Papa Francišak naviedaŭ u Rymie vystavu Šahała, jaki pradstaŭleny na joj jak biełaruski mastak
8 śniežnia Papa Francišak naviedaŭ Pałac Čypoła, kab ubačyć karcinu «Biełaje Ukryžavańnie» — šedeŭr Marka Šahała, jaki jon nazyvaŭ svaim lubimym mastackim tvoram.
Jak paviedamiła Biełaruskaja redakcyja partału Vatican News, karcina była dastaŭlena ŭ Rym z Čykahskaha instytuta mastactvaŭ dziakujučy supracoŭnictvu z Dykasteryjaj pa jevanhielizacyi i fondu Fondazione Roma z nahody nabližeńnia Jubilejnaha hoda. Adkrytaja naprykancy listapada vystava stała pieršaj u novaj rymskaj muziejnaj prastory Museo del Corso i praciahniecca da 27 studzienia 2025 hoda.
Biełaje Ukryžavańnie, stvoranaje ŭ 1938 hodzie, źjaŭlajecca vielmi važnym tvoram Šahała.
Jano było napisana paśla tak zvanaj «Kryštalnaj nočy» — adnoj z samych dramatyčnych padziej antysiemickaha pieraśledu, raźviazanaha nacysckim rejcham napiaredadni Druhoj suśvietnaj vajny.
Budučy kardynałam, na staronkach knihi «Jezuit», jakaja vyjšła ŭ 2010 hodzie, Chorche Berholjo nazvaŭ hetuju karcinu svajoj ulubionaj, adkazvajučy na pytańnie žurnalista pra mastackija ŭpadabańni.
«Ja zaŭsiody ličyŭ hetuju karcinu adnoj z najcudoŭniejšych siarod stvoranych kali-niebudź. Ukryžavany tut spakojny i natchniony nadziejaj»,— adznačaŭ tady budučy pantyfik.
U aficyjnym pres-relizie Śviatoha Pasada da adkryćcia vystavy Marka Šahała jon byŭ nazvany mienavita biełaruskim mastakom — celebre pittore bielorusso — «słavuty biełaruski mastak».
Jak adznačaje Vatican News, takoje akreśleńnie maje asablivaje značeńnie, bo padzieja źjaŭlajecca častkaj aficyjnaj kulturnaj prahramy Jubileju 2025 hoda, što nadaje hetamu asablivuju vahu ŭ mižnarodnym kulturnym kantekście.
Vystava «Šahał u Rymie. Biełaje Ukryžavańnie» — adna z klučavych padziej kulturnaj prahramy Jubilejnaha hoda — dastupnaja dla biaspłatnaha naviedvańnia na praciahu dvuch miesiacaŭ. Ekspazicyja raźmiaščajecca ŭ prestyžnym Pałacy Čypoła. Miesca było abrana nievypadkova: jano maje doŭhuju historyju pradstaŭleńnia značnych mastackich tvoraŭ i zabiaśpiečvaje nieabchodnyja ŭmovy dla ekspanavańnia takoha kaštoŭnaha tvora jak «Biełaje Ukryžavańnie».
Kamientary