Suprać ruchu Ukrainy ŭ NATA vystupaje Hiermanija — Bild
Unutrany dakumient niamieckaha ŭrada paćviardžaje, što ŭrad kanclera Ołafa Šolca błakuje pastanovu na karyść Ukrainy adnosna jaje šlachu ŭ NATA. Pra heta paviedamlaje vydańnie Bild sa spasyłkaj na dakumient i na ludziej, znajomych z chodam pieramoŭ, piša «Jeŭrapiejskaja praŭda».
10.07.2023 / 17:11
Fota: Thierry Monasse / Getty Images
Udzielniki pieramoŭ ź liku krain NATA ciaham niekalkich dzion uzhadniali vynikovy dakumient samitu Aljansu ŭ Vilni. Pavodle infarmacyi vydańnia, u toj čas jak mnohija dziaržavy na čale z Francyjaj, Vialikabrytanijaj i Polščaj vystupajuć za zaprašeńnie dla Ukrainy, jak tolki pačnie dziejničać režym spynieńnia ahniu z Rasijaj, da apošnich vychadnych Hiermanija i ZŠA nie padtrymlivali taki płan.
Zamiest hetaha Bierlin i Vašynhton zaklikali prytrymlivacca Płana dziejańniaŭ pa siabroŭstvie ŭ NATA, užo sfarmulavanaha dla Ukrainy ŭ 2008 hodzie. Hety płan praduhledžvaje šmatlikija kroki i ŭmovy, jakija Kijeŭ pavinien byŭ by vykanać, pierš čym atrymać zaprašeńnie ŭ NATA.
U toj ža čas, zhodna z kanfidencyjnym dakumientam niamieckaha ŭrada, ZŠA «zajavili ab svajoj zhodzie admovicca ad Płana dziejańniaŭ pa siabroŭstvie dla Ukrainy «pry ŭmovie praviadzieńnia dalejšych reformaŭ».
«My chacieli prapanavać Ukrainie finskuju madel, heta značyć ustupleńnie na praciahu niekalkich miesiacaŭ, jak tolki skončacca bajavyja dziejańni», — zajaviŭ vydańniu nienazvany dypłamat.
U procivahu hetamu ŭ dakumiencie niamieckaha ŭrada havorycca pra toje, što ŭrad Šolca «nie pahodzicca ni na jakija farmuloŭki, jakija b stvarali ŭražańnie «chutkaha treka» dla ŭstupleńnia Ukrainy». Ab «pierahladzie rašeńnia Bucharesta 2008 hoda» dla ŭrada Hiermanii «nie moža być i havorki».
Tamu Hiermanija nie ŭsprymie «ni zhadki pra zaprašeńnie», ni zhadki pra «zakonnaje miesca Ukrainy ŭ NATA» ŭ vynikovym dakumiencie Aljansu. Urešcie, Bierlin «hatovy razhladać kampramisnyja farmuloŭki» adnosna budučaha ŭstupleńnia Ukrainy ŭ NATA, «choć umovy dla hetaha jašče nie vykanany».
«Tamu nie vyklučana, što niamiecki ŭrad pahodzicca i na admovu ad Płana dziejańniaŭ pa siabroŭstvie, nie zhadžajučysia, adnak, na praktycy na paskorany pryjom Ukrainy (fast track) pa zaviaršeńni vajny», — piša vydańnie.
Vydańniu taksama stała viadoma, što ŭ paniadziełak uviečary pierahavorščyki Hiermanii i inšych dziaržaŭ źbiarucca ŭ Vilni i pasprabujuć jašče raz znajści kampramis pa Ukrainie da pryjezdu kiraŭnikoŭ dziaržaŭ i ŭradaŭ. «U horšym vypadku kiraŭniki ŭradaŭ pavinny buduć sami padklučycca da pieramoŭ u aŭtorak», — skazaŭ adzin z dypłamataŭ.
Čytajcie taksama:
Zialenski: Nie chaču jechać u Vilniu dziela zabavy, Ukraina pavinna atrymać harantyi biaśpieki
Bajden: Kab razhledzieć zajaŭku Ukrainy ŭ NATA, pavinna skončycca vajna
Ministr zamiežnych spraŭ Ukrainy zaklikaŭ Niamieččynu nie paŭtarać pamyłku Mierkiel