Kandydat u prezidenty Viktar Ciareščanka adčuvaje za saboj pastajannaje sačeńnie, u tym liku ŭ dalokich pajezdkach. Pra heta jon paviedamiŭ 1 śniežnia padčas anłajn-kanfierencyi na sajcie interniet-haziety BiełaPAN Naviny.by («Biełorusskije novosti»).

«Užo nieadnarazova chtości ŭzłomaŭ moj aŭtamabil, zdymaŭ sihnalizacyju. Tamu siońnia ja zaprasiŭ śpiecyjalistaŭ, jakija vykonvajuć funkcyju achovy», — skazaŭ Ciareščanka.

Kandydat u prezidenty adnosić siabie da apazicyi, «ale da apazicyi kanstruktyŭnaj». «Ja raskryvaju prablemy, ich pryčyny i prapanoŭvaju šlachi vyrašeńnia. Pavodle tłumačalnaha słoŭnika, „apazicyja“ — heta niazhoda ź dziejańniami, rašeńniami, u hetym vypadku — prezidenta. Takim čynam, u nas u krainie 99% hramadzian — apazicyja; choć u čymści jany dyj niazhodnyja», — rastłumačyŭ jon.

Ciareščanka paviedamiŭ, što, kali stanie prezidentam, asabista paprosić «kožnaha ź siońniašnich kandydataŭ z ulikam ich navykaŭ pryjści pracavać na karyść naroda, heta dastojnyja i dobra padrychtavanyja ludzi».

Samuju vialikuju pamyłku Alaksandra Łukašenki Ciareščanka bačyć u tym, što

«ŭsie 16 hadoŭ na „chakiejnym poli“ jon hulaje adzin, zabivaje hały ŭ adny i druhija varoty».

«Inšymi słovami, jon nie zmoh sfarmiravać kamandu ludziej, jakim by moh daviarać, i, hałoŭnaje, jakija biez bojazi i strachu mahli b vykonvać daručanuju im pracu», — skazaŭ kandydat.

Pavodle mierkavańnia Ciareščanki, samaje vialikaje dasiahnieńnie Łukašenki ŭ tym, što, «šantažyrujučy Rasiju, jon zdoleŭ zarabić 52 młrd. dołaraŭ, ale, na žal, nie zmoh imi pravilna rasparadzicca. Taki šanc u nas bolš naŭrad ci budzie».

19 śniežnia Ciareščanka nie źbirajecca iści «na płošču». «Jak i ŭvieś narod, ja budu čakać vynikaŭ vybaraŭ. Ale navat papiarednija vyniki stanuć viadomyja ŭ lepšym vypadku da ranicy 20 śniežnia», — adznačyŭ jon.

Ciareščanka vieryć, što «narod vykaža svaju volu, a členy terytaryjalnych kamisij — i asabliva ich staršyni — nie pojduć na ździełku z sumleńniem». Jon źviarnuŭsia da rabotnikaŭ vykanaŭčaj ułady: «Jakuju b pasadu vy ni zajmali, sumlenna vykonvajcie svoj abaviazak hramadzianina, nie idzicie na złačynstvy va ŭhodu čyim by tam ni było kapryzam».

Kandydat ličyć, što 20 śniežnia nasielnictva Biełarusi budzie viedać «proźvišča novaha prezidenta». U toj ža čas jon nie vyklučaje, što «moža być i druhi tur hałasavańnia. Ale z Novym hodam vas pavinšuje novy prezident. Spadziajusia, što heta budu ja».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?