Ci sapraŭdy karysna admaŭlacca ad sałodkaha?

Tradycyjna ličycca, što cukar niehatyŭna ŭpłyvaje na zdaroŭje, u pryvatnaści na sardečna-sasudzistuju sistemu. Racyjon charčavańnia, jaki ŭklučaje pradukty z vysokim utrymańniem cukru, pavialičvaje ryzyku atłuścieńnia, što, u svaju čarhu, pryvodzić da sardečnych zachvorvańniaŭ. Šmat ludziej prytrymlivajucca dyjety ź nizkim utrymańniem cukru ci ŭvohule ad jaho admaŭlajucca z-za najaŭnych prablem sa zdaroŭjem.

Adnak, jak piša Daily Mail, vielmi małaja kolkaść cukru ŭ racyjonie nie źjaŭlajecca nieabchodnaj ci karysnaj dla zdaroŭja. Jak pakazali vyniki niadaŭniaha daśledavańnia šviedskich vučonych, umieranaje spažyvańnie słodyčaŭ moža być karysnym dla serca.

Udzielniki, jakija spažyvali da 14 porcyj sałodkaha ŭ tydzień, radziej pakutavali ad infarktaŭ i insultaŭ. Ryzyka insultu ŭ ich źniziłasia na 16%, a infarktu — na 20% u paraŭnańni z tymi, chto jeŭ mienš za dźvie porcyi sałodkaha ŭ tydzień.

Da takich vysnoŭ navukoŭcy z Łundskaha ŭniviersiteta ŭ Šviecyi pryjšli ŭ chodzie analizu danych dvuch bujnych kahortnych daśledavańniaŭ z udziełam bolš za 70 000 čałaviek, sabranych u 1997 i 2009 hadach. Udzielnikaŭ, siaredni ŭzrost jakich składaŭ 60 hadoŭ, apytvali pra častatu i zvyčki spažyvańnia cukru (naprykład, u vyhladzie hazavanych napojaŭ abo prysmakaŭ).

Zatym ich stan zdaroŭja adsočvali da momantu śmierci, pastanoŭki dyjahnazu sardečna-sasudzistaha zachvorvańnia (u sumie jon byŭ pastaŭleny 26 tysiačam udzielnikaŭ) abo zakančeńnia daśledavańnia ŭ 2019 hodzie.

Aŭtary daśledavańnia, vyniki jakoha apublikavanyja ŭ časopisie Frontiers in Public Health, nie ŭdakładnili, kolki hramaŭ sałodkaha jany ličyli za adnu porcyju. Adnak vučonyja spasłalisia na danyja papiarednich daśledavańniaŭ, dzie za porcyju prymałasia 60 hramaŭ dla vypiečki, cukierak i šakaładu, a dla marožanaha — 75 hramaŭ. Dla paraŭnańnia: adzin šakaładny batončyk Kit-Kat z čatyrma palčykami važyć 41,5 hrama. Heta dazvalaje pryblizna ŭjavić pamier adnoj porcyi sałodkaha.

U toj ža čas vyśvietliłasia, što cukar, jaki źmiaščajecca ŭ napojach, nanosić surjoznuju škodu. Rehularnaje ŭžyvańnie haziroŭki i inšych sałodkich napojaŭ bolš za vosiem razoŭ na tydzień pavialičvała ryzyku anieŭryzmy serca na 30%, sardečnaj niedastatkovaści i insultu na 20%, a arytmii na 10%. Navukoŭcy tłumačać heta tym, što sałodkija napoi vyklikajuć u ludziej pačućcio hoładu, što pryvodzić da spažyvańnia bolšaj kolkaści kałoryj u cełym.

Takim čynam, daśledavańnie paćviardžaje składany ŭpłyŭ cukru na arhanizm. Važnyja nie tolki kolkaść, ale i forma spažyvańnia: umieranyja porcyi prysmakaŭ mohuć być nie tolki biaśpiečnymi, ale i karysnymi, a voś častaje ŭžyvańnie sałodkich napojaŭ — vielmi niepažadanaje.

• 6
• 0
• 4
• 2
• 1
• 0
• 0
• 0