«Susiedstva z zamožnymi i kulturnymi ludźmi». Jakija katedžy z basiejnam i łaźniaj pradajucca ŭ vakolicach Minska
Pahladzieli, za kolki možna kupić katedžy z ułasnym basiejnam i łaźniaj u radyusie piaci kiłamietraŭ ad stalicy.
16.04.2023 / 13:47
Častkova biez azdableńnia
Adzin z samych dastupnych varyjantaŭ z vystaŭlenych na prodaž u vakolicach stalicy pradajecca ŭ Ždanovičach.
Fota tut i dalej: realt.by
Ahulnaja płošča dvuchpaviarchovaha doma — 331,4 m². Dom byŭ pabudavany ŭ 2004 hodzie, ale całkam hatovy dla pražyvańnia tolki pieršy pavierch. Pamiaškańni na druhim uzroŭni padrychtavanyja pad azdableńnie. Prosiać za katedž $177 000.
Pamier učastka, na jakim raźmieščany dom, — 17 sotak. Ziamla znachodzicca ŭ pryvatnaj ułasnaści, što davoli redka dla Biełarusi.
Na cokalnym paviersie mieścicca haraž na dva aŭtamabili, saŭna i basiejn.
Na ŭčastku raźmieščany vialikaja altanka i miesca dla barbiekiu, valjer dla sabaki. Ad doma da centra Minska — 15 chvilin jazdy na aŭto, paznačana ŭ apisańni.
Dom z hatovym biznesam
Za 250 tysiač dalaraŭ pradajecca dom z łaźniaj i basiejnam u Ratamcy. Jon padrychtavany pad azdableńnie.
U niekatorych pamiaškańniach ramont skončany, tamu dom možna nazvać umoŭna pryhodnym dla pražyvańnia. Ahulnaja płošča budynka — 257 m², žyłaja — 91 m².
Na ŭčastku pamieram 22 sotki vykanany łandšaftny dyzajn, majecca altanka i nievialikaja sažałka.
Na abjekcie za čverć miljona dalaraŭ jość hatovaja łaźnia i basiejn.
Ale łaźnia i basiejn — nie hałoŭnaja fiška. U abjavie paznačana, što heta dom z hatovym biznesam. «Haraž na dva aŭtamabili z dvuma padjomnikami abstalavany pad STA», — havorycca ŭ apisańni. Pradaviec adznačaje, što hatovy razhladać roznyja varyjanty abmienu.
«Susiedstva z zamožnymi i kulturnymi ludźmi»
Inšy dom z łaźniaj i basiejnam pradajecca ŭsiaho za 1,5 kiłamietra ad stalicy ŭ pasiołku Drazdova.
Za dom 2002 hoda pabudovy ahulnaj płoščaj 372,1 m² prosiać 350 tysiač dalaraŭ. Haspadary adznačajuć, što dom mieścicca na cichim zakrytym zavułku.
Z ulikam padvalnaha pamiaškańnia dom maje čatyry ŭzroŭni. Na apošnim uzroŭni zroblena zona dla adpačynku i zabaŭ. Aproč biljardnaha stała, tam jość aerachakiej i masažnaje kresła.
Taksama ŭ hetym domie jość basiejn, łaźnia i spartyŭnaja zała. Pamier učastka — 18 sotak.
Na ŭčastku, aproč asnoŭnaha doma z prybudavanym haražom, mieścicca dvuchpaviarchovy haściavy domik z brusa.
Pradaviec adznačaje, što pa susiedstvie žyvuć zamožnyja i kulturnyja ludzi.
«Šykoŭny katedž»
Za 555 tysiač pradajecca katedž u Valarjanavie, što za 2 kiłamietry ad Minska. Pradaviec nazyvaje jaho šykoŭnym.
Dom byŭ uźviedzieny ŭ 2003 hodzie. Jaho ahulnaja płošča składaje bolš za 400 «kvadrataŭ». Žyłaja — 255,5 m². Na ŭčastku pamieram 12 sotak vykanany łandšaftny dyzajn. Majecca haraž na dva aŭtamabili z roznymi zajezdami.
Dom całkam hatovy dla pražyvańnia, pradajecca razam z meblaj i technikaj. «Utulny kamfartabielny katedž. Abstanoŭka ŭ sučasnym vytančanym styli», — apisvajuć jaho haspadary.
Na padvalnym uzroŭni znachodzicca łaźnia, basiejn i zona dla adpačynku.
Pakoi ź vientylacyjaj i kandycyjanierami
Jašče adzin katedž dla amataraŭ paparycca taksama znachodzicca ŭ Valarjanavie. Prosiać za jaho amal 600 tysiač dalaraŭ.
Dom za $599 950 maje davoli niezvyčajnyja formy. Ahulnaja płošča budynka 2009 hoda pabudovy krychu bolšaja za 200 mietraŭ, žyłaja — 112,4 m².
U domie vykanany ramont z vysakajakasnych impartnych materyjałaŭ. Mebla dla kuchni z bytavoj technikaj i stalnicy z naturalnaha kamieniu. Italjanskija mižpakajovyja dźviery. Leśvica na druhi pavierch i poručni vykanany z dubu, havorycca ŭ apisańni da abjekta.
U domie majecca łaźnia, basiejn, pakoj dla adpačynku i stoł dla hulni ŭ nastolny tenis.
Va ŭsich pakojach praviedziena vientylacyja, u domie ŭstalavana adrazu niekalki kandycyjanieraŭ.
VIP-kompleks dla žyćcia i biznesu
Za 890 tysiač dalaraŭ za piać kiłamietraŭ ad MKAD u pasiołku Vopytny pradajecca katedž, jaki pradaviec nazyvaje ničym inšym, jak VIP-kompleksam dla žyćcia i biznesu.
Ahulnaja płošča asnoŭnaha budynka amal 300 m², mieścicca jon na ŭčastku pamieram 23 sotki. Na ŭčastku vykanany łandšaftny dyzajn z dekaratyŭnymi nasadžeńniami i sažałkaj ź sistemaj recyrkulacyi vady.
Pobač z domam pabudavany łaźnievy kompleks. Adna łaźnia z basiejnam i elektrapiečkaj, a druhaja — z chamamam i piečkaj na drovach, taksama na vulicy majecca džakuzi PolarSpa.
Pradaviec adznačaje, što łaźnievy kompleks možna zdavać u arendu.
U Novaj Baravoj prezientavali novy kvartał sa śviacilniami i dyvanom u dvary. Što z cenami?
Sučasnyja leciščy kala Minska. Jak vyhladajuć i kolki kaštujuć