Прапаганда расказала пра затрыманні ў Полацкім універсітэце і паказала заплаканых супрацоўніц
На тэлеканале «Звезда» выпусцілі прапагандысцкі сюжэт пра Полацкі дзяржаўны ўніверсітэт. З яго становіцца зразумелым, за што затрымалі некаторых работнікаў. Чысткамі прыгразілі і іншым універсітэтам.
05.07.2023 / 10:24
Затрыманне аднаго з работнікаў ПДУ. Скрын сюжэта тэлеканала «Звезда»
23 мая ў Полацкім дзяржаўным універсітэце прайшла хваля затрыманняў, пад якую трапіла каля паўтара дзясятка супрацоўнікаў. Большасці тых, чые вынікі суда вядомыя, прысудзілі арышт, мінімум адзін чалавек аштрафаваны.
14 чэрвеня «па пагадненні бакоў» звольненыя раней арыштаваныя па адміністрацыйных справах дацэнт кафедры гісторыі і турызму Віктар Чараўка і дацэнт кафедры канстытуцыйнага права і дзяржкіравання Сяргей Глазырын. Агулам у мінулым месяцы звольнілі не менш за сем супрацоўнікаў.
Глазырын у сюжэце расказаў, што трапіў на суткі за старое фота ва «УКантакце» на фоне бел-чырвона-белага сцяга.
Паказалі і дзвюх заплаканых работніц, якіх раней судзілі за падпіскі на непажаданыя рэсурсы: асістэнтку кафедры тэхналогіі і абсталявання перапрацоўкі нафты і газа Паліну Путро (ёй тады далі штраф у 740 рублёў) і намесніцу дэкана па выхаваўчай працы факультэта інфармацыйных тэхналогій Марыю Дэканаву.
Паліна Путро. Скрын сюжэта тэлеканала «Звезда»
У сюжэце наракалі, што многія супрацоўнікі ПДУ стваралі тэлеграм-каналы, дзе выказвалі сваё меркаванне, удзельнічалі ў акцыях і некаторыя спрабуюць цяпер «адседзецца».
«Сорам і боль за некампетэнтнасць кадраў», — заявіла прапагандыстка.
Яна абурылася, што экс-рэктар ПДУ, прафесар Дзмітрый Лазоўскі, не забараняў ва ўніверсітэце лозунгі пра свабоду і дэмакрататыю. Ён перастаў быць рэктарам у 2021-м. У сюжэце ён не стаў гаварыць з прапагандыстамі.
Цяперашні рэктар ПДУ Юрый Раманоўскі заўважыў:
«Пытанні многія, звязаныя з дзейнасцю тых ці іншых структур, тых ці іншых выкладчыкаў, работнікаў, якія ў 2020 годзе падтрымалі пратэсную дзейнасць, падтрымалі так званую свабоду слова, на жаль, або замоўчваліся, або на гэта не звярталася ўвагі».
Ён прызнаўся, што большая частка супрацоўнікаў «падтрымала пратэсную дзейнасць, не перашкаджала таму, каб студэнтаў не далучалі».
«Частка работнікаў была звязаная з замежжам, яны сабе, па сутнасці, на гэтых праектных акцыях зрабілі пэўны хайп для таго, каб потым у рамках падтрымкі мець якія-небудзь дывідэнды», — выказаўся Юрый Раманоўскі.
У канцы сюжэта прапагандыстка заявіла, што ПДУ — месца не для «перамен» (яна падкрэслена вымавіла слова па-беларуску), а «перемен».
Яна дадала, што пратэсныя настроі былі не толькі ў гэтым універсітэце Віцебшчыны.
«Думаць, што вас не закране, — саманадзейнасць і глупства. Думаю, там, дзе трэба, мой пасыл пачуты», — прыгразіла яна.
Чытайце таксама:
Рэктар Полацкага ўніверсітэта прызнаў, што большасць выкладчыкаў у 2020-м падтрымалі пратэсты
73-гадовую кандыдатку тэхнічных навук арыштавалі на 10 сутак
Полацкага дзяржуніверсітэта звольнілі не менш за cем супрацоўнікаў