Самалёт у Мачулішчах беларусы атакавалі двума дронамі — Азараў
Кіраўнік аб’яднання Bypol Аляксандр Азараў паведаміў «Белсату», што расійскі самалёт А-50 у Мачулішчах атакавалі з паветра. Напад з дапамогай дронаў учынілі ўдзельнікі плана «Перамога», яны цяпер у бяспецы.
26.02.2023 / 22:49
Самалёт-лакатар А-50. Фота: Мінабароны Расіі
Раней Азараў пацвердзіў «Нашай Ніве», што дыверсію зрабілі беларусы.
«Гэта былі дроны. Удзельнікі аперацыі цяпер ужо ў бяспецы за межамі краіны. Усе выехалі, хай цяпер шукаюць вецер у полі», — сказаў Азараў «Белсату».
Ён паведаміў, што аперацыю рыхтавалі некалькі месяцаў.
Нагадаем, ранкам каля 9-й раніцы на аэрадроме былі чутныя два выбухі. Паведамлялася, што пацярпеў вельмі каштоўны расійскі самалёт дальняй разведкі ДРЛВ А-50, ён быў падарваны ў двух месцах. Усяго такіх самалётаў у Расіі, сапраўдных і няспраўных, дзевяць. Ён выкарыстоўваўся для навядзення расійскіх ракет на цэлі ва Украіне.