Kryŭdna, što z vusnaŭ Papy hučać vialikadziaržaŭnyja idei Rasii — MZS Ukrainy
U MZS Ukrainy vykazali škadavańnie ŭ suviazi ź niadaŭnaj zajavaj papy Franciška.
29.08.2023 / 08:38
25 žniŭnia telemost źviazaŭ Rasiju i Vatykan. Udzielniki Usierasijskaj sustrečy katalickaj moładzi zmahli pahutaryć z Papam Franciškam. Fota: vaticannews.va
Pra heta ŭ svaim kamientary ŭ paniadziełak zajaviŭ śpikier MZS Ukrainy Aleh Nikalenka, piša «Jeŭrapiejskaja praŭda».
Nikalenka pryvioŭ cytatu z vystupu Francyska pierad udzielnikami Ch Usierasijskaha dnia katalickaj moładzi ŭ Sankt-Pieciarburhu 25 žniŭnia.
«Nikoli nie zabyvajcie pra spadčynu. Vy — naščadki vialikaj Rasii: vialikaj Rasii śviatych, kiraŭnikoŭ, vialikaj Rasii Piatra I, Kaciaryny II, toj impieryi — vialikaj, adukavanaj, vialikaj kultury i vialikaj čałaviečnaści. Nikoli nie admaŭlajciesia ad hetaj spadčyny. Vy — naščadki vialikaj Matuchny Rasii, kročcie napierad z hetym. I dziakuj vam — dziakuj za vaš sposab być, za vaš sposab być ruskimi», — pracytavaŭ słovy Franciška Nikalenka.
Charakterna, što infarmacyjny partał Apostalskaj Stalicy Vatican News vykłaŭ tekst zvarotu Papy na svaim sajcie, adnak pakazany pasaž u im adsutničaje. U toj ža čas u siecivie jość videaŭryvak zvarotu Papy z hetaj cytataj.
Nikalenka zaznačyŭ, što «mienavita takoj impieryjalistyčnaj prapahandaj, «duchoŭnymi zmacavańniami» i «patrebnaściu» ŭ vyratavańni «vialikaj Matuchny Rasii» Kreml apraŭdvaje zabojstvy tysiač ukraincaŭ i ŭkrainak i źniščeńnie socień ukrainskich haradoŭ i viosak».
«Vielmi kryŭdna, što rasijskija vialikadziaržaŭnyja idei, jakija, ułasna, i źjaŭlajucca pryčynaj chraničnaj ahresiŭnaści Rasii, śviadoma ci nieśviadoma, hučać z vusnaŭ Papy, misija jakoha, u našym razumieńni, jakraz palahaje ŭ tym, kab adkryć vočy rasijskaj moładzi na razburalny kurs ciapierašniaha rasijskaha kiraŭnictva», — prakamientavaŭ pradstaŭnik MZS Ukrainy.
Raniej u lipieni Papa Francišak zaklikaŭ Rasiju adnavić Čarnamorskuju zbožžavuju inicyjatyvu, źviarnuŭšysia da «svaich bratoŭ — uładaŭ Rasijskaj Fiederacyi».
Čytajcie taksama:
Papa Francysk: Patryjarch nie pavinien pieratvaracca ŭ słužku Pucina
Papa Francišak zaklikaŭ Rasiju adnavić udzieł u zbožžavaj uhodzie
Papa Francišak naprošvajecca na sustreču z Patryjarcham Kiryłam
Papa Francišak nazvaŭ hetu biełaruskuju žančynu śviatoj. Raskazvajem, chto heta