Biełaruś šukaje rabotnikaŭ u Vjetnamie. Voś čamu pakul ničoha nie atrymałasia
Biełaruskija ŭłady adčuvajuć niedachop pracoŭnaj siły. Stvaryć naležnyja ŭmovy, kab viarnulisia emihranty, nie atrymlivajecca. Tamu vyrašana šukać tannych rabotnikaŭ z krain treciaha śvietu — adtul, dzie siaredni zarobak nižejšy za biełaruski.
«Biełpoł» padzialiŭsia z «Našaj Nivaj» kopijaj lista pasolstva Biełarusi ŭ Vjetnamie. Ź jaho źmiestu možna zrabić vysnovu, što ŭrad usurjoz azadačany pytańniem pošuku rabočaj siły. Zadańnie šukać jaje za miažoj atrymali i dypłamatyčnyja pradstaŭnictvy.
Tak, u liście zhadvajecca pratakoł daručeńniaŭ vice-premjera Biełarusi Anatola Sivaka ad 16 kastryčnika 2024 hoda. U adpaviednaści ź im pasolstva paviedamlaje, što ŭ Vjetnamie «jość peŭny abjom pracoŭnaj siły, dla jakoj biełaruski rynak pracy patencyjna moža być pryvabnym pa ŭzroŭni apłaty».
Jak tłumačycca, u Vjetnamie ŭzrovień biespracoŭja siarod moładzi składaje 8%. Amal paŭtara miljona čałaviek uzrostam da 24 hadoŭ nidzie nie pracujuć i nie vučacca. A siaredni zarobak u krainie składaje $300 — istotna nižej, čym u Biełarusi.
Adnak zavabić vjetnamcaŭ u Minsk usio adno pakul nie ŭdałosia.
Pasolstva paviedamlaje, što ŭ červieni 2024 hoda kiraŭnictva «Kamvola» sprabavała znajści rabotnikaŭ i źviarnułasia pa dapamohu da dypłamataŭ. Tyja praviali niekalki sustreč z rekrutynhavymi ahienctvami.
Kolki hrošaj zachacieli vjetnamcy? $700 zarobku na ruki na miesiac (na pieryjad vyprabavalnaha terminu syšlisia na $500). I heta rabočym biez vopytu pracy pa profili i bieź viedańnia movy. Kali b znajšoŭsia siarod rabočych čałaviek, zdolny kamunikavać pa-rusku ci pa-anhlijsku, to jamu daviałosia b płacić užo pa $1000.
Čamu stolki? Jak tłumačycca ŭ liście, šmat chto z žycharoŭ krainy pracuje za miažoj, pieradusim u Japonii, Paŭdniovaj Karei, Tajvani, Arabskich Emiratach i Saudaŭskaj Aravii. Tam jany zarablajuć istotna vyšej. Tamu pry nižejšym zarobku, maŭlaŭ, niemahčyma budzie znajści achvotnych.
Pry hetym, jak vynikaje ź lista, vjetnamcy hatovyja pracavać pa 10 hadzin. Prapanova ŭtrymlivała pałažeńnie ab «abaviazkovych 2 hadzinach zvyšuročnych», uklučna z pracaj u vychodnyja i śviatočnyja dni z apłataj zhodna ź biełaruskim zakanadaŭstvam.
Achvotnym pryjechać na pracu pracadaŭca pavinien byŭ by apłacić pieralot, a rekrutynhavamu ahienctvu — hanarar u pamiery dvuchmiesiačnaha zarobku kožnaha rabočaha paśla vyprabavalnaha terminu (pa 1400 dołaraŭ).
Razhladzieŭšy takuju prapanovu, kiraŭnictva «Kamvolu» vyrašyła admovicca. Patrabujemy zarobak akazaŭsia vyšejšym za toj, na jaki raźličvali na pradpryjemstvie.
Zhodna ź infarmacyjaj z raździeła vakansij sajta Kamvolnaha kambinata, zarobak nizkakvalifikavanych rabotnikaŭ składaje 900-950 rubloŭ, a apieratara abstalavańnia — ad 1200 da 1400 rubloŭ. Samy vialiki zarobak — 2000 rubloŭ — abiacajuć farboŭščyku.
Biełarusy za takija hrošy pracujuć, a voś vjetnamcy nie zachacieli. Vyhladaje, što pošuk hastarbajtaraŭ praciahvajecca.
Kamientary
"zarobak nizkakvalifikavanych rabotnikaŭ składaje 900-950 rubloŭ,"
...
heta $300 ?