21-hadovy francuz pabiŭ suśvietny rekord pa płavańni na 400 mietraŭ
Papiaredni rekord trymaŭsia ažno ź Piekinskaj alimpijady 2008 hoda.
24.07.2023 / 12:57
Francuzski płyviec Leon Maršan padčas čempijanatu śvietu pa vodnych vidach sportu pabiŭ suśvietny rekord pa chutkaści zapłyvu na 400 mietraŭ siarod mužčyn. Svaju ŭznaharodu chłopiec atrymaŭ asabista ad papiaredniaha rekardmena i amierykanskaha płaŭca Majkła Fełpsa. Fota: Adam Pretty / Getty Images
U subotu na čempijanacie śvietu pa vodnych vidach sportu ŭ horadzie Fukoka (Japonija) małady francuzski płyviec Leon Maršan pabiŭ rekord amierykanskaha 23-kratnaha alimpijskaha čempijona pa płavańni Majkła Fełpsa. Pra paviedamiła ahienctva CNN.
21-hadovy Maršan pieraadoleŭ dystancyju ŭ 400 mietraŭ u indyvidualnym zapłyvie za 4:02.50 (čatyry chviliny 2,5 siekundy), skaraciŭšy na 1,34 siekundy papiaredniuju adznaku Fełpsa.
Hety rekord trymaŭsia z Piakinskaj alimpijady 2008-ha hoda.
«Heta było varjactva, adna z samych balučych rečaŭ, jakija ja kali-niebudź rabiŭ! Ja treniravaŭsia dla hetaha kožny dzień. Ja pabiŭ suśvietny rekord, heta tak uzrušajuča! Ja nie viedaju, što skazać, ja taki ščaślivy!» — padzialiŭsia emocyjami Maršan.
Druhoje miesca zaniaŭ amierykaniec Karsan Foster, a treciaje — japoniec Daija Seta. Na ŭznaharodžańni mienavita Majkł Fełps, papiaredni suśvietny rekardsmien, uručyŭ Leonu załaty miedal.
Varta adznačyć, što dla Maršana heta ŭžo druhoje zołata čempijanatu śvietu na hetaj dystancyi. Debiutnaje jon zavajavaŭ letaś. Płyviec z Francyi ŭžo treci raz staŭ čempijonam śvietu, taksama na jaho rachunku siarebrany miedal suśvietnaha pieršynstva.
Čytajcie taksama:
Ukraina moža admovicca ad bajkotu spabornictvaŭ z udziełam rasijan i biełarusaŭ
Ad Šviejcaryi da Novaj Ziełandyi. Piać krutych futbalistak z žanočaha čempijanatu śvietu