Łaŭreata premii «Biełaruski spartyŭny Alimp» sudziać za seksualny hvałt

U Homieli 10 śniežnia pačynajecca razhlad kryminalnaj spravy pa abvinavačvańni ŭ raspusnych dziejańniach (art.169 KK) i hvałtoŭnych dziejańniach seksualnaha charaktaru (art. 167 KK). Proźvišča, imia abvinavačanaha pa hetaj spravie, jakija paznačany ŭ raskładzie suda, całkam supadajuć z dadzienymi viadomaha homielskaha treniera Viktara Bajkova.

«Fłahštok» patelefanavaŭ pa miescy jaho pracy — pytańniu pra sud nad svaim supracoŭnikam tam nie ździvilisia, adznačyŭšy, što nie viedajuć, kali pačnuć razhladać spravu treniera.

Bajkoŭ nie raz stanaviŭsia hierojem publikacyj u dziaržaŭnaj presie. Apošni raz — u pačatku 2023 hoda, kali staŭ uładalnikam premii «Biełaruski spartyŭny Alimp» pa vynikach 2022 hoda.

Heta zasłužany trenier Biełarusi, jaki ŭžo 40 hadoŭ pracuje ŭ Homielskim dziaržaŭnym vučyliščy alimpijskaha reziervu. Siarod jaho vychavancaŭ jość pryziory Alimpijskich hulniaŭ.

Treniera abvinavačvajuć pa častcy 2 abodvuch artykułaŭ. Zhodna z farmuloŭkami ŭ Kryminalnym kodeksie, heta raspusnyja dziejańni ŭ dačynieńni da asoby, što zaviedama nie dasiahnuła 16-hadovaha ŭzrostu, učynienyja z užyvańniem hvałtu abo z pahrozaj jaho prymianieńnia, albo piedahahičnym rabotnikam abo inšaj asobaj, na jakoha ŭskładzieny abaviazki pa vychavańni niepaŭnaletniaha.

Druhoje abvinavačvańnie hučyć tak: dziejańni seksualnaha charaktaru, učynienyja nasupierak voli paciarpiełaha z užyvańniem hvałtu abo z pahrozaj jaho prymianieńnia, učynienyja paŭtorna, albo ŭ dačynieńni da zaviedama niepaŭnaletniaha (niepaŭnaletniaj).

Viadoma, što da treniera traplali dzieci va ŭzroście ad 13 hadoŭ.

Pra złačynstvy jakoha pieryjadu idzie havorka, nieviadoma — sprava budzie razhladacca ŭ zakrytym režymie, tamu nijakija padrabiaznaści nie ahučać. Navat pra fakt suda i pra hetuju hučnuju spravu ŭ dziaržaŭnaj presie nie było zhadana.

U vypadku pryznańnia vinavatym treniera mohuć prysudzić da pazbaŭleńnia voli na termin ad piaci da trynaccaci hadoŭ.

Jak Bajkoŭ raniej raspaviadaŭ pra siabie ŭ intervju, jon bolš za 40 hadoŭ u šlubie, maje niekalki ŭnukaŭ.

• 1
• 0
• 3
• 1
• 3
• 0
• 2
• 0