Fest u Navahradku. Jak heta było

Usio pačałosia 10 hadoŭ tamu. Dziesiatki tysiač haściej, bieł-čyrvona-biełyja ściahi i biełaruskaja mova. I amal nijakaj kamiercyi.

25-27 červienia 2010 h. u Navahradku paśla pierapynku ŭ čatyry hady projdzie čarhovy Fest siaredniaviečnaj kultury «Navahradski zamak». Heta budzie piaty pa liku fiestyval, pieršy ž adbyŭsia 10 hod tamu. Pa-sutnaści, heta byŭ pieršy ŭ Biełarusi fest takoha kštałtu. Potym byli siaredniaviečnyja festy ŭ Miadzieli, Lidzie, Brasłavie, Połacku, adnak tolki ŭ pieršaj stalicy VKŁ śviata stała rehularnym. Prapanujem našym čytačam koratka aznajomicca z historyjaj festaŭ u Navahradku

2000

24-25 červienia ŭ Navahradku prajšoŭ I Fest siaredniaviečnaj kultury «Navahradski zamak». Dahetul padobnych fiestyvalaŭ u nas nichto nie ładziŭ, tamu zacikaviŭ jon nie tolki biełarusaŭ, ale i zamiežnikaŭ. Aśviatlać jaho pryjechali viadučyja rasijskija telekanały, a adzin z supracoŭnikaŭ «NTV» pryjechaŭ u jakaści ŭdzielnika. Fest zapomniŭsia, naturalna, nie tolki tym, što jon byŭ pieršym. Badaj za ŭsiu svaju sučasnuju historyju 30-tysiačny Navahradak nie pieražyvaŭ takoha napłyvu haściej. Pa roznych acenkach na śviata źjechałasia da 40 tysiač haściej. Pry hetym, pieršy fest zdoleŭ abyścisia biez praźmiernaj kamiercyjalizacyi. Prynamsi pierasoŭvańnie pa ŭsich śviatočnych placoŭkach było volnaje Siarod haściej festu było šmat biełaruskamoŭnych, mnohija pryvieźli ŭ Navahradak bieł-čyrvona-biełuju atrybutyku. Milicyja sprabavała ŭmiešvacca, ale vidavočna była nie hatovaja da takoha pavarotu padziej.

Ułady horadu nadzvyčaj horača vitali ideju praviadzieńnia festu, što stała zarukaj jahonaha nastupnaha isnavańnia. Što praŭda, pieršy fest abyšoŭsia biez kapiejčyny biudžetnych hrošaj — usie vydatki (kala $30 tys.) uziali na siabie arhanizatary.

Razynkaj I «Navahradskaha zamku» stała insceniroŭka šturmu zamka teŭtoncami 1394 h.

2002

29-30 červienia. Fest raście. Kali ŭ 2000-m u im udzielničała kala 200 čalcoŭ histaryčnych kłubaŭ, to hetym razam rycaraŭ było kala 700. Fest 2002 hoda pryśviacili 750-hodździu karanacyi Mindoŭha. Z hetaj nahody ŭ Navahradak zavitaŭ skulptar Hienik Łojka z mastackim prajektam «Lehiendy ź piasku». Ciaham festu na zamkavaj hary pamiž muroŭ uźnikła skulptura Mindoŭha ź piasku. Hetym razam zamčyšča iznoŭ šturmavali ciažkaŭzbrojenyja kryžaki, dapamahała im siaredniaviečnaja artyleryja. Na zamčyščy byli ŭźviedzienyja časovyja draŭlanyja ŭmacavańni.

Svaje vysnovy ź minułaha festu zrabili siłaviki. Na vulicach Navahradka była zładžanaja samaja sapraŭdnaja demanstracyja siły: jak žartavali hości festu, akramia rycaraŭ na vułkach horadu možna było pabačyć pradstaŭnikoŭ niezarehistravanych kłubaŭ «Miltan» i «Aman». Milicyja naładziła palavańnie za haspadarami «niezarehistravanaj» simvoliki. Tyja adkazali vynachodlivaściu: da ściahoŭ pryviazvali bałoniki i vypraŭlali pałotnišča ŭ pavietranaje padarožža nad vulicami i płoščami horadu.

2004

14-15 žniŭnia. Treci fest pačaŭsia z daždžu. Niespryjalnaje nadvorje adpałochała mnohich, chto źbiraŭsia ŭ toje leta ŭ Navahradak. Pieršy dzień festu pastaviŭ svojeasablivy antyrekord pa naviedvalnaści: na adkryćcio śviata pryjechała kala 10 tysiač čałaviek, što było niazvykła ŭ paraŭnańni ź minułymi fiestyvalami. Śviata vidavočna pieražyvała kryzis žanru: usio tyja ž atrakcyjony, tyja ž zabavy, znajomyja tvary. Fest usio bolš kamiercyjalizavaŭsia. Ratavała spravu dobraja muzyka: zorkami navahradskaha festu stali lvoŭski «Burdon», picierski «Drołs». Svaju prahramu ŭ Navahradku prezientavali debiutanty ad Biełarusi na «Jeŭrabačańni» «Alaksandra i Kanstancin».

Adnoj ź cikavostak treciaha festu stali bai siaredniaviečnych vajaroŭ, achoplenych połymiem.

2006

1-2 lipienia. «Navahradski zamak — 2006». Što tut skazać? Fest staŭ dobraj tradycyjaj. Jamu ŭžo padaj nie mahli naškodzić ni čerhi pa šašłyki na centralnaj płoščy, ni kitajski šyrspažyŭ u kožnaj treciaj pałatcy. Dziesiatki tysiač haściej – jak addanych prychilnikaŭ, jakija zakachalisia ŭ Navahradak šeść hadoŭ tamu, tak i začaravanych svaim pieršym praniknieńniem u siaredniaviečča nieafitaŭ. Čaroŭnaja muzyka i skoki na płoščy, što ŭsio jašče čakaje na svajho Karala, brazhat ciažkaj zbroi dy iržańnie koniej na zamčyščy. A jašče dziesiatki bieł-čyrvona-biełych ściahoŭ pa ŭsim horadzie.

Tak było daŭniej. Jak budzie hetym razam, čytajcie tut

• 0
• 0
• 0
• 0
• 0
• 0