U Hruzii kamandziry siłavikoŭ masava sychodziać u adstaŭku — syšoŭ i načalnik departamienta, jaki płanuje razhony

Načalnik upraŭleńnia apieratyŭnaha płanavańnia departamienta asablivych daručeńniaŭ MUS Hruzii Iraklij Šaimšmiełašvili padaŭ u adstaŭku.

Zajavu ab zvalnieńni pa siamiejnych abstavinach jon apublikavaŭ u sacsietkach. Pry hetym publikacyju vysokapastaŭleny kamandzir śpiecnaza supravadziŭ smajlikami sa ściahami Hruzii i Jeŭrasajuza, piša newsgeorgia.ge.

Departamient, jakim kiravaŭ Šaimšiełašvili, zajmajecca płanavańniem niepasredna razhonaŭ pratesnych akcyj.

Paśla pastanovy «Hruzinskaj mary» admovicca ad pieramovaŭ ab ustupleńni ŭ ES da 2028 hoda i pačatku maštabnych pratestaŭ, publična ab adstaŭcy abviaścili ŭžo niekalki vysokapastaŭlenych čynoŭnikaŭ MUS. Byłyja siłaviki śćviardžajuć, što kolkaść zvolnienych za apošnija dni idzie ŭžo na dziasiatki.

Eks-načalnik batumskaha ŭpraŭleńnia marskoj biaśpieki bierahavoj achovy Hoča Bierydze raspavioŭ, što razam z Šaišmiełašvili zvolnilisia čaćviora jaho namieśnikaŭ, a taksama 16 instruktaraŭ śpiecnazu, načalnik i 12 supracoŭnikaŭ słužby psichałahičnaj padrychtoŭki, a taksama ŭsia kamanda apierataraŭ vadamiotaŭ — 16 čałaviek.

TV Pirveli vykazaŭ zdahadku, što mienavita z hetaj pryčyny ŭ apošnija dni pry razhonie akcyj adbyvalisia pamyłki. Naprykład, kamiery fiksavali vypadki, kali vadamioty nakiroŭvali ŭ bok śpiecnazu. Taksama žurnalisty dapuskajuć, što mienavita praz «raspačaty bunt» u noč na sieradu demanstrantaŭ na Rustavieli nie razahnali ŭpieršyniu za tydzień.

Maštabnyja pratesty stychijna pačalisia ŭ Hruzii 28 listapada. Nahodaj stała zajava premjera Iraklija Kabachidze. Jon abviaściŭ, što ŭłady vyrašyli da kanca 2028 hoda nie ŭklučać u paradak dnia pytańnie pieramovaŭ ab ustupleńni ŭ Jeŭrasajuz i admovicca ad usich biudžetnych hrantaŭ z boku supolnaści.

U Tbilisi mitynhi razhaniali z dapamohaj vadamiotaŭ, humovych kul, ślozaciečnaha hazu i piarcovaha spreju. Za tydzień ułady zatrymali bolš za 300 čałaviek. Bolšaść ź ich źbityja siłavikami. Siarod paciarpiełych bolš za paŭsotni supracoŭnikaŭ ŚMI, jakija aśviatlali pratesty. Ministerstva achovy zdaroŭja dało spravazdaču ab špitalizacyi 134 pratestoŭcaŭ, 20 žurnalistaŭ i 50 supracoŭnikaŭ MUS.

• 14
• 0
• 0
• 1
• 0
• 0
• 0
• 0