Fiestyval «Aršanskaja bitva». 20 zatrymanych

Niahledziačy na zatrymańni milicyjaj, hramadzianie z roznych haradoŭ krainy zmahli trapić na Krapivienskaje pole i adśviatkavać pieramohu ŭ Aršanskaj bitvie. Pad roznymi markami pa darozie na Krapivienskaje pole byli zatrymanyja i dastaŭlenyja ŭ milicyju ŭ Oršy i Dubroŭna bolš za 20 čałaviek.

Tradycyjna praśledavalisia pastajannyja ŭdzielniki mierapryjemstva — mastak Aleś Puškin i bard Andrej Mielnikaŭ. Jak paviedamiŭ Mielnikaŭ, prykładna ŭ 19 hadzin 11 vieraśnia jon byŭ zatrymany Dziaržaŭtainśpiekcyjaj na aŭtadarozie Orša-Dubroŭna kala vioski Stachaŭka. Mielnikaŭ jechaŭ da miesca praviadzieńnia fiestyvalu na viełasipiedzie, i prykładna za paŭhadziny da zatrymańnia jaho spynili supracoŭniki AMAP dla pravierki dakumientaŭ. Ustanaviŭšy jaho asobu, milicyjaniery dazvolili jechać dalej. Ale nieŭzabavie dziažurnyja supracoŭniki DAI zatrymali Mielnikava za toje, što jaho viełasipied nie abstalavany farami, choć jechaŭ bard u śvietły čas sutak. Supracoŭniki AMAP, jakija praviarali dakumienty, dastavili jaho ŭ Aršanski RAUS.

Ź milicyi barda adpuścili tolki ŭ 1.30 nočy i skłali pratakoł za parušeńnie PDR. Jaho abvinavacili ŭ tym, što viełasipied nie byŭ abstalavany faraj i hukavym sihnałam. «Dy i naohuł milicyjaniery skazali, što ja nie mieŭ prava jechać pa prajeznaj častcy na viełasipiedzie», — adznačyŭ Mielnikaŭ.

Inšyja ŭdzielniki mierapryjemstva dabiralisia, vykarystoŭvajučy roznyja taktyčnyja chitryki. Naprykład, homielskija aktyvisty nie pajechali na aŭtobusie, a syšli na niekalki prypynkaŭ raniej, išli da pamiatnaha kryža praz pali, kustoŭje i lasy, paźbiahajučy adkrytaj miascovaści i aŭtadarohi. Im udałosia trapić na fiestyval. «Pryčym adnojčy my ŭsio ž narvalisia na zasadu milicyi i kinulisia naŭcioki, — paviedamiła hamialčanka Łarysa Ščyrakova. — Było pačućcio, što my ŭčynili šerah złačynstvaŭ i chavajemsia ad pravasudździa.

Milicyjaniery śviacili lichtarykami, kryčali: «Stajać, milicyja!», — a my schavalisia ŭ niejkaj łahčyncy i adsiedzielisia tam».

Fiestyval «Aršanskaja bitva» prachodzić u pamiać pieramohi armii Vialikaha Kniastva Litoŭskaha nad vojskami Maskoŭskaj dziaržavy ŭ 1514 hodzie. Pieršy fiestyval aŭtarskaj piensi prajšoŭ na miescy bitvy ŭ 1991 hodzie.

• 0
• 0
• 0
• 0
• 0
• 0
• 0
• 0