Śledstva pa spravie žurnalista prypyniacca dla praviadzieńnia čarhovaj linhvistyčnaj ekśpiertyzy.
Videa belsat.eu
29 listapada hrodzienskaha žurnalista Andreja Pačobuta vyklikali da śledčaha. Pryznačana jašče adna linhvistyčnaja ekśpiertyza jahonych artykuła, pravodzić jaje budzie Hrodzienski dziaržaŭny ŭniviersitet imia Janki Kupały. Na čas praviadzieńnia ekśpiertyzy śledstva prypyniajecca.
«Uvohule siurpryz. Paśla Akademii kiravańnia pry prezidencie, BDU i Akademii Navuk, jakija ścipła prajšlisia pa maich artykułach, znajšoŭšy tam ceły bukiet kryminalnych artykułaŭ, Śledčamu kamitetu dla čahości spatrebiłasia dadatkovaje mierkavańnie ścipłaha haradzienskaha univiersiteta», — piša žurnalist u svaim fejsbuku.
Akramia taho, Pačobuta aznajomili z vynikami techničnaj ekśpiertyzy kanfiskavanych u jaho kampjutaraŭ. Tut bieź siurpryzaŭ, adznačaje jon. «Kampjutary ekśpiertam UUS znajomyja, jany ich i minuły raz "trybušyli".
Uvohule vynik čakany — sajty "Biełpartyzana" i "Chartyi" z hetaha kampjutara sapraŭdy naviedvalisia, tekstavyja fajły niekatorych artykułaŭ, što fihurujuć u abvinavaŭčym zaklučeńni sapraŭdy jość. Cikava što ekśpiertami vioŭsia pošuk fajłaŭ pa słovach, siarod jakich apynułasia zahadkavaje słova "Lipkovič"».
Varta nahadać, što błoh Jaŭhiena Lipkoviča ŭ červieni 2010 hoda trapiŭ u «čorny śpis» Apieratyŭna-analityčnaha centra razam z sajtami charter97.org, belaruspartisan.org, prokopovi.ch dy inš.
«Mahčyma, takim čynam śledčyja demanstrujuć, što śledstva praciahvajecca. Maŭlaŭ, hladzicie — pryznačana ekśpiertyza, sprava robicca», — miarkuje Andrej Pačobut.
***
Nahadajem, Andrej Pačobut paŭtorna abvinavačvajecca va ŭčynieńni złačynstva, praduhledžanaha art. 367 KK. Jak ličyć śledstva, u šerahu publikacyj, padrychtavanych žurnalistam i raspaŭsiudžanych internet-resursami, «utrymlivalisia paklopnickija vykazvańni na adras kiraŭnika dziaržavy». Pačobut byŭ zatrymany 21 červienia 2012 u svajoj hrodzienskaj kvatery. Paśla vobysku jaho pavieźli ŭ prakuraturu, a zatym źmiaścili ŭ śledčy izalatar. 30 červienia žurnalista vyzvalili pad padpisku ab niavyjeździe.
Letam minułaha hoda Pačobuta ŭžo sudzili za «paklop u dačynieńni da prezidenta». Tady sud Leninskaha rajona Hrodna pryhavaryŭ jaho da troch hadoŭ pazbaŭleńnia voli z adterminoŭkaj vykanańnia na dva hady. Zaraz žurnalistu pahražaje pakarańnie ŭ vyhladzie abmiežavańnia ci pazbaŭleńnia voli da piaci hadoŭ.
KDB vypadkova vydaŭ dvuch supracoŭnikaŭ, adkaznych za stvareńnie śpisa «terarystaŭ»18
Kamientary