U Biełaruś užo viarnulisia pieršyja pieralotnyja ptuški
Pieršyja pieralotnyja ptuški, jakija raniej adlacieli ŭ vyraj, užo viarnulisia ŭ Biełaviežskuju pušču. Chutčej za ŭsio, ich źbiła z pantałyku nie pa-zimovamu ciopłaje nadvorje, jakoje było ŭ śniežni ŭ paŭdniova-zachodniaj častcy Biełarusi. Pra heta pišuć na sajcie Nacyjanalnaha parku «Biełaviežskaja pušča».
11.01.2023 / 20:35
Raźliŭ raki Lasnaja 3 studzienia 2023 hoda. Fota Vadzima Prakapčuka
30 śniežnia 2022 hoda słupok termomietra niečakana padniaŭsia da +8, a 31 śniežnia stała jašče ciaplej, +11. A ŭ pieršy dzień 2023 hoda i zusim byŭ pastaŭleny rekord za ŭvieś čas mieteanazirańniaŭ, +16. Lod na vadajomach rastaŭ, i ŭ Biełaviežskaj puščy tut ža źjavilisia lebiedzi-šypuny, lebiedzi-klikuny i pradstaŭniki kačynych.
Vialikuju čaradu kačak — da niekalkich sotniaŭ ptušak — zaŭvažyli taksama na race Lasnaja ŭ rajonie vioski Hoły Barok. Siarod ich byli i samyja małyja pradstaŭniki kačynych Biełarusi — čyrki-śvistunki.
Ale da kačak zimoj žychary bujnych haradoŭ užo pryzvyčailisia. A voś što bolš dziŭna — bačyli na vadajomach taksama šerych čaplaŭ, a ŭ pojmie raki Lasnaja kala vioski Navickavičy zaŭvažanyja try vialikija biełyja čapli.
Taksama prylacieli ź ciopłaj zimoŭki pieršyja šeryja husi i šeryja žuravy. Cełuju čaradu z 32 šerych husiej zaŭvažyli 3 studzienia. Akramia hetaha, nad rakoj Lasnoj kružyłasia čarada z 30 husiej-humieńnikaŭ i 9 šerych žuraŭloŭ.
Zaŭvažym, što apošnim časam z-za paciapleńnia klimatu ptuški pierastali adlatać u vyraj na vialikija adlehłaści. Tak, mnohija šeryja žuraŭli i šeryja husi starajucca pieračakać marazy ŭ Polščy. Tamu dla ich nie prablema pralacieć sotni kiłamietraŭ, kali nadvorje pačynaje mianiacca ŭ toj ci inšy bok. Ledź robicca trochi ciaplej, jak ich vabić na radzimu.