Ekanamičnaja chronika

21.02.2004

$50 — tak, «Biełtranshaz» — nie

18 lutaha ŭ treci raz za miesiac rasiejskija pastaŭščyki źmienšyli padaču hazu ŭ Biełaruś. Napiaredadni «Hazprom» pahražaŭ całkam pierakryć kran. Zakantraktavanyja na luty abjomy pastavak «Trans-Nafty» vyčarpanyja, a ŭhoda z «Hazpromam» nie zaklučanaja. U aŭtorak biełaruski ŭrad uchvaliŭ prajekt kredytnaha pahadnieńnia z Rasiejaj. Maskva zaprapanavała kredyt u 200 młn dalaraŭ terminam na piać hadoŭ, kab Miensk byŭ zdolny raspłačvacca za haz pa vyšejšych cenach. Rašeńnie kabinetu moža być śviedčańniem taho, što Biełaruś pahodzicca kuplać haz pa bolšych taryfach i nie pahodzicca na pieradaču hazatranspartnaj systemy Rasiei. Zastajecca zrazumieć, ci paciahnie pravał enerhietyčnaha sajuzu razryŭ inšych sajuznych damoŭlenaściaŭ.

Eŭrapiejcaŭ cikavić cement

Bujny niamiecki kancern «Hajdelberhcement» hatovy ŭličvać specyfiku biełaruskaha rynku ŭ pracesie supracy ź Biełaruskim cementavym zavodam u Kaściukovičach. «Hajdelberhcement» prapanuje roznyja varyjanty supracoŭnictva — arenda na 5 hadoŭ abo pieradača akcyj u davierčaje kiravańnie kancernu — i nie nastojvaje na pryvatyzacyi. Pry mahutnaści 850 tys. t cementu ŭ hod, letaś u Kaściukovičach vyrabili 716,8 tys. t.

Jašče adzin suśvietny cementavy lider «CRH Group» (Irlandyja) prahnie ŭdziełu ŭ madernizacyi Krasnasielskaha cementavaha zavodu ŭ Vaŭkavyskim rajonie. Kampanija «Lafarge» (Polšča) prapanuje stvareńnie SP na bazie «Hranitu» ŭ Mikaševičach. A niamiecki «Knaŭf» nie hublaje cikavaści da «Biełhipsu».

$440 młn — kałhasam

U 2004 h. u Respublikanski fond padtrymki vytvorcaŭ sielhaspradukcyi pastupić bolš za 987,5 młrd rub. Akramia zvyčajnych datacyj, hrošy pojduć na madernizacyju zierniaschoviščaŭ i ziernietakoŭ i budaŭnictva zavodu pa pierapracoŭcy j zachavańni nasieńnia kukuruzy.

Zabaronienyja «Hierber» i «Tuteli»

Dziciačaje charčavańnie hetych firmaŭ nie adpaviadaje kryteram jakaści. Takoje rašeńnie pryniała biełaruskaja sansłužba śledam za rasiejskimi kalehami.

Staŭka dołu

17 lutaha bazavaja staŭka refinansavańnia źniziłasia jašče na 1%, da 27% hadavych. Z pačatku 2003 h. jana źniziłasia ŭžo na 11% u suviazi z zapavolvańniem inflacyi.

MB; BiełaPAN, «Biełorusskij rynok», gazeta.pl

• 0
• 0
• 0
• 0
• 0
• 0
• 0
• 0