U Biełarusi ŭ 2011-m niezakonna da kryminalnaj adkaznaści było pryciahnuta 426 čałaviek

U Biełarusi ŭ 2011 hodzie niezakonna da kryminalnaj adkaznaści było pryciahnuta 426 čałaviek, što amal u dva razy bolš, čym u 2010 hodzie. Takija danyja pryvioŭ pieršy namieśnik staršyni Śledčaha kamiteta Andrej Švied 5 krasavika na mižnarodnaj navukova-praktyčnaj kanfierencyi pa prablemach baraćby sa złačynnaściu i padrychtoŭki kadraŭ dla pravaachoŭnych orhanaŭ, jakaja prachodzić u Akademii MUS.

Kažučy pra pieradumovy pryniaćcia rašeńnia ab stvareńni Śledčaha kamiteta, Švied adznačyŭ, što praktyčna ŭsie raniejšyja śledčyja struktury zajmalisia tym, što raspačynali kryminalnyja spravy pa drobnych, niaciažkich złačynstvach. Tolki ŭ 2010 hodzie sudami była spyniena vytvorčaść prykładna pa 5 tysiačach takich kryminalnych spraŭ.

Pa kryminalnych spravach, papiarednim rasśledavańniem jakich zajmalisia śledčyja DFR KDK, kolkaść hramadzian, niezakonna pryciahnutych da kryminalnaj adkaznaści, u 2011 hodzie pavialičyłasia ŭ 8 razoŭ, pa spravach, jakija rasśledavalisia ŭ MUS, — u 2,3 razu.

U śledčych MUS, KDB, DFR KDK, orhanaŭ prakuratury, pavodle słoŭ Švieda, nie było adzinaj pravaprymianialnaj praktyki, jany zaležali ad viedamasnych intaresaŭ, «što vyražałasia ŭ najaŭnaści abvinavaŭčaha ŭchiłu», prysutničała niezdavalniajučaja jakaść papiaredniaha śledstva i daznańnia, «što dazvalała vinavatym paźbiahać kryminalnaj adkaznaści i nie pakryvać dziaržavie i hramadzianam pryčynienaha złačynstvam uronu».

«U niekatorych vypadkach da kryminalnaj adkaznaści pryciahvalisia nievinavatyja asoby, jak z pryčyny abvinavaŭčaha ŭchiłu z boku śledčych, tak i ŭ vyniku pamyłak, a časam i pramych falsifikacyj dokazaŭ», — kanstatavaŭ Švied.

Kožnaje viedamstva, pavodle jaho słoŭ, kiravałasia ŭłasnaj kryminałahičnaj statystykaj, «acenka vynikaŭ pracy pravodziłasia pa kolkaści raspačatych i nakiravanych u sudy kryminalnych spraŭ». «Takaja sistema prama ci ŭskosna padšturchoŭvała da taho, kab znachodzić złačynstvy tam, dzie ich niama», — zajaviŭ pieršy namieśnik staršyni Śledčaha kamiteta.

Švied padkreśliŭ, što z pačatkam pracy 1 studzienia 2012 hoda Śledčaha kamiteta značna źmieniena nie tolki struktura pravaachoŭnaj sistemy, ale i paradak vytvorčaści pa materyjałach i kryminalnych spravach. Pavodle jaho słoŭ, ciapier SK spałučaje funkcyi dziaržaŭnaha pravaachoŭnaha orhana i orhana papiaredniaha rasśledavańnia.

Švied nahadaŭ słovy Alaksandra Łukašenki ab tym, što «refarmavańnie śledčaha aparata — heta nie meta, a srodak pavyšeńnia efiektyŭnaści jaho pracy».

Siarod zadač SK Švied nazvaŭ abjektyŭnaje i apieratyŭnaje rasśledavańnie złačynstvaŭ, a taksama abaronu pravoŭ i zakonnych intaresaŭ hramadzian.

Viačasłaŭ Budkievič, BiełaPAN.

• 0
• 0
• 0
• 0
• 0
• 0
• 0
• 0