Z takoj zajavaj vystupiŭ 22 vieraśnia pradstaŭnik Biełarusi pry adździaleńni AAN u Ženievie Michaił Chvastoŭ padčas debataŭ u miežach 18-j siesii Savieta pa pravach čałavieka AAN, jakaja prachodzić z 12 pa 30 vieraśnia.

Pavodle źviestak pres-słužby Savieta pa pravach čałavieka AAN, Chvastoŭ vykazaŭ udziačnaść krainam, jakija padtrymali Biełaruś padčas hetych debataŭ. Što tyčycca ES, to, jak zajaviŭ pradstaŭnik aficyjnaha Minska, «u svabodnym śviecie nichto nie moža ŭkazvać ludziam, jak jany pavinny žyć i kudy ruchacca».

Chvastoŭ taksama padkreśliŭ: ułady Biełarusi buduć dabivacca taho, kab pytańnie ab situacyi ŭ krainie było źniataje z paradku dnia Savieta AAN pa pravach čałavieka. Pavodle jaho słoŭ, niezadavolenaść prezidenckimi vybarami ŭ Biełarusi źjaŭlajecca ŭmiašańniem va ŭnutranyja spravy krainy,

a abmierkavańnie biełaruskaha pytańnia pakazała «ŭsie defiekty» Savieta pa pravach čałavieka.

U svaju čarhu, pradstaŭnik ofisa viarchoŭnaha kamisara AAN pa pravach čałavieka Kiunh-va Kanh padčas debataŭ zaznačyła, što abnadziejena zajavami biełaruskaha boku adnosna hatoŭnaści praciahvać supracoŭnictva z ofisam viarchoŭnaha kamisara. Razam z tym, padkreśliła jana, u suviazi z rekamiendacyjami, zroblenymi ŭ dakładzie, Biełaruś pavinna prademanstravać realnyja kroki pa pierahladzie zakanadaŭstva, kab pryvieści jaho ŭ adpaviednaść ź mižnarodnymi standartami.

Šerah krain, u pryvatnaści Karejskaja Narodnaja Demakratyčnaja Respublika (Paŭnočnaja Kareja) i Siryja, asudzili pradstaŭleny dakład i zajavili, što palityčna matyvavanyja dakłady pryviaduć tolki da paharšeńnia adnosinaŭ pamiž krainami.

Pradstaŭniki krain ES vykazali svaju zaniepakojenaść situacyjaj z pravami čałavieka ŭ Biełarusi i, u pryvatnaści, najaŭnaściu ŭ krainie palitźniavolenych. Aprača taho, jany vykazali zakłapočanaść situacyjaj z zatrymańniem pravaabaroncy Alesia Bialackaha.

Paśla zaviaršeńnia debataŭ pa situacyi ŭ Biełarusi Saviet pa pravach čałavieka pačaŭ abmierkavańnie situacyi z pravami čałavieka ŭ śviecie. 23 vieraśnia dyskusija praciahniecca.

***

Jak raniej paviedamlałasia, 20 vieraśnia padčas siesii Savieta pa pravach čałavieka AAN byŭ zasłuchany dakład viarchoŭnaha kamisara AAN pa pravach čałavieka ab situacyi ŭ Biełarusi. Sutnaść zvodziłasia da taho, što situacyja z pravami čałavieka paśla prezidenckich vybaraŭ 2010 hoda pahoršyłasia. U dakumiencie ŭtrymlivaŭsia šerah rekamiendacyj uradu Biełarusi. Hałoŭnaja rekamiendacyja — biez pramarudžvańnia i biez usiakich umoŭ vyzvalić palityčnych apanientaŭ, demakratyčnych aktyvistaŭ i žurnalistaŭ, jakija nie brali ŭdzieł ni ŭ jakich nasilnych akcyjach.

Paśla pradstaŭleńnia dakłada Chvastoŭ zajaviŭ, što Biełaruś nie zhodnaja z vysnovami Jeŭrasajuza i ofisa viarchoŭnaha kamisara AAN pa pravach čałavieka, prezientavanymi ŭ červieńskaj rezalucyi, jakija pakazvajuć Biełaruś jak krainu, dzie jość istotnyja parušeńni pravoŭ čałavieka. Jak śćviardžaje Chvastoŭ, «rezalucyja pa Biełarusi nie maje ničoha ahulnaha z realnaj situacyjaj u krainie i była stvorana z metaj źviaržeńnia biełaruskaha ŭrada».

Razmova idzie pra rezalucyju, pryniatuju 17 červienia hetaha hoda na 17-j siesii Savieta AAN pa pravach čałavieka, u jakoj byli asudžanyja dziejańni ŭładaŭ Biełarusi «pa destabilizacyi situacyi z pravami čałavieka» na praciahu apošnich šaści miesiacaŭ. Prajekt rezalucyi, vyłučany delehacyjaj Jeŭrasajuza, padtrymali Kanada, Narviehija, ZŠA, Šviejcaryja, Paŭdniovaja Kareja, Japonija i bolšaść łacinaamierykanskich krain — členaŭ savieta, a taksama delehacyi Habona, Zambii, Iardanii, Maŭrykija, Maldzivaŭ i Uruhvaja. Suprać pryniaćcia rezalucyi ŭ adnosinach da Biełarusi prahałasavali Kitaj, Kuba, Rasija, Nihieryja i Ekvador.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?