Dla hałoŭnaha achoŭnika Łukašenki prydumali kiraŭničuju pasadu ŭ Biełarusbanku
Hetaha čałavieka možna było zaŭvažyć na aficyjnych fota amal z usich publičnych mierapryjemstvaŭ i vizitaŭ z udziełam Alaksandra Łukašenki. Alaksiej Laškievič pracavaŭ načalnikam asabistaj achovy palityka i zaŭsiody byŭ za jaho śpinoj ci dzieści pobač. Adnak u pačatku 2024 hoda Laškievič źnik z aficyjnaj chroniki. «Lusterka» raskazała pra novaje miesca pracy byłoha ciełaachoŭnika. Vidavočna, śpiecyjalna dla jaho ŭviali novuju vysokuju pasadu ŭ Biełarusbanku.
Ludzi ŭ achovie Łukašenki mohuć mianiacca, adnak mienavita Laškievič byŭ pobač z palitykam amal zaŭsiody i ŭsiudy. Jaho možna ŭbačyć na fota ŭsich važnych zamiežnych pajezdak Alaksandra Łukašenki ŭ druhoj pałovie 2023 hoda — naprykład, u Ekvataryjalnuju Hvinieju, AAE, Kyrhyzstan i Rasiju.
Jak praviła, Laškievič byŭ apranuty ŭ dziełavy kaścium i vyhladaŭ jak udzielnik delehacyi.
27—29 studzienia 2024 hoda Laškievič trapiŭ na kadry z pajezdki Alaksandra Łukašenki ŭ Sankt-Pieciarburh. Adnak vyhladaje, što heta padarožža stała dla jaho apošnim na pasadzie ciełaachoŭnika — na fota ź vizitaŭ paźniej Laškieviča ŭžo niama.
«Dla jaho ŭviali novuju pasadu»
Jak vyśvietliła «Lusterka», Alaksiej Laškievič pierajšoŭ u Biełarusbank na pasadu vykanaŭčaha dyrektara. Mienavita ŭ takoj jakaści były ciełaachoŭnik ciapier paznačany na sajcie banka ŭ raździełach «Hrafik asabistaha pryjomu hramadzian» i «Hrafik praviadzieńnia pramych telefonnych linij kiraŭnictvam».
Pavodle źviestak servisu Wayback Machine, Laškieviča dadali na sajt nie paźniej za 3 sakavika 2024 hoda. Na sajcie banka paznačana, što pramyja linii ź jaho ŭdziełam prachodzili ŭ krasaviku, lipieni i kastryčniku 2024 hoda.
Jak paviedamiła «Lusterku» znajomaja ź situacyjaj krynica, były achoŭnik pačaŭ pracavać u banku prykładna ŭ pačatku 2024 hoda, a pryznačeńnie jaho prajšło «cicha».
U Biełarusbanka jość karparatyŭny sajt, na jakim zvyčajna paviedamlajuć pra novyja piersony na kiraŭničych pasadach. Adnak naviny pra pryznačeńnie Laškieviča tam nie było.
«Pra jaho pryznačeńnie kalektyŭ pieršapačatkova daviedaŭsia z unutranaha (karparatyŭnaha) telefonnaha daviednika, — raskazaŭ surazmoŭca. — Užo paśla va ŭsie ŭstanovy byŭ razasłany zahad ab jaho pryznačeńni. U adpaviednaści z hetym zahadam, jon pavinien byŭ kuryravać u tym liku departamient biaśpieki, jaki ŭklučaje ŭpraŭleńnie ŭnutranaj biaśpieki»
Surazmoŭca adznačaje, što raniej takoj pasady nie było.
«Byli vykanaŭčyja dyrektary, ale jany kuryravali inšyja kirunki. Dziejnaść departamienta biaśpieki kuryravałasia niepasredna praŭleńniem banka. Dla jaho ŭviali novuju pasadu ŭ jakaści «prasłojki» pamiž praŭleńniem i departamientam», — robić vysnovu jon.
Aktyŭnaść Laškieviča ciapier nielha nazvać publičnaj. Jon ni razu nie fihuravaŭ u paviedamleńniach na sajcie banka. Krynica «Lusterka» taksama nie zmahła padrabiazna raskazać pra ciapierašnija funkcyi byłoha achoŭnika — «pracavaŭ cicha».
Alaksieju Laškieviču 49 hadoŭ. Pavodle źviestak Belpol, da 2006 hoda jon pracavaŭ u Pryjorbanku (na jakoj pasadzie — nieviadoma), z 2006 — u Słužbie biaśpieki Łukašenki. U 2019 hodzie jahonaja pasada hučała tak — «načalnik upraŭleńnia asabistaj achovy».
Mienavita Laškievič supravadžaŭ Łukašenku, kali toj z aŭtamatam u rukach vychodziŭ da siłavikoŭ kala Pałaca Niezaležnaści padčas pratestaŭ 2020 hoda ŭ Minsku.
Laškievič, jak i jahony były šef, hulaje ŭ chakiej na amatarskim uzroŭni. Raniej jon uvachodziŭ u skład kamandy «Bastyjon-2» u druhoj lizie Minska. U joj znachodziŭsia syn Viktara Łukašenki Alaksandr, a treniravaŭ kamandu Dźmitryj Baskaŭ.
U siezonie 2024/25 Laškievič pierajšoŭ u novuju kamandu — «Lehijon». Na sajcie, pryśviečanym čempijanatu Minska siarod amatarskich kamandaŭ, jana paznačanaja jak debiutant turniru, hulaje na pačatkovym uzroŭni, jaki nazyvajecca «Čelendž liha», i zajmaje tam siomaje miesca ź dziesiaci. Laškievič u hetym siezonie zhulaŭ u siami matčach, zabiŭ dźvie šajby i čatyry razy byŭ vydaleny.
«Lehijon» — niezvyčajnaja kamanda. U jaje skład uvachodziać 29 čałaviek. 20 ź ich u roznyja hady pracavali ŭ Słužbie biaśpieki Łukašenki, vynikaje ź infarmacyi ab słužbovych zapisach siłavikoŭ, raźmieščanaj «Kibierpartyzanami» na karcie i ŭ telehram-bocie. Jašče troje hulcoŭ słužyli ŭ padraździaleńni KDB «Alfa», adzin — u DAI. Pra miesca słužby astatnich piaci źviestak nie vyjaŭlena.
U 2019 hodzie Alaksiej Laškievič udzielničaŭ u bijatłonnaj honcy «Minskaja łyžnia». Kamanda Słužby biaśpieki tady zaniała apošniaje, šostaje miesca siarod siłavych struktur. Čaćviorka ž Alaksandra Łukašenki ŭ davoli raznamasnaj kampanii (ad kamandy Baskava i Ejsmant da kvarteta NAK Biełarusi) zaniała pieršaje miesca.
Pavodle źviestak «Biełpoł», žonka Alaksieja Laškieviča, Hanna Harbakova, pracuje ŭ biełaruskim adździaleńni rasijskaha banka «Choŭm Kredyt». U listapadzie 2023 hoda hety bank trapiŭ pad sankcyi ZŠA.
Asabisty achoŭnik Łukašenki byŭ na paradzie z rasijskaj hieorhijeŭskaj stužkaj, a nie ź jabłynievym ćvietam
U Łukašenki znajšłasia pazašlubnaja dačka Kryścina? Voś što viadoma
Apublikavali razmovy žonki Bałaby, u jakich jana sprabuje schavać ad muža troch kachankaŭ, u tym liku Rusłana Alachno
Były ministr unutranych spraŭ Biełarusi maje biznes u akupavanym Maryupali
Łukašenka pamiłavaŭ eks-kiraŭnika svajoj achovy Uciuryna
Prajekciroŭščyki pakazali, jak budzie vyhladać płošča Banhałor u Minsku. Im skazali padumać lepš7
Prajekciroŭščyki pakazali, jak budzie vyhladać płošča Banhałor u Minsku. Im skazali padumać lepš
«Na praciahu 30 hadoŭ niezaležnaści biełaruskamoŭnyja biuleteni zadavalniali ŭsich». Kamunisty abvinavacili Bondaravu ŭ raspalvańni varožaści na moŭnaj hlebie1616
Kamientary