Jacek Pratasievič pryvitaŭ rašeńnie uładaŭ źviarnucca da ABSIE ŭ spravie Biabienina

Kiraŭnik delehacyi Jeŭraparłamienta pa suviaziach ź Biełaruśsiu Jacek Pratasievič pryvitaŭ rašeńnie biełaruskich uład zaprasić ekśpiertaŭ-kryminalistaŭ z krain — členaŭ ABSIE dla rasśledavańnia pryčyn śmierci žurnalista Aleha Biabienina, kiraŭnika apazicyjnaha internet-resursu «Chartyja'97».

U zajavie, raspaŭsiudžanaj 10 vieraśnia pres-słužbaj delehacyi Jeŭraparłamienta, Pratasievič adznačyŭ, što «hety biesprecedentny zachad biełaruskaha ŭrada demanstruje hatoŭnaść pravieści tradycyjnaje dla sučasnych krain prazrystaje i niepraduziataje rasśledavańnie».

Pratasievič vykazaŭ nadzieju, što «takaja praktyka raspaŭsiudzicca taksama na vypadki vykradańnia viadomych hramadskich dziejačaŭ». Jeŭradeputat pieraličyŭ źnikłych u 1999–2000 hadach: Juryj Zacharanka, Viktar Hančar, Anatol Krasoŭski, Dźmitryj Zavadski.

Pradstaŭnik Jeŭraparłamienta vykazaŭ spačuvańni siamji i svajakam Biabienina ŭ suviazi ź jaho zaŭčasnaj śmierciu.

Jak paviedamlałasia raniej, cieła Aleha Biabienina było znojdziena ŭ 19.00 3 vieraśnia ŭ dačnym domie, što ŭ Dziaržynskim rajonie. «Biabienin visieŭ na samarobnaj piatli, prymacavanaj da leśvičnaha pralotu, jaki viadzie na druhi pavierch doma. Pobač lažaŭ taburet», — skazaŭ načalnik adździaleńnia infarmacyi i hramadskich suviaziej UUS Minabłvykankama Alaksandr Danilčanka.

Ekśpiertyza ŭstanaviła, što pryčynaj śmierci Aleha Biabienina źjaŭlajecca aśfiksija ŭ vyniku zadušeńnia piatloj pry paviešańni, paviedamiŭ prakuror Dziaržynskaha rajona Siarhiej Kaŭryhin. Pavodle jaho słoŭ, ekśpierty ŭstanavili, što akramia stranhulacyjnaj barazny na šyi inšych paškodžańniaŭ na ciele Biabienina niama. U Hienprakuratury paviedamili, što ŭ pieršuju čarhu razhladajecca viersija samahubstva.

Siabry, svajaki i kalehi zahinułaha sumniavajucca ŭ tym, što apazicyjny žurnalist moh pajści z žyćcia dobraachvotna. Pavodle słoŭ jaho kaleh, u Biabienina nie było nijakich matyvaŭ dla samahubstva, aficyjnyja ž dakumienty ab jaho śmierci ŭtrymlivajuć šerah supiarečnaściej, jakija prymušajuć sumniavacca ŭ aficyjnaj viersii zdareńnia.

Staršynia Jeŭraparłamienta Ježy Buziek zaklikaŭ ułady Biełarusi pravieści «poŭnaje i prazrystaje» rasśledavańnie akaličnaściaŭ śmierci Biabienina. Z anałahičnymi zajavami vystupili dakładčyk Parłamienckaj asamblei Savieta Jeŭropy pa Biełarusi Sinika Churskajnien, pradstaŭnik ABSIE pa pytańniach svabody ŚMI Dunia Mijatavič, Jeŭrapiejskaja fiederacyja žurnalistaŭ, arhanizacyja «Indeks cenzury», Narviežski Chielsinkski kamitet, Biełaruskaja asacyjacyja žurnalistaŭ i inšyja arhanizacyi.

• 0
• 0
• 0
• 0
• 0
• 0
• 0
• 0