Płatforma «Novaja Biełaruś» zapuskaje piłotny prajekt pa ličbavym samakiravańni dla biełarusaŭ u Litvie i Polščy
Voś u čym jaho sutnaść.
15.03.2023 / 17:11
Fota: skryn z sajta newbelarus.com
Biełarusy, što žyvuć u Polščy i Litvie, mohuć sami zapoŭnić padatkovuju dekłaracyju i fundavać peŭny pracent svaich padatkaŭ na dabračynnaść — 1,5% u Polščy i 1,2% u Litvie.
Heta prykładna 20—30 jeŭra pavodle siaredniaha zarobku ŭ hetych krainach.
«Novaja Biełaruś» prapanuje vybrać atrymalnikami hetych padatkaŭ biełaruskija arhanizacyi za miažoj i paśla ź imi vyrašyć, jak kankretna buduć tracicca hrošy.
«U dziaržavie ŭłada idzie ad hramadzianskaj supolnaści, — piša kamanda «Novaj Biełarusi». — Mienavita ludzi vyrašajuć, chto budzie ich pradstaŭlać i na što majuć iści ichnija ahulnyja hrošy. A biełaruskaja supolnaść hatovaja da demakratyi? My pierakananyja, što tak. Kab paćvierdzić heta — zapuskajem piłotny prajekt pa ličbavym samakiravańni.
My zadumali hety prajekt, kab prailustravać usim i sabie samim, što biełarusy i biełaruski hatovyja da demakratyi, da ŭdziełu ŭ ekanamičnych i palityčnych pracesach, hatovyja brać na siabie adkaznaść.
Za leta projdzie abmierkavańnie fundatarami i fundatarkami najbolš istotnych napramkaŭ dla dapamohi. Vy sami zmožacie prapanoŭvać kirunki, supolna abmierkavać, prahałasavać, vyrašyć i prakantralavać, kudy pojduć srodki. Praz toje, što ŭsio budzie prachodzić anłajn, my padzielimsia infarmacyjaj pra etapy i vyniki pracesu».
Kab dałučycca da prajekta, treba samastojna zapoŭnić padatkovuju dekłaracyju i abrać partniorskija ŭstanovy «Novaj Biełarusi» ŭ Polščy ci Litvie ŭ jakaści atrymalnikaŭ vašaha pracenta na dabračynnaść.
Kali nie zapaŭniać dekłaracyju, to hety adsotak śpišacca aŭtamatyčna na rachunak inšaj randomnaj arhanizacyi.
Viasnoj kamanda płanuje sabrać fundataraŭ i fundatarak na płatformie, letam vyznačyć prablemy, jakija varta vyrašyć, i vosieńniu nakiravać srodki na dobruju spravu.
Jak dałučycca da prajekta?
Krok pieršy
Kali vy płacicie padatki ŭ Polščy ci Litvie, zapaŭniajecie dekłaracyju samastojna i pieraličvajecie adsotak na dabračynnaść u partniorskija ŭstanovy «Novaj Biełarusi». Aŭtaryzujeciesia na sajcie i dasyłajecie skryn zapoŭnienaj dekłaracyi.
Krok druhi
Atrymlivajecie list z zaprašeńniem u zakrytuju supołku dla fundataraŭ i fundatarak, dzie budziecie razam vyrašać, na što nakiravać ahulnyja hrošy.
Krok treci
Vosieńniu vy prymajecie kančatkovaje supolnaje rašeńnie, kudy pojduć ahulnyja srodki. I nazirajecie, jak vyrašajecca abranaja vami prablema.
Instrukcyju pa zapaŭnieńni dekłaracyi i inšyja padrabiaznaści prajekta možacie pabačyć na staroncy inicyjatyvy.
Čytajcie taksama:
Ajcišniki zapuścili ličbavuju płatformu «Novaja Biełaruś»