Sachaščyk: Šancaŭ u biełaruskaj sistemy vystajać u kryzisnaj situacyi niama
Pradstaŭnik Abjadnanaha pierachodnaha kabinieta Biełarusi pa abaronie i biaśpiecy Valeryj Sachaščyk u intervju «Radyjo Svaboda» parazvažaŭ pra ŭpłyŭ «pachodu Pryhožyna» na padziei ŭ Biełarusi.
27.06.2023 / 01:41
Valeryj Sachaščyk padčas intervju. Skryn videa.
Pra pachod Pryhožyna na Maskvu
Sachaščyk ličyć, što heta byŭ kłasičny vajskovy miaciež. «Pakolki dziaržaŭnaja sistema Rasii vielmi nieefiektyŭnaja, heta praciahły kanflikt pamiž PVK «Vahnier» i kiraŭnictvam Ministerstva abarony Rasii. Daŭno treba było na hety kanflikt źviarnuć uvahu i ŭrehulavać jaho».
Asnoŭnym jaho vynikam Sachaščyk ličyć toje, što ŭvieś śviet ubačyŭ absalutnuju niazdolnaść kiraŭnictva Rasii funkcyjanavać u kryzisnaj situacyi. Nichto nie zmoh supraćstajać prasoŭvańniu vahnieraŭcaŭ.
«Heta śviedčyć pra toje, što karupcyja razjeła ŭsiu dziaržaŭnuju sistemu. My ŭbačyli vartaha žalu Pucina, pierapužanaha, jaki pačaŭ havaryć niejkija durnyja słovy. Pucin pakazaŭ svaju słabaść», — adznačaje Sachaščyk.
U toj ža čas jon ličyć, što ciapier pakul rana rabić niejkija vysnovy: «Mnie čamuści zdajecca, što my prysutničajem u antrakcie hetaha śpiektakla».
Rola Łukašenki ŭ vyrašeńni kanfliktu
Na dumku Sachaščyka, rola Łukašenki ŭ pieramovach z Pryhožynym była «vielmi ścipłaja»:
«Jaho dapuścili da ŭdziełu ŭ hetych pieramovach. Razyhrali pryhožuju karcinku. U kožnym razie nieabchodna niejkaja terytoryja, kudy treba dać «Vahnieru» adyści. Bo, kali pakinuć tak, jak jość, heta moža pryvieści da vialikaj sutyčki i pralićcia kryvi. Biełaruś tradycyjna ŭ siabie chavaje złačyncaŭ. Tamu zhadali pra Alaksandra Ryhoraviča. A jon vielmi lubić, kali niechta źviartaje na jaho ŭvahu».
Sachaščyk ličyć, što sam Łukašenka nie spadziajecca na toje, što Pryhožyn pryjdzie ŭ Biełaruś sa svajoj armijaj ci nabiare tam novuju armiju.
«Pryhožyn užo zdradziŭ nieadnarazova. Jon zdradziŭ Pucinu. Što jamu pieraškadžaje zdradzić Łukašenku?» — zadaje pytańnie Sachaščyk.
Na jaho dumku, ničoha dobraha prychod «vahnieraŭcaŭ» Biełarusi nie daść. «Heta mina zapavolenaha dziejańnia, jakaja niekali ŭzarviecca nieviadoma čym».
Na pohlad Sachaščyka, miaciež Pryhožyna pakazaŭ, što «ŭsie ich chvalonyja viertykali ni na što nie zdolnyja. Jak tolki pačaŭsia minimalny kryzis, usie pavylatali ŭ Dubai, Turcyi i Majami. Nichto nie choča abaraniać Pucina.
Dakładna taksama nichto nie zachoča abaraniać Łukašenku. Pucin chacia b daje kraści svajoj kamandzie. A Łukašenka ŭsich zapužvaje, źbiraje daśje. A kradzie tolki jaho siamja. Tamu ŭ Biełarusi ŭsio heta budzie našmat chutčej. I šancaŭ u biełaruskaj sistemy vystajać u kryzisnaj situacyi niama».
Ci mahčymy pachod «vahnieraŭcaŭ» praź Biełaruś na Ukrainu
Sachaščyk miarkuje, što kab «vahnieraŭcy» chacieli napaści na Ukrainu ź Biełarusi, to daŭno b heta zrabili. Dla hetaha nie treba było Pucinu źniesłaŭlać siabie na ŭvieś śviet.
«Vy možacie sabie ŭjavić, što Pucin zapłaciŭ takuju vialikuju canu — źniasłavić siabie pierad usim śvietam dziela taho, kab «vahnieraŭcy» napali z terytoryi Biełarusi?»
— zadaje pytańnie pradstaŭnik Abjadnanaha pierachodnaha kabinieta Biełarusi pa abaronie i nacyjanalnaj biaśpiecy.
Jak šmat biełarusaŭ moža być u PVK «Vahnier»
Sachaščyk padkreślivaje, što nichto nie moža dakładna skazać, kolki biełarusaŭ słužyć u pryvatnaj vajskovaj kampanii Pryhožyna. Ale, na jaho dumku, ich kolkaść niemałaja. Heta jon tłumačyć adsutnaściu ŭ Biełarusi narmalnaj pracy i pierśpiektyŭ.
«Dla čałavieka, jaki adsłužyŭ praparščykam, kantraktnikam ci navat aficeram va ŭzbrojenych siłach Biełarusi, a potym apynuŭsia na hramadziancy i razumieje, što jon nijak nie moža siabie realizavać, heta zdajecca dobraj prapanovaj. Jamu abiacajuć 250 tysiač rasijskich rubloŭ u miesiac. A tut jašče ŭsialakija pryhožyja roliki pra bajavy duch, braterstva. Hučyć dobra. Možna pasprabavać»,
— tłumačyć Sachaščyk.
Pra dziejnaść biełaruskaj desantna-šturmavoj roty va Ukrainie
Sachaščyk paabiacaŭ, što, kali pryjdzie čas, to ŭsie daviedajucca padrabiaznaści dziejnaści biełaruskaj desantna-šturmavoj roty.
«Heta padraździaleńnie sapraŭdy tolki maleńkaja častka taho, čym zajmajecca naš departamient. Kab pieramahčy, my pavinny mieć vialikuju mahutnuju arhanizacyju. U adroźnieńnie, chiba što, ad inšych biełaruskich dobraachvotnych farmavańniaŭ, my nie robim staŭku na vyzvalenčy pachod na Minsk.
My nie robim staŭku na hramadzianskuju vajnu. My robim staŭku na toje, što biełarusy nie buduć stralać u biełarusaŭ. U nas jość dakładny płan, jak hetaha dabicca, i ja całkam vieru, što jon realistyčny».
«My pavinny vyrašyć pytańnie biez hramadzianskaj vajny. Śvietu nie patrebna Siryja ŭ centry Jeŭropy. Nam, biełarusam, nie treba raskołvać nacyju da kanca i rabić tak, kab jašče šmat pakaleńniaŭ adčuvali nianaviść adno da adnaho», — ličyć Sachaščyk.
Pradstaŭnik Abjadnanaha pierachodnaha kabinieta Biełarusi adznačyŭ, što akramia hetaha padraździaleńnia jość jašče sistema stratehičnaha analizu, mahutnaja kamanda kamunikacyi, sistemy raźviedki i ŭłasnaj biaśpieki.
Akramia bajavoha, va Ukrainie jeść jašče niekalki inšych biełaruskich padraździaleńniaŭ, naprykład IT-padraździaleńnie, jakoje «ŭ razy bolšaje za bajavoje padraździaleńnie» i jakoje vykonvaje važnyja zadačy dla ŭzbrojenych sił Ukrainy. Kali pačniecca vyzvaleńnie Biełarusi, jano budzie ŭ hetym dapamahać.
Adkaz Karpiankovu
Sachaščyk prapanavaŭ Karpiankovu pakazać, na što jon zdolny, akramia taho, jak źbivać dziaŭčat-studentak dy starych i paraiŭ «zasunuć svoj jazyk u jakuju-niebudź svaju dzirku i lepš padumać, kudy jamu dziavacca, kali ŭsio pasyplecca ŭ Biełarusi».
Čytajcie jašče:
Valeryj Sachaščyk zaklikaŭ «abjadnać siły i ŭratavać radzimu»
Sachaščyk pakazaŭ bajcoŭ svajoj roty i źviarnuŭsia da biełaruskich i rasijskich vajskoŭcaŭ
Paźniak: Ja paspryjaŭ Sachaščyku, daŭ jamu šmat avansaŭ. Na žal, jon ich nie apraŭdaŭ