U čaćvier uviečary pačynajecca aficyjny vizyt prezydenta Biełarusi ŭ Turkmenistan.

Apošni raz Alaksandar Łukašenka byŭ u Turmienistanie pazaletaś, dzie jaho prymaŭ ciapierašni prezydent Hurbanhuły Bierdymuchamiedaŭ, letaś turkmenski lider naviedvaŭ z aficyjnym vizytam Biełaruś.

Tavarazvarot pamiž dźviuma krainami nia nadta vialiki: chacia za 2 apošnija hady jon vyras amal udvaja, letaś jon dasiahnuŭ ścipłaj ličby 91 miljon dalaraŭ, pry hetym jaho lvinaja dola — 87 miljonaŭ dalaraŭ — heta biełaruski ekspart. Ź Biełarusi ŭ Turkmienistan pastaŭlajucca hruzaviki, cukar, sielhasmašyny, šyny, siedłavyja ciahačy, leki.

Dla paraŭnańnia — z Ukrainaj tavarazvarot letaś skłaŭ 4.4 miljardy dalaraŭ.

Samy bujny abjekt biełaruska-turkmienskaha supracoŭnictva — prajekt pa budaŭnictvie ŭ supracoŭnictvie ź Biełaruśsiu hornaŭzbahačalnaha kompleksu pa vytvorčaści uhnajeńniaŭ na bazie Harłykskaha radovišča kalijnych solaŭ.

Niahledziačy na toje, što Turkmienistan źjaŭlajecca adnym z najbujniejšych u śviecie pradaŭcoŭ pryrodnaha hazu z hieahrafičnych, ekanamičnych i palityčnych pryčynaŭ jahony ekspart u Biełaruś źjaŭlajecca vielmi składanaj zadačaj, ciapier Turkmienistan nie pradaje Biełarusi haz, letaś uvieś turkmienski impart u Biełaruś skłaŭ kala 4 miljonaŭ dalaraŭ.

Nia vyklučana, što vizyt Alaksandra Łukašenki ŭ Turkmienistan maje zbolšaha palityčnyja matyvy. Režym u Ašhabacie i pry Bierdymuchamiedavie jak i pry jaho papiaredniku Nijazavie, zastajecca adnym z samych represiŭnych u śviecie. Pry hetym, dziakujučy zapasam pryrodnaha hazu, jon maje peŭny ŭpłyŭ u rehijonie i vyklikaje peŭnuju zacikaŭlenaść z boku krain Eŭraźviazu.

Paśla ŭčorašnich zajavaŭ biełaruskaha prezydenta, pahłybleńnia kanfliktu z Eŭraźviazam i ŭźniknieńnia prablem z Ukrainaj, vizyt u Ašhabat moža być demanstracyjaj taho, što ŭ Biełarusi ŭ śviecie jość dobryja siabry.

Da taho ž nia vyklučana, što adnoj z temaŭ pieramovaŭ Łukašenki i Bierdymuchamiedava moža stać pradastaŭleńnie Biełarusi kredytu. Pavodle apošnich paviedamleńniaŭ čakany kredyt ad Rasiei źjavicca nie raniej čym praz 2–3 tydni, a hrošy patrebnyja ciapier, dakładniej, učora.

U Turkmienistana ź jaho vielizarnymi dachodami ad ekspartu hazu hrošy jość. Inšaja sprava, nakolki jon schilny pazyčać ich biełaruskim siabram.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?