Kinachrybiet (100 filmaŭ, jakija varta pabačyć)
Historyka-mistyčny "Chrybiet djabła" Hiljerma Del Tory.
Chrybiet djabła (El Espinazo Del Diablo / The Devil's Backbone)
Hišpanija – Meksika, 2001, kalarovy, 106 chv.
Režyser: Hiljerma Del Tora
Scenarysty: Hiljerma Del Tora, Antonia Trasoras, Dejvid Manaz
Kampazytar: Chaŭjer Navarete
Aperatar: Hiljerma Navara
Hałoŭny mastak: Sezar Makaran
Dekaratary: Pabła Perona Navara, Maryja Del Piłar Revuełta
Mastak pa kaściumach: Chase Vika
Hrym: Paŭła Kruz, Fermin Hałan, Manueła Huzman, Chorchie Chiernandes
Admysłovyja i vizualnyja efekty: Karmen Ahire, Alfonsa Nijeta, Rejies Abades, Emilia Ruis Del Rya
Huk: Jan Saspłuhas, Aryjoł Taraha, Kiku Vidał
Mantaž: Łui de ła Madryd
Pradusary: Ahustyn Almadovar, Pedra Almadovar, Roza Bosch, Bierta Navara, Majkł Ruben, Hiljerma Del Tora
Roli vykonvajuć: Eduarda Narjeha, Marysa Paredes, Federyka Łupi, Fernarda Ćjelve, Ińjiha Harsies, Iren Viseda, Chase Manuel Łarenca, Chuan Karłas Vielida, Paka Maestre
Žanr: Historyka-mistyčnaja drama-prypavieść
Adznaka: 10 (z 10)
30-yja hady. Hramadzianskaja vajna ŭ Hišpanii. 12-hadovy Karłas (Fernarda Ćjełve) paśla śmierci baćki-kamunista traplaje ŭ prytułak pad apieku “čyrvonaj” dyrektrysy Karmen (Marysa Paredes) i prafesara Kasaresa (Federyka Łupi). U školnym dvary hmyrycca nierazarvanaja avijacyjnaja bomba, a ŭ načnych kalidorach błukaje pryvid zahibłaha chłopčyka…
Pieršaja častka mistyka-metafizyčnaj trylohii Hiljerma Del Tory pra Hramadzianskuju vajnu j fašyzm (druhaja častka – “Labirynt Faŭna”, a treciaja – musić źjavicca ŭ 2009 hodzie).
Karcina – najdaskanalejšy šedeŭr meksykanskaha režysera.
Film nia tolki raspaviadaje pra ludzkija losy padčas kryvavaje kałatniečy (historyja ad Antonia Trasorasa) – i nia prosta pałochaje strašnaj kazkaj pra pryvida (prydumka Hiljerma Del Tory). Film uvasablaje samu isnaść kino.
Kaliści krytyk Andre Bazen abaraniaŭ “ontalahičnuju praŭdu” kino i paraŭnoŭvaŭ filmy z burštynam, u jaki traplajuć insekty – kab nazaŭždy zachavacca.
Karcina “Chrybiet djabła” – burštyn. Ale ŭ hetym burštynie nie zabytyja rečy ci zpakutavanyja ad staraści tvary – chacia praŭda epochi j psychalahičnaja hłybinia admietnyja dla karciny.
Pacierty hramafon, pazłamanaje radyjo, vieršy, zmročnyja kalidory, uzdychi ŭ ciemry...
Na stužcy, pradusavanaj Pedra Almadovaram, zafiksavanyja całkam niemateryjalnyja źjavy. Strach, jur, nianaviść i praha da hrošaj; ludzkija zababony, pieršaje kachańnie, mužnaść, adkaznaść. Inicyjacyja, kali dzicia sutykajecca sa złom i musić dać jamu boj (nievynosnaja scena, kali dzieci atakujuć voraha). Sacyjalnaje zło – jak prajava metafizyčnaha zła – i pryvid, jak pomsta j akryvaŭlenaje sumleńnie.
Burštynavym alkaholem zalityja embryjony-pačvarki, jakich miascovy lud nazyvaje “chrybtami djabła”; załaty napoj raskuplajecca "dla patencyi". Załaty tvar u patoplenaha pryvida – i tolki kroplami curočyć kroŭ uvierch. Da času staiłasia j maŭčyć iržavaja bomba, umuravanaja ŭ internacki dvor – i žoŭta-załaty vybuch. Załatyja źlitki ŭ draŭlanaj nazie dyrektarki-invalida, załatyja tvary zabitych; burštynavaje cieła paluboŭnika-padonka; załataja śpioka darohi, na jakuju vychodziać asiraciełyja dzieci.
Stary prafesar u karcinie pakutliva zapytvajecca i jahonyja słovy – pra sam film: “Što takoje pryvid?.. Trahiedyja, jakoj nakanavany viečny paŭtor?.. Mo', sekundny bol? Niešta miortvaje, što zdajecca žyvym… Pačućcie, padviešanaje ŭ časie. Byccam fatahrafija ŭ rasfokusie. Byccam mucha ŭ burštynie…
Pryvid – heta ja”.
Iluzija ŭvasobiłasia.
Karcina demanstrujecca ŭ farmacie “4ch4” z čaćviarha 15 sakavika ŭ kinateatrach “Aŭrora”, “Centralny”, “Pieramoha”, “Mir”.
Taksama ŭ kinafarmacie “Spačuvańnie spadaryni Pomście”, “Kryvavy dyjamant”, “Jak małyja dzieci”.
Fatahrafii z sajtu “Kultovoje kino”
Hladzicie taksama Labirynt Faŭna
Taksama na ekranach iduć "Vyspa", "Babilon", "Hanibał: Uzychodžańnie", "Pryvidny honščyk", "Miortvyja dački", "Kroŭ i šakaład", "Luboŭ-morkva".
Chtości stvaryŭ falšyvy sajt KDB i ciškom źbiraŭ danosy1
Kamientary