Ministerstva suviazi i infarmatyzacyi padtrymała prapanovu respublikanskaha hramadskaha abjadnańnia «Tavarystva biełaruskaj movy imia Franciška Skaryny» ab vypusku paštovych marak ź vidarysami zamkaŭ Biełarusi, paviedamiŭ BiełaPAN staršynia TBM Aleh Trusaŭ.
Na svoj zvarot u Minsuviazi jon atrymaŭ adkaz ad namieśnika ministra Mikałaja Strukava, jaki skazaŭ, što RUP «Biełpošta» sioleta zapłanavała vypusk novaj standartnaj sieryi paštovych marak ab pomnikach ajčynnaj architektury. Pryčym u sieryi z 12 znakaŭ paštovaj apłaty try paštovyja marki buduć pryśviečanyja Mirskamu, Lidskamu (abodva — Hrodzienskaja vobłaść) i Niaśvižskamu (Minskaja vobłaść) zamkam, havorycca ŭ adkazie.
Trusaŭ vykazaŭ zadavalnieńnie tym, što Minsuviazi padtrymała prapanovu TBM i vidarysy samych viadomych pomnikaŭ ajčynnaha abarončaha dojlidstva źjaviacca na biełaruskich markach standartnaha vypusku, jakija drukujucca miljonnymi nakładami. Było b dobra, kab heta tradycyja była praciahnuta ŭ nastupnyja hady i źjavilisia fiłatelistyčnyja minijaciury, pryśviečanyja ŭsim viadomym abarončym zbudavańniam krainy, uklučanym u dziaržprahramu «Zamki Biełarusi», skazaŭ staršynia TBM.
Pavodle jaho słoŭ, heta prahrama na 2012–2018 hady, što znachodzicca na zaćviardžeńni va ŭradzie, praduhledžvaje adnaŭleńnie, kansiervacyju, dobraŭparadkavańnie i ŭklučeńnie ŭ śfieru turyzmu 38 pomnikaŭ biełaruskaha abarončaha dojlidstva.
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu66
Kamientary