19 listapada ŭ Nacyjanalnym mastackim muziei Biełarusi ŭ Minsku padpisana prahrama supracoŭnictva pamiž Ministerstvam kultury Biełarusi i Ministerstvam kultury i nacyjanalnaj spadčyny Polščy na 2012–2014 hady.

Namieśnik ministra kultury Biełarusi Tadevuš Stružecki adznačyŭ, što ŭ ramkach prahramy zapłanavana realizacyja mierapryjemstvaŭ i sumiesnych prajektaŭ, nakiravanych na raźvićcio kultury i mastactva abiedźviuch krain.

«My čakali hetuju prahramu. My pierakananyja, što jana stanie važnym stymułam dla dziaržaŭnych orhanaŭ i arhanizacyj pa raźvićci kultury. My taksama spadziajomsia, što prahrama abudzić šyrokuju hramadskuju supolnaść na raźvićcio aktyŭnaha kulturnaha supracoŭnictva. Prahrama ŭklučaje šerah punktaŭ, siarod jakich raźvićcio supracoŭnictva ŭ śfiery kiniematahrafii, teatralnaha mastactva, kancertna-hastrolnaj dziejnaści, restaŭracyi pomnikaŭ historyi i kultury, muziejnaj spravy i vystavačnaj dziejnaści, biblijatečnaj spravy, stvareńnia pomnikaŭ dziejačam kultury i mastactva, arhanizacyi abmiennych stažyrovak vykładčykaŭ i studentaŭ VNU kultury», — paviedamiŭ Stružecki.

Pavodle słoŭ namieśnika ministra kultury, «u miežach prahramy płanujecca papularyzacyja spadčyny Stanisłava Maniuški, stvareńnie daśje pa Aŭhustoŭskim kanale dla ŭniasieńnia jaho ŭ śpis Suśvietnaj spadčyny, praviadzieńnie dzion kultury Biełarusi ŭ Polščy, a taksama dzion krainy-susiedki ŭ nas».

Pasoł Polščy ŭ Biełarusi Lešak Šarepka dadaŭ: «Chaciełasia b, kab kultura Polščy była dastupnaja dla šyrokaj hramadskaści ŭ Biełarusi. Heta prahrama stanie šturškom dla raźvićcia kultury ŭ krainach-susiedkach. My budziem staracca, kab usie prajekty, zapłanavanyja nami, atrymalisia».

Da kanca hetaha hoda Ministerstva kultury Biełarusi płanuje padpisać prahramu supracoŭnictva ź Ministerstvam kultury Łatvii.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?