Pamiatajecie Arcioma, jaki adkryŭ machlarski zbor u Polščy? Jon znajšoŭsia ŭ Biełarusi. Za kratami
Arciom Taŭstyka — biełarus, jaki stajaŭ za machlarskim zboram nibyta na karyść siastry-ŭciakački ŭ Polščy.
Nahadajem, što niekalki miesiacaŭ tamu ŭ siecivie źjaviŭsia zbor, napisany ad imia biełaruskich palituciekačoŭ. Aŭtar zboru — paźniej vyśvietliłasia, što heta 30-hadovy Arciom Taŭstyka — pisaŭ, što byccam źbieh ź Biełarusi razam ź siastroj, a ŭ Polščy jana naradziła dzicia.
Mužčyna prasiŭ dapamohu nibyta na apłatu miedycynskich rachunkaŭ siastry, uciraŭsia ŭ davier da pravaabaroncaŭ. Adnak błohiery ŭ tvitary razabralisia ŭ situacyi i pryjšli da vysnovy, što zbor byŭ machlarskim. Taŭstyka vyrašyŭ prosta zarabić na salidarnaści nieabyjakavych biełarusaŭ.
Taŭstyka niejki čas nasamreč byŭ za miažoj, ale paśla źnik. Nichto nie viedaŭ, dzie jon znachodzicca.
I voś ciapier u raskładzie suda Maskoŭskaha rajona (Minsk) źjaviłasia infarmacyja ab tym, što 12 śniežnia 2024 hoda pačynajecca kryminalny praces nad Arciomam Uładzimiravičam Taŭstykam. Jaho abvinavačvajuć pa artykule 209 č.3 KK — machlarstva, ździejśniejnaje ŭ bujnym pamiery.
«Naša Niva» daviedałasia z dapamohaj «Biełpoła», što ŭ Biełarusi bolš niama ludziej z takimi ž pašpartnymi źviestkami. To-bok sudzić pačynajuć aŭtara mienavita taho zbora, taho samaha Taŭstyku.
Jak vyśvietliłasia, heta ažno piataja kryminalnaja sprava ŭ žyćci mužčyny. Usie papiarednija historyi taksama byli źviazanyja z machlarstvami, pryčym u kožnaj ź ich havorka išła pra niekalki epizodaŭ. Taksama Taŭstyku sudzili pa artykule 212 KK — kradziež majomaści šlacham madyfikacyi kampjutarnaj infarmacyi. Mahčyma, havorka išła pra vykarystańnie hrošaj z čužoj bankaŭskaj kartki.
Jakoje machlarstva inkryminujecca jamu ciapier, pakul nieviadoma.
«Naša Niva» — bastyjon biełaruščyny
PADTRYMAĆPrajekciroŭščyki pakazali, jak budzie vyhladać płošča Banhałor u Minsku. Im skazali padumać lepš8
Prajekciroŭščyki pakazali, jak budzie vyhladać płošča Banhałor u Minsku. Im skazali padumać lepš
«Na praciahu 30 hadoŭ niezaležnaści biełaruskamoŭnyja biuleteni zadavalniali ŭsich». Kamunisty abvinavacili Bondaravu ŭ raspalvańni varožaści na moŭnaj hlebie1616
Kamientary