Kureńnie «praz trecija ruki» takoje ž niebiaśpiečnaje

Kancerahieny ad tytuniu zastajucca na ścienach i mebli.

Ścieny aŭtamabilaŭ i pamiaškańniaŭ, u jakich kurać, utrymlivajuć kancerahiennyja rečyvy, što ŭžo nie majuć pachu tytuniu i całkam niezaŭvažnyja, ale niebiaśpiečnyja. Tamu zabarona na kureńnie ŭ hramadskich miescach, uviedzienaja ŭ Jeŭropie, hłyboka abhruntavanaja.

Navukoŭcy vyśvietlili, što pieršapačatkova biasškodnyja rečyvy, jakija znachodziacca ŭ pavietry pamiaškańniaŭ, dzie sistematyčna palać, mohuć pieratvaracca ŭ kancerahieny ź ciaham času.

Rečyvy, jakija jość u cyharetnym dymie, u pryvatnaści nikacin, asiadajuć na pavierchniach. Sam nikacin nie kancerahien, adnak jon chimična aktyŭny i ŭzajemadziejničaje ź inšymi rečyvami. U peŭnym spałučeńni nikacin pierachodzić u rodnasnyja jamu nitrazaminy, a ŭžo jany — vysokakancerahiennyja. Ich udychajuć usie ludzi ŭ pamiaškańni, navat kali cyharetnaha dymu ŭ pavietry ŭžo i niama. Dla takoha ŭździejańnia ŭviedzieny termin «kureńnie praz trecija ruki».

Rodnasnyja tytuniu nitrazaminy (tobacco‑specific nitrosamines, TSNA) pieršapačatkova byli znojdzienyja na pavierchniach u aŭtamabilach zaŭziatych kurcoŭ. Potym było praviedzienaje łabaratornaje madelavańnie ŭzajemadziejańnia rečyvaŭ dymu z pavierchniami i atmaśfiernym pavietram. U jakaści madeli materyjału pavierchni była vybranaja celułoza. Na pavierchniu z sarbiravanym tytuniovym dymam na praciahu troch hadzin uździejničali azocistaj kisłatoj u kancentracyi 60 miljardnych dolaŭ (što madeluje ŭtrymańnie ŭ atmaśfiery). Za čas ekśpierymientu kancentracyja TSNA na pavierchni vyrasła ŭ 10 razoŭ.

Nitrazaminy mohuć pranikać u arhanizm albo niepasredna praz skuru, albo padčas udychu, albo ŭsmoktvacca praź ślizistyja rota i nosa.

Nikacin moža zachoŭvacca na pavierchniach unutry pamiaškańniaŭ na praciahu dzion, tydniaŭ i navat miesiacaŭ.

Dzieci, jakija šmat času pravodziać siedziačy na padłozie, padviarhajucca ŭździejańniu škodnych rečyvaŭ, što ŭtvarajucca padčas kanviersii nikacinu. Jany traplajuć u arhanizm dziaciej praz skuru abo padčas udychu. Kali kurcy kłapociacca pra zdaroŭje svaich dziaciej i blizkich, jany pavinnyja ŭstrymacca ad kureńnia ŭ domie i ŭ mašynie. «Prakuranyja» dyvany i meblu naohuł treba prybrać z domu, tamu što jany źmiaščajuć vielmi vialikuju kolkaść «druhasnych» kancerahienaŭ».

Zrešty, dym i jaho reštki zachoŭvajucca ŭ vopratcy kurca, navat kali jon kuryć na vulicy. Tamu najlepšy sposab zaścierahčy siabie i svaich blizkich — heta nie kuryć naohuł.

• 0
• 0
• 0
• 0
• 0
• 0
• 0
• 0