«Biez asablivaj ryzyki možna atrymać kala 100 dalaraŭ». Kolki ciapier zarablajuć na pieravozcy paliva i cyharet u Polšču i Litvu
Źniaćcie kavidnych abmiežavańniaŭ Biełaruśsiu i susiednimi krainami viarnuła žycharam pamiežža mahčymaść zarablać na kantrabandzie tavaraŭ. «Naša Niva» raźbirałasia, kolki ciapier prynosić pamiežny «biznes».
17.04.2022 / 19:59
Dumali, idziom u adpačynak
Za try dziasiatki hadoŭ čaŭnočny biznes pieražyŭ mnohaje. Ale, mabyć, samy ciažki čas nastaŭ z prychodam pandemii, kali spačatku krainy ES, a potym i Biełaruś uviali žorstkija abmiežavańni na pierasiačeńnie miažy. Pieryjad zacišša doŭžyŭsia krychu bolš za dva hady.
Naš surazmoŭca Alaksiej (imia źmienienaje pa prośbie hieroja) uspaminaje, što kali ŭ sakaviku 2020 hoda zajavili, što miežy začyniajucca, to jon i jaho kalehi dumali, što prosta pojduć u niezapłanavany adpačynak.
«Nichto navat ujavić sabie nie moh, što miežy pratrymajuć začynienymi cełyja dva hady. Dumali, zaraz tydni dva adpačniom i znoŭ praciahniem «pracavać».
Spačatku chadzili čutki, što voś-voś miežy adčyniać. Ale čas išoŭ, abmiežavańniaŭ nichto nie zdymaŭ, a dla mnohich miaža była adzinaj krynicaj prybytku.
Miesiacy praz dva ludzi pačali šukać pracu, ale z hetym, jak viadoma, było tuha. Dy i nie adzin kantrabandyst, jaki siabie pavažaje, nie chacieŭ ceły miesiac chadzić na pracu za 300—400 dalaraŭ», — uspaminaje surazmoŭca.
Nazyvać niejkija prybliznyja sumy, chto kolki tady zarablaŭ, vielmi składana.
«Chtości moh vazić pa 10 błokaŭ, chtości 30, a chtości ŭsie 40.
Adno mahu skazać: bolšaść vaziła da 30, kab u vypadku čaho nie atrymać maksimalny štraf i nie zastacca biez mašyny. Častata pajezdak taksama va ŭsich była roznaja. Dy i štrafy nichto nie admianiaŭ. Ty moh za adzin miesiac zarabić 2000 dalaraŭ, a ŭ nastupny dvojčy trapić na štraf i stracić usio, što zarabiŭ.
Šancavańnie ŭ hetaj spravie hraje nie apošniuju rolu. Ale kali kazać u cełym, to svaje 1000—1500 dalaraŭ na miesiac siaredni kantrabandyst usio ž mieŭ», — pryznaŭsia surazmoŭca.
Pa słovach byvałaha kantrabandysta, za dva hady mnohaje paśpieła źmianicca. Jak minimum prykmietna skaraciłasia kolkaść samich čaŭnakoŭ.
«Za dva hady niechta ŭładkavaŭsia na pracu ŭ Biełarusi. Mnohija syšli ŭ dalnabojščyki ci taksisty, chtości syšoŭ u biznes. Častka źjechała ź Biełarusi. Ale byli i tyja, chto, niahledziačy na ŭsie abmiežavańni, znachodziŭ šlachi, jak praciahvać zarablać na miažy, ale heta nie mieła masavaha charaktaru».
Z błoka cyharet vychodzić $12-15
Ciapier, pa słovach Alaksieja, narod patrochu pačynaje viartacca da raniejšaj spravy, ale vialikaha napłyvu pakul nie nazirajecca.
«U bolšaści achvotnych prosta niama viz, ale ludzi vielmi aktyŭna sprabujuć ich adkryć. Ciapier skłałasia spryjalnaja situacyja dla adradžeńnia hetaha biznesu. Na błoku cyharet možna zarabić ad 12 da 15 dalaraŭ. Apošni raz takoje było, napeŭna, u hodzie 2011—2012. Potym, jak praviła, zarobak z błoka nie dachodziŭ i da 10 dalaraŭ, a ŭ niekatoryja časy źnižaŭsia da 7—8.
Taksama ciapier vyhadna vazić paliva. Na aŭtamabilach ź vialikimi bakami, jak na starych VW Passat, možna zarabić 40—50 dalaraŭ.
U Biełarusi litr salarki kaštuje kala 80 centaŭ, a ŭ Polščy kala 1,7 dalara (7 złotych). Palaki z zadavalnieńniem kuplajuć našu salarku na 2—2,5 złotaha tańniej, čym na zapraŭcy. Vychodzić, što sa sta litraŭ možna vyručyć kala 40 dalaraŭ. Ale heta kali zapraŭlacca na AZS, bo jość i tyja, chto maje mahčymaść kuplać dyziel pa 1,5—1,7 rubla za litr. Tady z baka vyjdzie bolš za 60 dalaraŭ.
Byvaje, što treba pieravieźci pieradaču ź Biełarusi. Takija zakazy znachodziacca siarod znajomych i ŭ tematyčnych čatach. Na zvarotnym šlachu taksama možna pieravieźci tavar ci znoŭ ža pieradaču. Takim čynam vychodzić, što navat biez asablivaj ryzyki možna zarabić kala sta dalaraŭ za adzin rejs», — pryvodzić padliki Alaksiej.
Litoŭcy prosiać pryvieźci kvas i kukuruznyja pałački
Naš druhi surazmoŭca jeździć u Litvu. Pavodle jaho słoŭ, u płanie pieraprodažu paliva hetaja kraina jašče bolš pryvabnaja.
«U Litvie paliva krychu daražejšaje, čym u Polščy. Na AZS jano kaštuje kala 1,8 jeŭra, to-bok kala 2 dalaraŭ za litr. Litoŭcy skuplajuć paliva pa 1,3 jeŭra. Na sta litrach atrymlivajecca 65 dalaraŭ. Kali dalar kaštavaŭ jašče daražej, to vychodziła pad 80.
Tyja ž litoŭcy, jakija kuplajuć paliva, prosiać pryvieźci lidskija kukuruznyja pałački i kvas, časam leki. U dadatak možna vieźci dva pački cyharet i butelku harełki. Heta pakryvaje vydatki na paliva i strachoŭku. Čystymi z takoj pajezdki vychodzić kala 65—70 dalaraŭ. U roźnicu našy cyharety kuplajuć pa 2—3 jeŭra za pačak, u zaležnaści ad marki. Tyja, chto vozić cyharety vialikimi partyjami (ad 10 błokaŭ i vyšej), zdajuć ich pierakupam, tam, naturalna, ceny nižejšyja».
Surazmoŭca spadziajecca, što miežy ŭžo bolš zakryvać nie stanuć i ŭ jaho zastaniecca mahčymaść mieć dadatkovy zarobak za košt pieravozki paliva.
«Vazić cyharety zvyš normy ja, ščyra kažučy, pabojvajusia. U Litvie štrafy vyšejšyja, čym u Polščy, a pakul «Bruzhi» začynienyja, jeździć praz Babroŭniki nie chočacca. Heta zanadta daloka. Naohuł płanuju jeździć nie čaściej za dva razy na tydzień.
Navat kali roźnica ŭ cenach na paliva pastupova budzie skaračacca, to ŭsio adno heta budzie vyhadna. Prynamsi, pakul prybytak za adnu pajezdku nie stanie mienšy za 50 dalaraŭ. Dadatkovyja 400—500 dalaraŭ u miesiac da zarpłaty dakładna nie pieraškodziać».