Byłoha kiraŭnika BPC padazrajuć u «spryjańni zachopu chramaŭ» na akupavanych terytoryjach Ukrainy
Słužba biaśpieki Ukrainy (SBU) zavočna vystaviła padazreńnie ŭ ździajśnieńni złačynstva rasijskim śviataram, jakija «spryjali zachopu chramaŭ na časova akupavanych terytoryjach Ukrainy», paviedamlaje pres-słužba viedamstva. Havorka idzie ŭ tym liku pra ciapierašniaha mitrapalita Krucickaha i Kałomienskaha, Patryjaršaha namieśnika Maskoŭskaj mitrapolii Paŭła, častka bijahrafii jakoha źviazanaja ź Biełaruśsiu.
U paviedamleńni SBU adznačajecca, što viedamstva sabrała
«maštabnuju dokaznuju bazu na čatyroch vysokapastaŭlenych rasijskich klirykaŭ, jakija raspaŭsiudžvajuć kramloŭski režym na časova akupavanaj častcy terytoryi Ukrainy».
Usim čaćviarym zavočna paviedamlena, što jany źjaŭlajucca padazravanymi ŭ ździajśnieńni złačynstva pa č. 5 art. 27, č. 3 art. 110 KK (spryjańnie ŭ ździajśnieńni naŭmysnych dziejańniaŭ z metaj źmieny miežaŭ terytoryi abo dziaržaŭnaj miažy Ukrainy, pa papiaredniaj zmovie hrupaj asob, jakija pryviali da inšych ciažkich nastupstvaŭ).
«Ciapier praciahvajucca kompleksnyja mierapryjemstvy dla pryciahnieńnia złamyśnikaŭ da adkaznaści za złačynstvy suprać našaj dziaržavy», — havorycca ŭ paviedamleńni SBU.
Siarod hetych čatyroch asob fihuruje i ciapierašni mitrapalit Krucicki i Kałomienski, Patryjaršy namieśnik Maskoŭskaj mitrapolii Pavieł. U Biełarusi jon viadomy jak kiraŭnik Biełaruskaj pravasłaŭnaj carkvy Maskoŭskaha patryjarchatu z 2013 hoda pa 25 žniŭnia 2020-ha.
17 žniŭnia 2020 hoda, praz vosiem dzion paśla prezidenckich vybaraŭ, pres-słužba BPC paviedamlała, što «adbyŭsia pastyrski vizit» mitrapalita Paŭła ŭ staličnuju balnicu chutkaj miedycynskaj dapamohi, u jakoj znachodzilisia «ludzi, jakija atrymali traŭmy padčas akcyj pratestu, jakija prajšli ŭ pačatku minułaha tydnia», u tym liku «tyja, jakija pastupili sa śladami źbićcia i ciažkich cialesnych paškodžańniaŭ ź izalatara časovaha ŭtrymańnia na vulicy Akreścina».
Paciarpiełym Pavieł tady paviedamiŭ, što ŭ Carkvie molicca ab ich «bolš chutkim vyzdaraŭleńni», i vykazaŭ nadzieju na «spraviadlivaje rasśledavańnie złačynstvaŭ, učynienych padčas niadaŭnich pratesnych akcyj».
Nieŭzabavie paśla taho Paŭła źniali z pasady kiraŭnika BPC i adpravili śpiarša na Kubań, a paźniej pryznačyli na ciapierašniuju vielmi prestyžnuju ŭ ijerarchii RPC pasadu. Akramia taho, jon staŭ členam Śviaščennaha sinoda RPC, i mienavita praz heta, jak śćviardžaje SBU, mieŭ dačynieńnie da zachopu majomaści ŭkrainskich jeparchij.
Akramia mitrapalita Paŭła, pad padazreńnie SBU trapili taksama inšyja try členy Śviaščennaha sinoda RPC: kiraŭnik Sankt-Pieciarburhskaj mitrapolii — mitrapalit Varsanofij (Anatolij Sudakoŭ), kiraŭnik adździeła źniešnich carkoŭnych suviaziaŭ RPC mitrapalit Antonij (Anton Siaŭruk), i kiraŭnik spravami Maskoŭskaj patryjarchii mitrapalit Dyjanisij (Piotr Parubaj).
«Našy śvieckija ludzi — bolš prystojnyja i sumlennyja za archirejaŭ, jakija daŭno zabylisia, jak pavinny rabić vierniki». Apublikavali «duchoŭny zapaviet» uładyki Arciemija
Patryjarch Kirył zaklikaŭ nie bajacca jadziernaj zbroi, tamu što chryścijan nie strašyć kaniec śvietu
Kiraŭnik RPC paabiacaŭ rasijanam viečnaje žyćcio ŭ vypadku hibieli va Ukrainie i zaklikaŭ malicca za Pucina
Vializnuju kolkaść ludziej vyklikajuć u milicyju, adździeły kadraŭ, dekanaty pierad vybarami2
Kamientary