski abłasny sud atrymaŭ dakumienty ab rasstrele Vostrykava.
Da rasstrełu prysudžali žychara Mazyra Kiryłu Kazačka, jaki zabiŭ dvuch svaich dziaciej.
Vyrak Homielski abłasny sud vynies 28 śniežnia 2016 hoda, u kancy kastryčnika 2017-ha mužčynu rasstralali.
2017 hod. «Čornyja ryełtary» i razborki ŭ kamiery
17 sakavika 2017 hoda Homielski abłasny sud pryznaŭ 32-hadovaha Alaksieja Michaleniu vinavatym u dvajnym zabojstvie i pryhavaryŭ jaho da rasstrełu.
Toj u Naroŭli zabiŭ 59-hadovaha piensijaniera i jaho 61-hadovuju siastru.
Abvinavačany raniej byŭ sudzimy za kradziež i zabojstva ŭ padletkavym uzroście. U mai 2018-ha Michaleniu rasstralali.
Rasstralany byŭ fihurant «spravy čornych ryełtaraŭ» Ihar Hieršankoŭ.
Ihar Hieršankoŭ. Fota: sacyjalnyja sietki
Jaho abvinavacili ŭ zabojstvach, vykradańni čałavieka, machlarstvie, razboi, vymahańni, niezakonnym abaračeńni narkotykaŭ abo psichatropaŭ.
21 lipienia 2017 hoda Mahiloŭski abłasny sud pryhavaryŭ jaho da śmiarotnaha pakarańnia. Rasstralali Hieršankova ŭ kancy 2018 hoda.
Taki ž los čakaŭ i inšaha fihuranta «spravy čornych ryełtaraŭ» Siamiona Bieražnoha.
Siamion Bieražny. Fota: Tut.by
Da rasstrełu ŭ vieraśni 2017 hoda za zabojstva sukamiernika ŭ hłybockaj kałonii №13 byŭ asudžany 30-hadovy Viktar Lotaŭ.
Lotaŭ mieŭ čatyry sudzimaści. Try ź ich — za zabojstvy sukamiernikaŭ.
Na sudzie Lotaŭ pryznaŭ vinu, paćvierdziŭ, što zabojstvy płanavaŭ zahadzia i paprasiŭ dla siabie rasstreł. Prysud nie abskardžvaŭ.
Pra rasstreł Lotava pravaabaroncy daviedalisia ŭ studzieni 2018 hoda.
2018 hod. Pravučyć supiernicu
21 studzienia 2018 hoda Minski haradski sud pryhavaryŭ Viačasłava Sucharku i Alaksandra Žylnikava za zabojstva troch čałaviek da vyklučnaj miery pakarańnia.
Pryčynaj trahiedyi stała reŭnaść 27-hadovaj vychavalnicy Aliny Šulhanavaj. Jana chacieła viarnuć byłoha chłopca i pravučyć supiernicu. Pavodle jaje zadumy, dziaŭčynu pavinny byli źbić. Adnak vykanaŭcy Sucharka i Žylnikaŭ zabili paru. Dziaŭčynie było 24 hady, jaje kachanamu — 32.
Viačasłaŭ Sucharka. Fota: Tut.by
Užo ŭ čas rasśledavańnia vyśvietliłasia, što za niekalki dzion da dvajnoha zabojstva Sucharka i Žylnikaŭ z-za hrošaj zabili mužčynu ŭ Kałodziščach.
Spačatku mužčynam prysudzili pažyćciovaje źniavoleńnie, ale Viarchoŭny sud pastanaviŭ pierahledzieć spravu. Na paŭtornym pracesie ich asudzili da rasstrełu.
Viadoma, što Žylnikava rasstralali ŭ 2019 hodzie.
2019 hod. Zabojstvy niemaŭlaci i maładych dziaŭčat
30 lipienia 2019 hoda Viciebski abłasny sud pryhavaryŭ da rasstrełu 50-hadovaha Viktara Paŭłava.
Jaho abvinavacili ŭ žorstkim zabojstvie dźviuch žycharak Viciebskaha rajona. Jon nanios pažyłym žančynam 31 udar siakieraj.
Abvinavačany pryznaŭsia ŭ złačynstvie i prasiŭ pakinuć jamu žyćcio. Pavodle pravaabaroncaŭ, Paŭłaŭ byŭ rasstralany 13 maja 2021 hoda, a jaho svajaki atrymali dakumienty tolki ŭ listapadzie 2021 hoda.
9 studzienia 2019 hoda Babrujski sud pryhavaryŭ da pakarańnia śmierciu za zabojstva dźviuch dziaŭčat z asablivaj žorstkaściu 36-hadovaha žychara Babrujska Alaksandra Asipoviča.
Alaksandr Asipovič. Fota: «Radyjo Svaboda»
Ź dziaŭčatami abvinavačany paznajomiŭsia ŭ kafe, adkul usie razam zjechali na taksi da jaho dadomu. Pavodle abvinavačańnia, mužčyna nanios adnoj achviary 77 udaraŭ małatkom i rukami ŭ žyćciova važnyja orhany. U druhoj achviary było 16 ran, amal usie — na hałavie i šyi. Paśla Asipovič rasčlaniŭ trupy.
17 śniežnia 2019 hoda mužčyna byŭ rasstralany.
48-hadovy Viktar Sielhiel razam z saŭdzielnicaj zabili 8-miesiačnuju dziaŭčynku, a zatym adrezali joj hałavu.
Viktar Sierhiel
25 kastryčnika 2019 hoda Brescki abłasny sud prysudziŭ mužčynu vyklučnuju mieru pakarańnia.
2020 hod. Palavańnie na piensijanieraŭ
6 sakavika 2020 hoda Minski abłasny sud pryhavaryŭ da rasstrełu 29-hadovaha Viktara Skrundzika.
Viktar Skrundzik. Fota: «Radyjo Svaboda»
Skrundzik zabiŭ dvuch piensijanieraŭ, a paśla napaŭ jašče na adnu pažyłuju žančynu, ale jana vyžyła.
16 lipienia 2022 hoda Skrundzika rasstralali.
***
Jeŭrasajuz i pravaabarončaja supolnaść nieadnarazova asudžali vykarystańnie śmiarotnaha pakarańnia i zaklikali biełaruskija ŭłady admovicca ad jaho. Jak pieršy krok prapanoŭvali ŭvieści maratoryj.
Na śmiarotnaje pakarańnie zvyčajna asudžajuć u Biełarusi za zabojstva pry abciažarvalnych abstavinach. Takaja najvyšejšaja miera pakarańnia jość tolki dla mužčyn.
U 2022 hodzie režym Łukašenki pašyryŭ vykarystańnie śmiarotnaha pakarańnia. Ciapier jano pahražaje abvinavačanym u «zamachu na ŭčynieńnie akta teraryzmu» i moža ŭžyvacca suprać apanientaŭ režymu, jakija čyniać dyviersii.
Pad rasstreł mohuć trapić čynoŭniki i vajskoŭcy, kali ich abvinavaciać u zdradzie dziaržavie.
Hladzicie taksama:
Cierciel: Z pačatku hoda KDB zatrymaŭ bolš za 10 zdradnikaŭ
«Paśla hetych zabojstvaŭ usich starych, chto adzin žyŭ, dzieci pazabirali. Strašna»
AAN pryznała, što ŭ Biełarusi paśla vybaraŭ byli ŭ tym liku złačynstvy suprać čałaviečnaści