Na fiestyvali ŭ Izraili zahinuła dziaŭčyna z Brazilii. Jaje rodnyja bajalisia, što na pachavańni budzie mała ludziej, i napisali pra heta ŭ sietkach. A voś jak było
Bruna Valeanu pierajechała ŭ Izrail z Brazilii 10 hadoŭ tamu, u tym liku ŭ pošukach bolš biaśpiečnaha žyćcia. Jana słužyła instruktarkaj pa stralbie ŭ izrailskim vojsku i vučyłasia ŭ Tel-Aviŭskim univiersitecie, piša «Mieduza».
11.10.2023 / 19:09
7 kastryčnika jana pajechała na muzyčny fiestyval, jaki prachodziŭ u pustyni pobač ź siektaram Haza. Pry napadzieńni bajevikoŭ CHAMAS byli zabity nie mienš za 260 čałaviek. Bruna taksama zahinuła. U apošnim paviedamleńni ź fiestyvalu, jak raskazali jaje siabry i kalehi, jana napisała, što jaje atačyli ŭzbrojenyja ludzi. Paśla hetaha suviaź ź joj źnikła.
U Izraili ŭ dziaŭčyny jość tolki maci i siastra. Jany bajalisia, što na pachavańni budzie mała ludziej, i vałanciory, jakija dapamahali im,
apublikavali dopis, u jakim paprasili sabrać mińjan — kvorum, nieabchodny dla praviadzieńnia pachavalnaha abradu. Na cyrymonii pavinny prysutničać jak minimum 10 darosłych mužčyn. U vyniku na pachavańnie, jak paviedamlaje izrailski kanał N12, sabrałasia kala 10 tysiač čałaviek.
Adzin z arhanizataraŭ vałanciorskich atradaŭ «Zaka» Maks Brodski raspavioŭ, što taksama ŭbačyŭ paviedamleńnie, u jakim siabry Bruny «vykazali niespakoj, što nie budzie mińjana».
«Nu raz takaja reč, treba jechać dapoŭnić mińjan, padumali my z synam, i jašče paru tysiač čałaviek padumali hetak ža i pryjšli na mohiłki», — napisaŭ Brodski.
«Tysiačy! Tysiačy ludziej iduć! Pryparkavali mašyny za niekalki kiłamietraŭ ad mohiłak i pajšli pieššu», — napisaŭ jašče adzin izrailcianin, jaki pryjšoŭ na pachavańnie.
Čytajcie taksama:
Siarod ludziej, što chočuć pakinuć siektar Haza, jość biełarusy